കോവിഡ് പ്രതിരോധ പ്രവർത്തനങ്ങളിൽ സംസ്ഥാന സർക്കാരിനെ വിമർശിക്കുക മാത്രമാണ് പ്രതിപക്ഷം ചെയ്യുന്നതെന്ന് ബിജെപി സംസ്ഥാന അധ്യക്ഷൻ കെ.സുരേന്ദ്രൻ. സംസ്ഥാന സർക്കാരിനെ വിമർശിക്കാൻ വേണ്ടി മാത്രം രാവിലെ കുളിച്ച് കുപ്പായവുമിട്ട് ഇറങ്ങുന്ന രീതി ശരിയല്ല, ഈ രീതി പ്രതിപക്ഷം നിർത്തണമെന്നാണ് കെ സുരേന്ദ്രൻ പറഞ്ഞത്.
സംസ്ഥാന സർക്കാരിന്റെ കോവിഡ് പ്രതിരോധ പ്രവർത്തനത്തിനുള്ള ക്രിയാത്മകമായ പദ്ധതികളുമായി എല്ലാ രാഷ്ട്രീയ കക്ഷികളും ഇപ്പോൾ സഹകരിക്കുകയാണ് വേണ്ടതെന്നും, ഭക്ഷണപ്പൊതി വിതരണം, പച്ചക്കറി കിറ്റ് വിതരണം, മരുന്ന് വിതരണം, മാസ്ക് വിതരണം തുടങ്ങി നിരവധി സേവന പ്രവർത്തനങ്ങൾ ഭാരതീയ ജനതാ പാർട്ടി കേരളത്തിൽ എല്ലായിടത്തും ചെയ്യുന്നുണ്ട്,എല്ലാ രാഷ്ട്രീയ പാർട്ടികളും ഇതുപോലെ സന്നദ്ധ പ്രവർത്തനങ്ങളിൽ ഏർപ്പെടണമെന്നും കെ. സുരേന്ദ്രൻ അഭിപ്രായപ്പെട്ടു. ഇതൊന്നും ചെയ്യാതെ പ്രതിപക്ഷം എന്നും രാവിലെ വന്ന് സംസ്ഥാന സർക്കാരിനെ വിമർശിക്കുകയെന്ന രാഷ്ട്രീയ അജണ്ട മാത്രമാണ് നടപ്പിലാക്കുന്നത്, ക്രിയാത്മകമായ നിലപാടല്ല, മറിച്ച് നിഷേധാത്മകമായ നിലപാടാണ് പ്രതിപക്ഷം സ്വീകരിക്കുന്നതെന്നും കെ.സുരേന്ദ്രൻ കൂട്ടിച്ചേർത്തു.
