തിരുവനന്തപുരം: ഇത്തവണ ജൂൺ അഞ്ചിന് തെക്കു പടിഞ്ഞാറൻ മൺസൂൺ കേരളത്തിലെത്തുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ചിലപ്പോൾ നാല് ദിവസം മുന്നോട്ടോ പിന്നോട്ടോ കാലവർഷത്തിന്റെ വരവിൽ വ്യതിയാനം സംഭവിച്ചേക്കാമെന്നും റിപ്പോർട്ടിൽ പറയുന്നു.
എന്നാൽ തെക്ക് പടിഞ്ഞാറൻ മൺസൂൺ കേരളത്തിൽ മെയ് 28ന് ആരംഭിക്കുമെന്നാണ് സ്വകാര്യ കാലാവസ്ഥാ ഏജൻസിയായ സ്കൈമെറ്റ് പ്രവചിക്കുന്നത്. സാഹചര്യങ്ങൾക്കനുസരിച്ച് ഇതിൽ ഒന്നോ രണ്ടോ ദിവസത്തിന്റെ വ്യത്യാസം ഉണ്ടായേക്കാമെന്നും സ്കൈമെറ്റ് പറയുന്നു.
ബംഗാൾ ഉൾക്കടലിൽ നിലവിൽ രൂപം കൊണ്ടിരിക്കുന്ന ന്യൂനമർദ്ദമാണ് മൺസൂൺ മേഘങ്ങൾ പതിവിലും നേരത്തെ എത്താൻ കാരണമെന്നും സ്കൈമെറ്റ് വിശദീകരിക്കുന്നു. സാധാരണ ജൂൺ ഒന്ന് മുതലാണ് കേരളത്തിൽ കാലവർഷം ആരംഭിക്കുന്നത്.
