കണ്ണൂർ: കണ്ണൂരിലെ സിപിഎം ശക്തി കേന്ദ്രത്തിൽ അസം സ്വദേശിനിയെ തദ്ദേശ തെരഞ്ഞെടുപ്പിൽ സ്ഥാനാർത്ഥിയാക്കി ബിജെപി. ഇരിട്ടി നഗരസഭയിലെ പതിനൊന്നാം വാർഡിലാണ് മുന്മി ഗൊഗോയ് എന്ന മുന്മി ഷാജിയെ ബിജെപി സ്ഥാനാർത്ഥിയാക്കിയിരിക്കുന്നത്.
കണ്ണൂർ തന്നെ മരുമകളായി സ്വീകരിച്ചു കഴിഞ്ഞതായി വ്യക്തമാക്കുന്ന മുന്മി തികഞ്ഞ വിജയ പ്രതീക്ഷയിലാണ്. പ്രധാനമന്ത്രി നരേന്ദ്ര മോദിയുടെ ഇച്ഛാശക്തിയും കേന്ദ്ര സർക്കാരിന്റെ ജനക്ഷേമ നടപടികളുമാണ് ബിജെപി സ്ഥാനാർത്ഥിയാകാൻ തന്നെ പ്രേരിപ്പിച്ചതെന്ന് മുന്മി വാർത്താ ഏജൻസിയോട് പറഞ്ഞു.
കേന്ദ്ര സർക്കാരിന്റെ പല ജനക്ഷേമ പദ്ധതികളും രാഷ്ട്രീയ വിദ്വേഷം കാരണം കേരളത്തിലെ ഭരണാധികാരികൾ നേരിട്ട് ജനങ്ങളിൽ എത്തിക്കുന്നില്ല. ഈ അവസ്ഥയ്ക്ക് തന്റെ വാർഡിലെങ്കിലും ഒരു മാറ്റം കൊണ്ടു വരാൻ താൻ ആഗ്രഹിക്കുകയാണെന്നും മുന്മി പറയുന്നു.
ഷാജി വിളിച്ച ഒരു റോംഗ് നമ്പരാണ് തന്നെ കേരളത്തിലെത്തിച്ചതെന്ന് മുന്മി പറയുന്നു. ഷാജി നമ്പർ മാറി വിളിച്ചപ്പോൾ ഫോൺ എടുത്ത് സംസാരിച്ചു. ആ പരിചയം പിന്നീട് അടുപ്പമായി മാറിയെന്നും വിവാഹത്തിൽ എത്തിയെന്നും മുന്മി ഗൊഗോയ് പറയുന്നു.
