ന്യൂഡൽഹി : ലോകനേതാക്കളിൽ ഏറ്റവും ജനപ്രിയൻ ഇന്ത്യൻ പ്രധാനമന്ത്രി നരേന്ദ്രമോദിയെന്ന് അമേരിക്കൻ സർവേ റിപ്പോർട്ട്. അമേരിക്കൻ ആസ്ഥാനമായ ഡേറ്റ ഇന്റലിജന്റ്സ് ഏജൻസി മോണിംഗ് കൺസൽട്ട് പുറത്ത് വിട്ട റിപ്പോർട്ടിലാണ് നരേന്ദ്ര മോദി ബഹുദൂരം മുന്നിലായിരിക്കുന്നത്. 78 ശതമാനമാണ് നരേന്ദ്ര മോദിയുടെ അപ്രൂവൽ റേറ്റിംഗ്.
സ്വിറ്റ്സർലൻഡിന്റെയും മെക്സിക്കോയുടേയും ഭരണാധികാരികളാണ് രണ്ടാം സ്ഥാനത്ത്. 62 ശതമാനമാണ് ഇവർക്ക് കിട്ടിയ റേറ്റിംഗ്. അൻപത് ശതമാനത്തിനു മുകളിൽ റേറ്റിംഗ് ലഭിച്ച ഒരാൾ കൂടിയേ പട്ടികയിലുള്ളൂ. ഓസ്ട്രേലിയൻ പ്രധാനമന്ത്രി ആന്തണി അൽബനീസ്. അമേരിക്കൻ പ്രസിഡന്റ് ജോ ബൈഡന് 42 ശതമാനവും ബ്രിട്ടീഷ് പ്രധാനമന്ത്രി ഋഷി സുനകിന് 33 ശതമാനവുമാണ് അപ്രൂവൽ റേറ്റിംഗ്. കാലങ്ങളായി പ്രധാനമന്ത്രി നരേന്ദ്രമോദി തന്നെയാണ് അപ്രൂവൽ റേറ്റിംഗിൽ ഒന്നാമത് നിൽക്കുന്നത്.
പ്രധാനമന്ത്രി നരേന്ദ്രമോദി അത്ഭുതകരമായ വിധത്തിൽ ജനകീയനാണെന്ന് അമേരിക്കൻ പ്രസിഡന്റ് ജോ ബൈഡൻ വ്യക്തമാക്കിയിരുന്നു. മോദിയുമായുള്ള കൂടിക്കാഴ്ച്ചക്കിടെയായിരുന്നു ബൈഡന്റെ പരാമർശം. ജനങ്ങൾ മോദിയുടെ സന്ദർശനത്തിനായി കാത്തിരിക്കുകയാണെന്നും താങ്കളെക്കൊണ്ട് ഒരു രക്ഷയുമില്ലെന്നും ബൈഡൻ മോദിയോട് പറഞ്ഞിരുന്നു.
