ചൂടുകാലത്ത് ദാഹം ശമിപ്പിക്കാന് പല പാനീയങ്ങളും മാറി മാറി പരീക്ഷിക്കുന്നവരാണ് നമ്മള്. കൂട്ടത്തിലാരാ കേമന് എന്ന് ചോദിച്ചാല്, നമ്മുടെ നാടന് മോരുംവെള്ളം തന്നെയാണെന്നതില് ഒരു സംശയവും ഇല്ല. ശരീരം തണുപ്പിക്കാന് തൈര് തന്നെയാണ് ബെസ്റ്റ്. പക്ഷേ അത് കാന്താരിയും ചെറിയുള്ളിയും ഇഞ്ചിയും കറിവേപ്പിലയുമൊക്കെ ചതച്ചിട്ട് മോരുംവെള്ളമായി കുടിക്കുന്നതാണോ അതോ മധുരമിട്ട് ലസ്സിയായി കഴിക്കുന്നതാണോ കൂടുതല് നല്ലത്?
മോരുംവെള്ളമായാലും ലസ്സി ആയാലും തൈര് ആണ് അതിന്റെ പ്രധാന ചേരുവ. ചൂടുകാലത്ത് ക്ഷീണമകറ്റി ഉന്മേഷം നേടാന് ഇത് രണ്ടും നല്ലതാണ്. രുചികരമാണെന്നത് മാത്രമല്ല, മോരിലും ലസ്സിയിലും ഒരുപാട് പോഷകങ്ങള് അടങ്ങിയിരിക്കുന്നുവെന്നതും ഇവയെ പ്രിയ പാനീയങ്ങളാക്കുന്നു. മോരുംവെള്ളം ഉണ്ടാക്കുമ്പോള് തൈരിലുള്ള ലാക്ടോസ് ലാക്ടിക് ആസിഡ് ആയി മാറുന്നു. അതുകൊണ്ടാണ് അത് പെട്ടെന്ന് ദഹിക്കുന്നത്. ലാക്ടോസ് അലര്ജി ഉള്ളവര്ക്ക് മോരുംവെള്ളം കുടിക്കാവുന്നതാണ്. അതേസമയം ലസ്സി മോരുംവെള്ളത്തേക്കാള് അസിഡിക് ആണ്. തൈരിന് പുറമേ പഞ്ചസാരയും പാലും പഴങ്ങളും ചിലപ്പോള് ലസ്സിയില് ചേര്ക്കാറുണ്ട്.
പോഷകഗുണത്തിന്റെ കാര്യത്തില് ഇവ തമ്മില് വലിയ വ്യത്യാസമൊന്നും ഇല്ല. മോരുംവെള്ളത്തില് ധാരളം പ്രോബയോട്ടിക്സ് അടങ്ങിയിരിക്കുന്നു. മോരുംവെള്ളം കുടിക്കുന്നത് പ്രതിരോധശക്തി വര്ധിപ്പിക്കും. കാല്സ്യം, വൈറ്റമിന് ബി-12, സിങ്ക്, പ്രോട്ടീന് എന്നിവയും മോരില് അടങ്ങിയിരിക്കുന്നു. ദിവസവും മോരുംവെള്ളം കുടിക്കുന്നത് വൈറ്റമിന് ബി-12 അപര്യാപ്തത കുറയ്ക്കാന് വളരെ നല്ലതാണ്.ലസ്സിയില് കാല്സ്യത്തിന് പുറമേ, പൊട്ടാസ്യം, ഫോസ്ഫറസ് എന്നിവയും അടങ്ങിയിരിക്കുന്നു. ലസ്സിയിലെ കാല്സ്യം ശരീരത്തിലെ എല്ലുകളുടെ ബലം വര്ധിപ്പിക്കുന്നു. മാത്രമല്ല, ഇതിലെ റൈബോഫ്ളാവിന്, പൊട്ടാസ്യം എന്നീ ഘടകങ്ങള് രക്തസമ്മര്ദ്ദം നിയന്ത്രിക്കാന് നല്ലതാണ്.
ഇരുപാനീയങ്ങളിലും ആരോഗ്യത്തിന് ഗുണമുള്ള ഏറെ ഘടകങ്ങള് ഉണ്ടെങ്കിലും ഇവ തമ്മില് താരതമ്യം ചെയ്യുമ്പോള് ആരോഗ്യത്തിന് ഏറ്റവും ഗുണം ചെയ്യുന്നത് മോരുംവെള്ളമാണ്. ഒരു ഗ്ലാസ് മോരുംവെള്ളത്തില് 40-45 കലോറിയാണ് ഉണ്ടാകുക. അതേസമയം ഒരു ഗ്ലാസ് ലസ്സിയില് ഇത് 150-200 കലോറിയാണ്. കലോറിയുടെ അളവ് അധികമായതിനാല് അമിതമായി ലസ്സി കഴിക്കുന്നത് വണ്ണം വെക്കാന് കാരണമാകും. ആയുര്വേദവും മോരുംവെള്ളത്തെയാണ് പിന്തുണയ്ക്കുന്നത്. മോരുംവെള്ളം കഫ ദോഷങ്ങള് വര്ധിപ്പിക്കുന്നില്ല. മാത്രമല്ല ലസ്സിയെയോ പാലിനെയോ അപേക്ഷിച്ച് മോരുംവെള്ളത്തില് 50 ശതമാനം കുറവ് കലോറി മാത്രമാണുള്ളത്. മോരുംവെള്ളത്തില് വെള്ളം കൂടി ചേര്ക്കുന്നതിനാല് കലോറിയുടെ അളവ് വീണ്ടും കുറയുന്നു.
എന്തായാലും അസിഡിറ്റിയോ അള്സറോ ഉള്ളവര്ക്ക് കുടിക്കാന് ഏറ്റവും നല്ല പാനീയങ്ങളാണ് മോരുംവെള്ളവും ലസ്സിയും. ഇവ കുടിച്ചാല് ദഹനം എളുപ്പത്തിലാകും.
Discussion about this post