നമ്മുടെ വൈകുന്നേരങ്ങളിലെ സ്നാക്സ് ശീലങ്ങളിൽ എണ്ണയിൽ വറുത്തതും പൊരിച്ചതുമായ പലഹാരങ്ങൾക്ക് പകരം വറുത്ത മുതിര ഉൾപ്പെടുത്തുന്നത് ആരോഗ്യത്തിന് ഏറെ ഗുണകരമാണെന്ന് പഠനങ്ങൾ വ്യക്തമാക്കുന്നു. പോഷകഗുണങ്ങൾ ഏറെയുണ്ടെങ്കിലും നമ്മുടെ ദൈനംദിന ഭക്ഷണക്രമത്തിൽ പലപ്പോഴും അവഗണിക്കപ്പെടുന്ന ഒരു ധാന്യമാണ് മുതിര.
പോഷകങ്ങളുടെ കലവറയാണ് വറുത്ത മുതിര . അയൺ (ഇരുമ്പ്), കാൽസ്യം, പ്രോട്ടീൻ എന്നിവയാൽ സമ്പന്നമാണ് മുതിര. കൊഴുപ്പ് വളരെ കുറവായതിനാൽ ശരീരഭാരം നിയന്ത്രിക്കാൻ ആഗ്രഹിക്കുന്നവർക്ക് ഇത് ഒരു മികച്ച ലഘുഭക്ഷണമാണ്. ഉയർന്ന നാരുകൾ ദഹനം സുഗമമാക്കാനും വിശപ്പ് നിയന്ത്രിക്കാനും സഹായിക്കുന്നു.
വറുത്ത മുതിര നേരിട്ട് കഴിക്കുന്നതിന് പുറമെ സാലഡുകളിലും സൂപ്പുകളിലും ചേർക്കാം. കൂടാതെ ഇത് പൊടിച്ച് ബേക്കിംഗ് ആവശ്യങ്ങൾക്കും ഉപയോഗിക്കാവുന്നതാണ് .മറ്റ് ഡ്രൈ ഫ്രൂട്ട്സുകളെയോ നട്ടുകളെയോ അപേക്ഷിച്ച് വളരെ വിലക്കുറവിൽ ലഭ്യമാകുന്ന ഒന്നാണ് മുതിര. പോക്കറ്റ് കാലിയാകാതെ തന്നെ പോഷകങ്ങൾ ശരീരത്തിലെത്തിക്കാൻ ഇത് സഹായിക്കുന്നു.
തയ്യാറാക്കാൻ വളരെ എളുപ്പം:
വീടുകളിൽ തന്നെ എളുപ്പത്തിൽ തയ്യാറാക്കാവുന്ന ഒന്നാണിത്. മുതിര നന്നായി വറുത്തെടുത്ത് ആവശ്യത്തിന് ഉപ്പോ കുരുമുളകുപൊടിയോ ചേർത്ത് വായുകടക്കാത്ത പാത്രത്തിൽ സൂക്ഷിച്ചാൽ ഏതുസമയത്തും കഴിക്കാം.
ആരോഗ്യകരമല്ലാത്ത എണ്ണപ്പലഹാരങ്ങൾ ഒഴിവാക്കി വറുത്ത മുതിര ഭക്ഷണക്രമത്തിന്റെ ഭാഗമാക്കുന്നത് ദീർഘകാല ആരോഗ്യത്തിന് മികച്ച തുടക്കമാകും.
