തിരുവനന്തപുരം: കെഎസ്ആർടിസി ബസ് ജീവനക്കാർ മോശമായി പെരുമാറിയെന്ന പരാതിയുമായി സഹോദരിമാർ. ബസിനുള്ളിൽ ഛർദ്ദിച്ചത് തങ്ങളെ തടഞ്ഞുവച്ച് കഴുകിച്ചെന്ന് സഹോദരിമാർ പറയുന്നു. ആശുപത്രിയിൽ പോയി തിരിച്ചുവരുകയായിരുന്ന സഹോദരിമാർക്കാണ് കെഎസ്ആർടിസി ബസിനുള്ളിൽ ദുരനുഭവമുണ്ടായത്.
കെഎസ്ആർടിസിയിൽ ജോലി ചെയ്യുന്ന മറ്റൊരു ഡ്രൈവറുടെ മക്കൾക്ക് നേരെയാണ് ജീവനക്കാർ മോശമായി പെരുമാറിയത്.ബസ് വൃത്തിയാക്കാൻ ഡിആർഎൽ സ്റ്റാഫ് ഉള്ളപ്പോഴാണ് ജീവനക്കാർ പെൺകുട്ടികളോട് ഇത്തരത്തിൽ പെരുമാറി
കഴിഞ്ഞ ദിവസം വെള്ളറട ഡിപ്പോയിലായാരുന്നു സംഭവം. നെയ്യാറ്റിൻകര ഡിപ്പോയിലെ ആർഎൻസി 105-ാം നമ്പർ ചെമ്പൂർ-വെള്ളറട ബസിലാണ് പെൺകുട്ടിയും സഹോദരിയും യാത്ര ചെയ്തിരുന്നത്. ഡ്രൈവറുടെ സീറ്റിന് പിന്നിലായാണ് ഇരുവരും ഇരുന്നത്. യാത്രയ്ക്കിടെ പെൺകുട്ടി ഛർദ്ദിക്കുകയായിരുന്നു. ഇതോടെ ഡ്രൈവർ ദേഷ്യപ്പെട്ടു. ബസ് വെള്ളറട സ്റ്റാൻഡിൽ എത്തിയപ്പോൾ ജീവനക്കാർ ഇവരെ തടഞ്ഞു. ഛർദ്ദി കഴുകി വൃത്തിയാക്കിയ ശേഷമേ ഇറങ്ങാൻ സാധിക്കൂ എന്ന് പറഞ്ഞ് തടയുകയായിരുന്നു. ഇളയ സഹോദരിയെ ബസിൽ പിടിച്ചുവച്ച് മൂത്ത സഹോദരിയോട് ബസ് വൃത്തിയാക്കാൻ ആവശ്യപ്പെട്ടു. തുടർന്ന് മൂത്ത സഹോദരി ഡിപ്പോയിലെ വെഹിക്കിൾസ് സൂപ്രണ്ട് ഓഫീസിൽനിന്ന് ബക്കറ്റ് വാങ്ങി, സമീപത്തെ വാഷ് ബെയ്‌സിനിൽനിന്ന് വെള്ളം നിറച്ച് ബസിലെത്തി വൃത്തിയാക്കി. ഇതിന് ശേഷം മാത്രമാണ് ഇവരെ വിട്ടത്.
Discussion about this post