അഗർത്തല : ലോക്സഭ തിരഞ്ഞെടുപ്പിന് മുന്നോടിയായി നിരവധി നേതാക്കൾ എൻഡിഎ മുന്നണിയിൽ ചേർന്നത് നമ്മൾ കണ്ടു കഴിഞ്ഞു. ഇപ്പോഴിതാ ത്രിപുരയിൽ നിന്നും അല്പം വ്യത്യസ്തമായ ഒരു വാർത്തയാണ് വരുന്നത്. ത്രിപുരയിലെ പ്രധാന പ്രതിപക്ഷം മൊത്തമായി തന്നെ എൻഡിഎയിൽ ചേരുമെന്ന് പ്രഖ്യാപിച്ചിരിക്കുകയാണ്.
ത്രിപുരയിലെ പ്രധാന പ്രതിപക്ഷ പാർട്ടിയായ തിപ്ര മോതയാണ് എൻഡിഎ മുന്നണിയിൽ ചേരുന്നത്. പ്രദ്യോത് ദേബ് ബർമയുടെ നേതൃത്വത്തിലുള്ള തിപ്ര മോത ലോക്സഭാ തിരഞ്ഞെടുപ്പിന് മുന്നോടിയായി ബിജെപി നേതൃത്വത്തിലുള്ള ത്രിപുര സർക്കാരിന്റെ ഭാഗമാകുന്നതാണ്. 60 അംഗ ത്രിപുര നിയമസഭയിൽ തിപ്ര മോതയ്ക്ക് 13 എംഎൽഎമാരാണ് ഉള്ളത്.
നേരത്തെ ത്രിപുരയിലെ തദ്ദേശീയ ജനവിഭാഗത്തിന്റെ പ്രശ്നപരിഹാരങ്ങൾക്കായി കേന്ദ്രസർക്കാരും ബിജെപി നേതൃത്വത്തിലുള്ള ത്രിപുര സർക്കാരും തിപ്ര മോത പാർട്ടിയും ചേർന്ന് ഒരു ത്രികക്ഷി കരാറിൽ ഒപ്പു വച്ചിരുന്നു. ഇതിന് പിന്നാലെയാണ് ഇപ്പോൾ എൻഡിഎയിൽ ചേരുമെന്ന് തിപ്ര മോത വ്യക്തമാക്കിയിരിക്കുന്നത്.
Discussion about this post