കൊല്ലം : 14 കെഎസ്ആർടിസി ജീവനക്കാർക്കെതിരെ അച്ചടക്ക നടപടി. മുന്നറിയിപ്പില്ലാതെ അവധിയെടുത്ത് മുങ്ങിയതിനാണ് ഇവർക്കെതിരെ നടപടി സ്വീകരിച്ചിരിക്കുന്നത്. പത്തനാപുരം ഡിപ്പോയിലെ ജീവനക്കാർക്കെതിരെയാണ് നടപടി. കെഎസ്ആർടിസി ചെയർമാൻ & മാനേജിംഗ് ഡയറക്ടറുടെ ഓഫീസ് പുറത്തിറക്കിയ കുറിപ്പിലാണ് നടപടിയെ കുറിച്ച് അറിയിച്ചിരിക്കുന്നത്. 16 സ്ഥിരം ഡ്രൈവർമാർക്ക് സ്ഥലം മാറ്റവും നൽകി. 4 ബദലി വിഭാഗം ഡ്രൈവർമാരെ സർവീസിൽ നിന്ന് മാറ്റി നിർത്തുകയും ചെയ്തു.
കഴിഞ്ഞ ദിവസം കെഎസ്ആർടിസി ഡിപ്പോകളിലും ബസുകളിലും വിജിലൻസ് പരിശോധനയെ തുടർന്ന് ഡ്രൈവർമാർ കൂട്ടത്തോടെ മുങ്ങിയത് . ഗതാഗത മന്ത്രി കെ ബി ഗണേഷ് കുമാറിന്റെ മണ്ഡലമായ പത്തനാപുരത്ത് മാത്രം 15 കെഎസ്ആർടിസി സർവീസുകളാണ് ഡ്രൈവർമാർ കൂട്ടത്തോടെ അവധി എടുത്തത് കാരണം തടസ്സപ്പെട്ടത്. ഇതിലൂടെ 1,88,665 രൂപയുടെ സാമ്പത്തിക നഷ്ടവും ഉണ്ടായതിനെ തുടർന്നാണ് ജീവനക്കാർക്കെതിരെ അച്ചടക്ക നടപടി സ്വീകരിച്ചിട്ടുള്ളത്.
ഗതാഗത മന്ത്രി കെ പി ഗണേഷ് കുമാറിന്റെ പ്രത്യേക നിർദ്ദേശപ്രകാരമാണ് കെഎസ്ആർടിസി ഡിപ്പോകളിലും ബസുകളിലും വിജിലൻസ് പരിശോധന നടത്തിയത്. പത്തനാപുരം ഡിപ്പോയിൽ മദ്യപിച്ച് എത്തിയ രണ്ട് ഡ്രൈവർമാരെ വിജിലൻസ് പ്രത്യേക സ്ക്വാഡ് കസ്റ്റഡിയിലെടുത്തിരുന്നു. പരിശോധനയുടെ വിവരം കിട്ടിയ മറ്റു ഡ്രൈവർമാർ ഇതോടെ മുങ്ങുകയായിരുന്നു.
Discussion about this post