ലോകമെമ്പാടുമുള്ള കോടിക്കണക്കിന് ഉപയോക്താക്കൾ വർഷങ്ങളായി കാത്തിരുന്ന ചരിത്രപരമായ സുരക്ഷാ ഫീച്ചർ ഒടുവിൽ അവതരിപ്പിച്ച് പ്രമുഖ ഇൻസ്റ്റന്റ് മെസ്സേജിങ് ആപ്പായ വാട്സാപ്പ് (WhatsApp). ഇനി മുതൽ ഉപയോക്താക്കൾക്ക് തങ്ങളുടെ വ്യക്തിപരമായ ഫോൺ നമ്പർ വെളിപ്പെടുത്താതെ തന്നെ മറ്റുള്ളവരുമായി വാട്സാപ്പിൽ ബന്ധപ്പെടാൻ സാധിക്കുന്ന ‘യൂസർനെയിം’ (Username) ഫീച്ചറാണ് മെറ്റ ഔദ്യോഗികമായി പ്രഖ്യാപിച്ചിരിക്കുന്നത്. ഈ ആഴ്ച അവസാനം മുതൽ ഉപയോക്താക്കൾക്ക് തങ്ങളുടെ അക്കൗണ്ടുകൾക്കായി തനതായ യൂസർനെയിമുകൾ മുൻകൂട്ടി ബുക്ക് ചെയ്യാനും (Reserve) സാധിക്കും. ഈ വർഷം (2026) അവസാനത്തോടെ ഫീച്ചർ പൂർണ്ണതോതിൽ ആഗോളതലത്തിൽ ലഭ്യമാകുമെന്നാണ് കമ്പനി അറിയിച്ചിരിക്കുന്നത്. പുതിയ മാറ്റം വലിയ രീതിയിലുള്ള സുരക്ഷ ഉറപ്പുനൽകുമെങ്കിലും, ഓൺലൈൻ തട്ടിപ്പുകൾ വർദ്ധിക്കാൻ ഇത് കാരണമായേക്കുമെന്ന കടുത്ത ആശങ്കയിലാണ് സൈബർ വിദഗ്ദ്ധർ.
പരീക്ഷണാടിസ്ഥാനത്തിൽ ചില ഉപയോക്താക്കൾക്ക് ഇപ്പോൾ തന്നെ തങ്ങളുടെ യൂസർനെയിമുകൾ റിസർവ് ചെയ്യാനുള്ള ഓപ്ഷൻ വാട്സാപ്പ് നൽകിയിട്ടുണ്ട്. ഇൻസ്റ്റാഗ്രാം, എക്സ് (X) തുടങ്ങിയ സോഷ്യൽ മീഡിയ പ്ലാറ്റ്‌ഫോമുകൾക്ക് സമാനമായി ആറ്റ് ചിഹ്നം (@) ചേർത്തുകൊണ്ടുള്ള യുണീക് ഹാൻഡിലുകളാണ് ഇതിനായി നൽകുക. ഉദാഹരണത്തിന്, ഒരാൾക്ക് @Name123 എന്ന രീതിയിൽ യൂസർനെയിം തിരഞ്ഞെടുക്കാം. ഇൻസ്റ്റാഗ്രാമിൽ നിലവിൽ ഉപയോഗിക്കുന്ന അതേ യൂസർനെയിം വാട്സാപ്പിലും സ്വന്തമാക്കാൻ അക്കൗണ്ടുകൾ തമ്മിൽ ലിങ്ക് ചെയ്താൽ മതിയാകും. ഇത് വ്യാജ അക്കൗണ്ടുകൾ ഉണ്ടാകാനുള്ള സാധ്യത കുറയ്ക്കുമെന്ന് മെറ്റ വ്യക്തമാക്കുന്നു. റസിഡന്റ്സ് അസോസിയേഷൻ ഗ്രൂപ്പുകൾ, സ്കൂൾ ഗ്രൂപ്പുകൾ, ഓൺലൈൻ ബൈ ആൻഡ് സെൽ പ്ലാറ്റ്‌ഫോമുകൾ എന്നിവയിൽ അപരിചിതർക്ക് മുന്നിൽ ഫോൺ നമ്പർ വെളിപ്പെടുത്താതെ സുരക്ഷിതമായി ഗ്രൂപ്പ് ചാറ്റുകളിൽ പങ്കെടുക്കാൻ ഈ ഫീച്ചർ സഹായിക്കും. നിങ്ങളെ കോൺടാക്റ്റ് ലിസ്റ്റിൽ സേവ് ചെയ്യാത്തവർക്ക് ഫോൺ നമ്പറിന് പകരം നിങ്ങളുടെ യൂസർനെയിം മാത്രമായിരിക്കും കാണാൻ സാധിക്കുക.
മൂന്ന് മുതൽ 35 അക്ഷരങ്ങൾ വരെയുള്ള യൂസർനെയിമുകൾ ഉപയോക്താക്കൾക്ക് തിരഞ്ഞെടുക്കാവുന്നതാണ്. എന്നാൽ വാട്സാപ്പിൽ ആളുകളെ തിരഞ്ഞുപിടിക്കാനുള്ള പബ്ലിക് ഡയറക്ടറി സംവിധാനം ഉണ്ടായിരിക്കില്ല. ഒരാളുടെ കൃത്യമായ യൂസർനെയിം അറിഞ്ഞാൽ മാത്രമേ അവരുമായി ചാറ്റ് ചെയ്യാൻ സാധിക്കൂ. ഇതിനൊപ്പം ഇതിലും വലിയൊരു സുരക്ഷാ കവചമായി ‘യൂസർനെയിം കീ’ (Username Key) എന്നൊരു ഓപ്ഷണൽ ഫീച്ചർ കൂടി വാട്സാപ്പ് അവതരിപ്പിക്കുന്നുണ്ട്. ഇതൊരു ഫോർ ഡിജിറ്റ് (4-digit) കോഡാണ്. ഇത് ആക്ടിവേറ്റ് ചെയ്താൽ, നിങ്ങളുടെ യൂസർനെയിം അറിയാവുന്ന ഒരു അപരിചിതന് നിങ്ങളുമായി ചാറ്റ് ആരംഭിക്കണമെങ്കിൽ ഈ കോഡ് കൂടി കൃത്യമായി രേഖപ്പെടുത്തേണ്ടി വരും. അതുകൊണ്ട് തന്നെ ആർക്കും നിങ്ങളിലേക്ക് അനാവശ്യ സന്ദേശങ്ങൾ അയക്കാൻ കഴിയില്ല.
അതേസമയം, ടെലിഗ്രാം (Telegram) ആപ്പിന് സമാനമായ ഈ പുതിയ മാറ്റം വലിയ സൈബർ ചതിക്കുഴികൾക്ക് കാരണമാകുമെന്നാണ് സാങ്കേതിക വിദഗ്ദ്ധരുടെ മുന്നറിയിപ്പ്. പ്രമുഖ ബാങ്കുകളും ബിസിനസ്സ് സ്ഥാപനങ്ങളും ഉപഭോക്താക്കളുമായി ആശയവിനിമയം നടത്താൻ വാട്സാപ്പിനെ ആശ്രയിക്കുന്ന ഈ കാലത്ത്, ഒരേ പേരിൽ വ്യാജ യൂസർനെയിമുകൾ ഉണ്ടാക്കി ആളുകളെ പറ്റിക്കാൻ തട്ടിപ്പുകാർക്ക് ഇത് എളുപ്പവഴിയൊരുക്കും. വ്യാജ നിക്ഷേപ പദ്ധതികൾ, സാമ്പത്തിക തട്ടിപ്പുകൾ, ഇംപേഴ്സണേഷൻ (മറ്റൊരാളെന്ന വ്യാജേനയുള്ള തട്ടിപ്പുകൾ) എന്നിവ വർദ്ധിച്ചേക്കാം. ഫോൺ നമ്പർ ഇല്ലാത്തതിനാൽ ഇത്തരം ഓൺലൈൻ തട്ടിപ്പുകാരെ കണ്ടെത്തുക പോലീസിനും സൈബർ സെല്ലിനും കടുത്ത വെല്ലുവിളിയാകും. എന്നിരുന്നാലും അക്കൗണ്ട് തുടങ്ങാൻ ഫോൺ നമ്പർ നിർബന്ധമാണെന്നും പൂർണ്ണമായും നമ്പർ ഇല്ലാത്ത അക്കൗണ്ടുകൾ ഉണ്ടാക്കാൻ കഴിയില്ലെന്നും മെറ്റാ വ്യക്തമാക്കിയിട്ടുണ്ട്. പുതിയ ആപ്പ് അപ്ഡേറ്റ് ചെയ്യുന്നതിലൂടെ വാട്സാപ്പ് സെറ്റിങ്സിലെ അക്കൗണ്ട് ഓപ്ഷനിൽ നിന്നും ഉപയോക്താക്കൾക്ക് യൂസർനെയിം റിസർവ് ചെയ്യാം.
