നമുക്ക് വിശക്കുമ്പോൾ ഭക്ഷണം കഴിക്കാനും വയറുനിറയുമ്പോൾ അത് നിർത്താനും തലച്ചോറും ദഹനവ്യവസ്ഥയും കൃത്യമായി സിഗ്നലുകൾ നൽകാറുണ്ട്. എന്നാൽ തലച്ചോറോ വയറോ ഒന്നുമില്ലാത്ത ചെടികൾക്കും തങ്ങളുടെ ‘വയറുനിറഞ്ഞു’ എന്ന് തിരിച്ചറിയാൻ സാധിക്കുമെന്നാണ് ശാസ്ത്രലോകത്ത് നിന്നുള്ള ഏറ്റവും പുതിയ കണ്ടെത്തൽ. മണ്ണിൽ നിന്ന് തങ്ങൾക്ക് ആവശ്യമായ പോഷകങ്ങൾ വലിച്ചെടുത്തു കഴിഞ്ഞാൽ, ഇനി മതി എന്ന് സസ്യങ്ങൾ സ്വയം തീരുമാനിക്കുന്ന ആ അത്ഭുത പ്രതിഭാസത്തിന്റെ രഹസ്യം ചുരുളഴിച്ചിരിക്കുകയാണ് അമേരിക്കയിലെ ന്യൂയോർക്ക് യൂണിവേഴ്സിറ്റിയിലെ (NYU) ഗവേഷകർ. കാർഷിക മേഖലയിലും പരിസ്ഥിതി സംരക്ഷണത്തിലും വലിയ വിപ്ലവങ്ങൾക്ക് വഴിതുറക്കാവുന്ന ഈ കണ്ടെത്തൽ അന്താരാഷ്ട്ര ശാസ്ത്ര മാഗസിനായ ‘ദി പ്ലാന്റ് സെൽ’ (The Plant Cell) ലാണ് പ്രസിദ്ധീകരിച്ചിരിക്കുന്നത്.
ചെടികളുടെ വളർച്ചയ്ക്ക് ഏറ്റവും അത്യാവശ്യമായ പോഷകങ്ങളിലൊന്നാണ് നൈട്രജൻ. മണ്ണിൽ നിന്ന് ആവശ്യത്തിന് നൈട്രജൻ ആഗിരണം ചെയ്ത് കഴിഞ്ഞാൽ ചെടികൾക്ക് ‘വയറുനിറഞ്ഞു’ (Nitrogen Satiety) എന്ന സന്ദേശം നൽകുന്നത് അവയിലടങ്ങിയിരിക്കുന്ന ‘HHO5’ എന്ന സവിശേഷ പ്രോട്ടീൻ ആണെന്ന് ഗവേഷകർ കണ്ടെത്തി. ചെടികൾ മണ്ണിൽ നിന്നുള്ള ഇൻഓർഗാനിക് നൈട്രജനെ തങ്ങളുടെ വളർച്ചയ്ക്കായി ഓർഗാനിക് സംയുക്തങ്ങളാക്കി മാറ്റിക്കഴിഞ്ഞാൽ, ഈ HHO5 പ്രോട്ടീൻ ഉണർന്നുപ്രവർത്തിക്കുകയും മണ്ണിൽ നിന്ന് കൂടുതൽ നൈട്രജൻ വലിച്ചെടുക്കുന്നത് നിർത്താൻ ചെടിയോട് ആവശ്യപ്പെടുകയും ചെയ്യും. ലളിതമായി പറഞ്ഞാൽ ‘ഇനി നൈട്രജൻ വേണ്ട, എന്റെ വയറുനിറഞ്ഞു’ എന്ന് ചെടിക്ക് പറഞ്ഞു കൊടുക്കുന്ന സ്വിച്ച് ആണ് ഈ പ്രോട്ടീൻ.
ഈ കണ്ടെത്തൽ ശരിയാണോ എന്ന് പരീക്ഷിക്കാൻ ശാസ്ത്രജ്ഞർ വിചിത്രമായൊരു പരീക്ഷണം നടത്തി. ജനിതക മാറ്റത്തിലൂടെ HHO5 പ്രോട്ടീൻ ഇല്ലാത്ത ചില സസ്യങ്ങളെ അവർ വികസിപ്പിച്ചെടുത്തു. ഈ ചെടികൾക്ക് തങ്ങളുടെ ‘ഓഫ് സ്വിച്ച്’ നഷ്ടപ്പെട്ടതുപോലെയാണ് പെരുമാറിയത്. സാധാരണ ചെടികളേക്കാൾ മൂന്നിരട്ടി നൈട്രജൻ ആണ് ഇവ മണ്ണിൽ നിന്ന് അമിതമായി വലിച്ചെടുത്തത്. ഇതിലൂടെ HHO5 തന്നെയാണ് ചെടികളുടെ ആഹാരക്രമം നിയന്ത്രിക്കുന്നതെന്ന് പൂർണ്ണമായി തെളിയിക്കപ്പെട്ടു.
നിലവിൽ കർഷകർ വിളവ് കൂട്ടാനായി പാടങ്ങളിൽ വലിയ തോതിൽ രാസവളങ്ങൾ പ്രയോഗിക്കാറുണ്ട്. എന്നാൽ ചെടികൾക്ക് ആവശ്യമായതിന്റെ പകുതിയോളം (50%) മാത്രമേ അവ വലിച്ചെടുക്കുന്നുള്ളൂ. ബാക്കിവരുന്ന വളം നദികളിലേക്കും ജലാശയങ്ങളിലേക്കും ഒലിച്ചിറങ്ങി പായലുകൾ വളരാനും ജലമലിനീകരണത്തിനും കാരണമാകുന്നു. ഒപ്പം അന്തരീക്ഷത്തിലേക്ക് മാരകമായ ഹരിതഗൃഹ വാതകങ്ങൾ പുറന്തള്ളപ്പെടുകയും ചെയ്യുന്നു. ഭാവിയിൽ ഈ HHO5 പ്രോട്ടീന്റെ പ്രവർത്തനം ശാസ്ത്രീയമായി മാറ്റിയെഴുതിയാൽ, കുറഞ്ഞ അളവിൽ മാത്രം രാസവളം ആവശ്യമുള്ള പുതിയ ഇനം വിളകൾ വികസിപ്പിച്ചെടുക്കാൻ സാധിക്കുമെന്ന് ഗവേഷണത്തിന് നേതൃത്വം നൽകിയ പ്രൊഫസർ ഗ്ലോറിയ കോറൂസി പറയുന്നു. ഇത് കർഷകരുടെ കൃഷിച്ചെലവ് വൻതോതിൽ കുറയ്ക്കുന്നതിനൊപ്പം ആഗോള മലിനീകരണത്തിന് വലിയൊരു പരിഹാരവുമാകും.
