ഡൽഹി: കൊവിഡ് മാനദണ്ഡങ്ങൾ കർശനമായി പാലിക്കപ്പെടേണ്ടതാണെന്ന് സംസ്ഥാനങ്ങൾക്ക് നിർദേശം നൽകി കേന്ദ്ര ആഭ്യന്തര മന്ത്രാലയം. പല സംസ്ഥാനങ്ങളും നിയന്ത്രണങ്ങൾ ലംഘിക്കുന്നത് ശ്രദ്ധയിൽ പെട്ടിട്ടുണ്ടെന്നും ഇതിനെതിരെ ശക്തമായ നടപടി സ്വീകരിക്കണമെന്നും കേന്ദ്ര സർക്കാർ ആവശ്യപ്പെട്ടു.
സങ്കീർണതകളിൽ നിന്നും പ്രതിസന്ധികളിൽ നിന്നും നമ്മെ സംരക്ഷിക്കേണ്ടത് നാം തന്നെയാണ്. നിയന്ത്രണങ്ങൾ ലംഘിക്കപ്പെട്ടാൽ ബന്ധപ്പെട്ട ഉദ്യോഗസ്ഥർ ഉത്തരവാദിത്വം ഏൽക്കേണ്ടതാണെന്നും അവർക്കെതിരെ സർക്കാരുകൾ നടപടി സ്വീകരിക്കേണ്ടതാണെന്നും ആഭ്യന്തര മന്ത്രാലയം വ്യക്തമാക്കുന്നു.
സ്ഥാപനങ്ങളിലോ ചുറ്റുവട്ടങ്ങളിലോ ചന്തകളിലോ നിയന്ത്രണങ്ങൾ ലംഘിക്കപ്പെടുകയാണെങ്കിൽ ഉത്തരവാദികൾക്കെതിരെ പകർച്ചവ്യാധി നിയമ പ്രകാരം കേസെടുക്കണം. ഇപ്പോഴും പല സംസ്ഥാനങ്ങളിലും ചന്തകളിലും വ്യാപാര സ്ഥാപനങ്ങളിലും ആൾക്കൂട്ടം പതിവ് കാഴ്ചയാണെന്നും കേന്ദ്ര ആഭ്യന്തര മന്ത്രാലയം ചൂണ്ടിക്കാട്ടുന്നു.
