മോഷണത്തിനിടെ വിശന്നപ്പോൾ കിച്ച്ഡി ഉണ്ടാക്കി; കള്ളൻ പിടിയിൽ

ഗുവാഹത്തി: മോഷ്ടിക്കാൻ കയറിയ വീട്ടിൽ വെച്ച് വിശന്നപ്പോൾ കിച്ച്ഡി ഉണ്ടാക്കിയ കള്ളൻ പിടിയിലായി. അസമിലെ ഗുവാഹത്തിയിലായിരുന്നു സംഭവം.

ആളില്ലാത്ത വീട് നോക്കിയാണ് കള്ളന്‍ മോഷ്ടിക്കാന്‍ കയറിയത്. കവര്‍ച്ചയ്ക്കിടെ വിശന്നതോടെ അടുക്കളയില്‍ കയറി കിച്ച്ഡിയുണ്ടാക്കുകയായിരുന്നു. ഇതിനിടെ വീട്ടിലെ അടുക്കളയില്‍ നിന്ന് സമീപവാസികള്‍ ശബ്ദം കേട്ടു. വീട്ടുകാര്‍ സ്ഥലത്തില്ലെന്ന് അറിയാവുന്ന അയല്‍ക്കാര്‍ ഇതോടെ ഓടി വരികയും മോഷ്ടാവിനെ കൈയോടെ പിടികൂടി പോലീസില്‍ ഏല്‍പ്പിക്കുകയും ചെയ്തു.

സംഭവത്തിൽ അസം പൊലീസ് രസകരമായ ട്വീറ്റ് പങ്ക് വെച്ചു. മോഷ്ടാവിനെ പോലീസ് അറസ്റ്റ് ചെയ്‌തെന്നും ഗുവാഹാട്ടി പോലീസ് അയാള്‍ക്ക് ചൂടുള്ള ഭക്ഷണം വിളമ്പി നല്‍കിയെന്നും ട്വീറ്റിൽ പറയുന്നു. നിരവധി ആരോഗ്യഗുണങ്ങളുണ്ടെങ്കിലും മോഷണത്തിനിടെ കിച്ച്ഡിയുണ്ടാക്കാനുള്ള ശ്രമം ഹാനികരമാകുമെന്നും അസം പൊലീസ് ട്വീറ്റിൽ മുന്നറിയിപ്പ് നൽകുന്നു.

The curious case of a cereal burglar!

Despite its many health benefits, turns out, cooking Khichdi during a burglary attempt can be injurious to your well being.

The burglar has been arrested and @GuwahatiPol is serving him some hot meals. pic.twitter.com/ehLKIgqcZr

— Assam Police (@assampolice) January 11, 2022