ന്യൂഡൽഹി: ഓസ്‌ട്രേലിയയിലെ ഇന്ത്യൻ സമൂഹത്തിന് നേരെ ഖാലിസ്ഥാൻ തീവ്രവാദികൾ നടത്തുന്ന ആക്രമണങ്ങളെ ശക്തമായി അപലപിച്ച് ഇന്ത്യ. സംഭവങ്ങളിൽ കർശന നടപടി വേണമെന്ന് കേന്ദ്രവിദേശകാര്യ മന്ത്രാലയം ആവശ്യപ്പെട്ടു. രണ്ട് ദിവസം മുൻപ് മെൽബണിലെ ഹിന്ദു ക്ഷേത്രത്തിൽ ഖാലിസ്ഥാൻ ഭീകരർ ആക്രമണം നടത്തുകയും, ഇന്ത്യയെ അവഹേളിക്കുന്ന പരാമർശങ്ങൾ എഴുതിവയ്ക്കുകയും ചെയ്തിരുന്നു. ഇതിന്റെ പശ്ചാത്തലത്തിലാണ് കർശന നടപടി വേണമെന്ന് കേന്ദ്രവിദേശകാര്യ മന്ത്രാലയം ആവശ്യപ്പെട്ടത്.
ഇന്ത്യൻ സമൂഹത്തിന് നേരെ തുടർച്ചയായി ഉണ്ടാകുന്ന അക്രമ സംഭവങ്ങളിൽ ഓസ്‌ട്രേലിയൻ സർക്കാരിനോട് ഇന്ത്യ പ്രതിഷേധം അറിയിച്ചതായി കേന്ദ്ര വിദേശകാര്യ വക്താവ് അരിന്ദം ബാഗ്ചി പറഞ്ഞു. സംഭവത്തെ അപലപിച്ച ഓസ്‌ട്രേലിയ കുറ്റക്കാർക്കെതിരെ കർശന നടപടി സ്വീകരിക്കുമെന്ന് അറിയിച്ചിട്ടുണ്ട്. ഖാലിസ്ഥാൻ ഭീകരരരുടെ ഭീഷണിയിൽ നിന്നും ഇന്ത്യൻ സമൂഹത്തിന് സുരക്ഷ നൽകണമെന്ന് ആവശ്യപ്പെട്ടു. ദേശ വിരുദ്ധ ശക്തികളുടെ പ്രവർത്തനങ്ങൾ രാജ്യത്ത് അനുവദിക്കരുതെന്ന് ആവശ്യപ്പെട്ടിട്ടുണ്ടെന്നും അദ്ദേഹം വ്യക്തമാക്കി.
ജനുവരിയിൽ മാത്രം കാനഡയിലെ മൂന്ന് ഹിന്ദു ക്ഷേത്രങ്ങൾക്ക് നേരെയാണ് ആക്രമണം ഉണ്ടായത്. അടുത്ത കാലത്തായി ഇത് ആദ്യമായാണ് ക്ഷേത്രങ്ങൾ തുടർച്ചയായി ആക്രമിക്കപ്പെടുന്നത്. ബ്രാംപ്ട്ടണിലെ ഗൗരി ശങ്കർ ക്ഷേത്രത്തിന് നേരെയായിരുന്നും അവസാനമായി ഖാലിസ്ഥാൻ ഭീകരർ ആക്രമണം നടത്തിയത്. ക്ഷേത്രമതിലുകളിൽ കേടുപാടുകൾ ഉണ്ടാക്കിയ ഭീകരർ ഇന്ത്യാ വിരുദ്ധ മുദ്രാവാക്യങ്ങളും എഴുതിവയ്ക്കുകയായിരുന്നു.
