കൊച്ചി: മാദ്ധ്യമപ്രവർത്തകൻ അമൽ കാനത്തൂർ എഴുതിയ ‘വടക്കന്റെ മനസ്സ്’ എന്ന പുസ്തകം പ്രകാശനം ചെയ്തു. തൃപ്പൂണിത്തുറയിൽ നടന്ന ചടങ്ങിൽ എംഎൽഎ ഉമ തോമസ്, സിസ്റ്റർ ലൂസി കളപ്പുര, എൻഎം പിയേഴ്‌സൺ, ഇ.എൻ നന്ദകുമാർ തുടങ്ങിയവർ പങ്കെടുത്തു.
തെയ്യങ്ങളെക്കുറിച്ച് അധികം പറഞ്ഞുകേൾക്കാത്ത കഥകളിലേക്കും ചരിത്രത്തിലേക്കും വെളിച്ചം വീശുന്നതാണ് വടക്കന്റെ മനസ്. പഴയ തലമുറയിൽ നിന്ന് വാമൊഴിയിലൂടെ ലഭിച്ച വിവരങ്ങൾ കോർത്തിണക്കിയ പുസ്തകം പുതുതലമുറയ്ക്ക് ഒരു കാലഘട്ടത്തെക്കുറിച്ചുളള അറിവുകൾ കൂടിയാണ് നൽകുന്നത്.
ജീവൻ തുടിക്കുന്ന തെയ്യക്കോലങ്ങളുടെ ചിത്രങ്ങളും പുസ്തകത്തെ വേറിട്ട് നിർത്തുന്നു. തെയ്യക്കോലങ്ങളുടെ ചമയവും മുഖത്തെഴുത്തും അണിയലങ്ങളുമൊക്കെ ചിത്രങ്ങളിലൂടെ വായനക്കാർക്ക് അടുത്തറിയാം. ഓരോ തെയ്യക്കോലങ്ങളുടെയും മെയ്യെഴുത്തും വേഷവിധാനങ്ങളും അവയുടെ പ്രാധാന്യവും ഉൾപ്പെടെ സൂചിപ്പിക്കുന്ന പുസ്തകം വായനക്കാർക്ക് പുതിയ അറിവും അനുഭൂതിയുമാണ് നൽകുന്നത്.
കൈപ്പട പബ്ലിഷിംഗ് ഗ്രൂപ്പ് ആണ് പുസ്തകം പുറത്തിറക്കിയത്. തെയ്യത്തെക്കുറിച്ച് നിരവധി പഠനങ്ങൾ പൂർത്തിയാക്കുകയും ടാഗോർ നാഷണൽ റിസർച്ച് സ്‌കോളർഷിപ്പിന് വരെ അർഹനാകുകയും ചെയ്ത മുതിർന്ന മാദ്ധ്യമപ്രവർത്തകൻ യു.പി സന്തോഷ് ആണ് പുസ്തകത്തിന് അവതാരിക എഴുതിയിരിക്കുന്നത്. കണ്ണൂർ കാനത്തൂർ സ്വദേശിയായ അമൽ ജനം ടിവിയിൽ വിഷ്വൽ എഡിറ്ററും ക്യാമറാമാനുമായിരുന്നു. നിലവിൽ ബ്രേവ് ഇന്ത്യ ന്യൂസിനൊപ്പം കൊച്ചിയിലാണ് പ്രവർത്തനമേഖല. അമലിന്റേതുൾപ്പെടെ 13 പുസ്തകങ്ങളാണ് ചടങ്ങിൽ പ്രകാശനം ചെയ്തത്.
നേരത്തെ പുസ്തകത്തിന്റെ കവർ പ്രകാശനത്തിന് സമൂഹമാദ്ധ്യമങ്ങളിൽ വലിയ പ്രതികരണമാണ് ലഭിച്ചത്. നടൻ ഉണ്ണി മുകുന്ദൻ അടക്കം ആശംസകളുമായി രംഗത്തെത്തിയിരുന്നു.
