ചെന്നൈ: തമിഴ്നാട്ടിൽ അവശ്യത്തിന് ഡോക്ടർമാരോ സംവിധാനങ്ങളോ ലൈസൻസോ ഇല്ലാതെ പ്രവർത്തിച്ചിരുന്ന ജീവകാരുണ്യ സ്ഥാപനത്തിന്റെ നടത്തിപ്പുകാരനയ മലയാളിയും ഭാര്യയും അറസ്റ്റിൽ. അൻപ് ജ്യോതി ആശ്രമം എന്ന സ്ഥാപനം നടത്തിയിരുന്ന മലയാളിയായ ജുബിൻ ബേബിയും ഭാര്യ മരിയയുമാണ് അറസ്റ്റിലായത്. ലൈംഗിക പീഡനം നടത്തിയതിനും അന്തേവാസികളെ ഉപദ്രവിച്ചതിനുമാണ് അറസ്റ്റ്.
വർഷങ്ങളായി സംസ്ഥാനത്ത് പ്രവർത്തിച്ചിരുന്ന സ്ഥാപനത്തിലെ കൊള്ളരുതായ്മകൾക്കെതിരെ പല തവണ പരാതി നൽകിയിട്ടും സർക്കാരോ പോലീസോ ആവശ്യമായ നടപടികൾ എടുത്തിരുന്നില്ല. വില്ലുപുരത്തായിരുന്നു സ്ഥാപനം പ്രവർത്തിച്ചിരുന്നത്.
2021 ഡിസംബറിൽ സ്ഥാപനത്തിൽ പ്രവേശിപ്പിച്ച ജവഹറുള്ള എന്നയാളെ കാണാതായതിനെ തുടർന്ന് മരുമകൻ സലീം ഖാൻ നടത്തിയ അന്വേഷണമാണ് കേസിൽ വഴിത്തിരിവായത്. ജവഹറുള്ള തങ്ങളുടെ ബാംഗ്ലൂരിലുള്ള സ്ഥാപനത്തിലാണ് എന്നാണ് അമേരിക്കയിലുള്ള സലീം ഖാനെ അൻപ് ജ്യോതി അധികൃതർ അറിയിച്ചിരുന്നത്. എന്നാൽ ബാംഗ്ലൂരിൽ അന്വേഷിച്ചപ്പോൾ സലീം ഖാന് ഒരു വിവരവും ലഭിച്ചില്ല. തുടർന്ന് അദ്ദേഹം മദ്രാസ് ഹൈക്കോടതിയെ സമീപിക്കുകയായിരുന്നു.
പോലീസ് ബാംഗ്ലൂരിലെ സ്ഥാപനത്തിൽ പരിശോധനക്ക് എത്തുമ്പോൾ അവിടെ 15 അന്തേവാസികളാണ് ഉണ്ടായിരുന്നത്. വില്ലുപുരത്ത് നിന്നും 15 പേരെ സ്വീകരിച്ചതിന്റെ രേഖകൾ ബാംഗ്ലൂരിൽ ഉണ്ടായിരുന്നു. എന്നാൽ ഇവർ 15 പേരും ജനാല തകർത്ത് ചാടിപ്പോയി എന്ന വിചിത്ര വിശദീകരണമാണ് അധികൃതർ നൽകിയത്.
അൻപ് ജ്യോതിയിൽ നിന്നും രക്ഷപ്പെട്ട് റെസ്ക്യൂ ഗ്രൂപ്പിന്റെ കൈയിൽ എത്തിയ ഒഡിഷ സ്വദേശിനിയായ പെൺകുട്ടി പറഞ്ഞത്, താൻ സ്ഥാപനത്തിൽ തുടർച്ചയായ ലൈംഗിക പീഡനങ്ങൾക്ക് ഇരയായിരുന്നു എന്നാണ്. എതിർത്തപ്പോൾ ഉടമ കൂട്ടിലിട്ട് വളർത്തിയിരുന്ന രണ്ട് ഭീകരന്മാരായ കുരങ്ങുകളെ തന്റെ ദേഹത്തേക്ക് എടുത്തിട്ടെന്നും പെൺകുട്ടി മൊഴി നൽകി.
തുടർന്നാണ് ജുബിൻ ബേബി, മരിയ എന്നിവരുൾപ്പെടെ 8 പേർ അറസ്റ്റിലായത്. 2005 മുതൽ യാതൊരു രേഖകളും ഇല്ലാതെയാണ് സ്ഥാപനം പ്രവർത്തിച്ച് വന്നിരുന്നതെന്നും പോലീസ് കണ്ടെത്തി. സ്ഥപനം നിൽക്കുന്ന ഒറ്റപ്പെട്ട കുന്നിന് സമീപം നിരവധി മൃതദേഹങ്ങൾ സംസ്കരിച്ചതിന്റെ സൂചനയും പോലീസിന് ലഭിച്ചു.
സ്ഥാപനത്തിന്റെ വിവിധ കേന്ദ്രങ്ങളിൽ നിന്നായി സ്ത്രീകളും കുട്ടികളും ഉൾപ്പെടെ 165 പേരെ പോലീസ് രക്ഷപ്പെടുത്തി. അന്തേവാസികളുടെ ആരോഗ്യ വിവരങ്ങൾ ദുരുപയോഗം ചെയ്ത് സ്ഥാപന ഉടമകൾ മനോരോഗത്തിനുള്ള മരുന്നുകൾ അനധികൃതമായി ശേഖരിച്ചിരുന്നതായും കണ്ടെത്തി. ഈ മരുന്നുകൾ നൽകി മയക്കിയായിരുന്നു പല സ്ത്രീകളെയും രാത്രി പീഡനങ്ങൾക്ക് ഇരകളാക്കിയിരുന്നത് എന്നും കണ്ടെത്തിയിട്ടുണ്ട്.
