ന്യൂഡൽഹി : 2024 ലെ തിരഞ്ഞെടുപ്പിൽ കോൺഗ്രസിന് ബിജെപിയെ പരാജയപ്പെടുത്താനാകുമോ എന്നതാണ് ഇപ്പോൾ രാഷ്ട്രീയ രംഗത്ത് ഉയർന്നുകേൾക്കുന്ന ചോദ്യം. പ്രധാനമന്ത്രി നരേന്ദ്ര മോദിയെ പരാജയപ്പെടുത്താൻ രാഹുൽ ഗാന്ധി മത്സരിക്കുമോ എന്നും മത്സരിച്ചാൽ രാഹുലിന് വിജയിക്കാനാകുമോ എന്നുമുള്ള സംശയങ്ങൾ കോൺഗ്രസ് പ്രവർത്തകർക്കിടയിൽ തന്നെ നിലനിൽക്കുന്നുണ്ട്. പ്രതിപക്ഷ ഐക്യത്തിലൂടെ 2024 ലെ തിരഞ്ഞെടുപ്പിൽ അധികാരം പിടിച്ചെടുക്കുമെന്ന് നേതാക്കൾ വീരവാദം മുഴക്കുന്നുണ്ടെങ്കിലും കോൺഗ്രസിനുള്ളിൽ അക്കാര്യത്തിലും അഭിപ്രായവ്യത്യാസങ്ങളുണ്ട്. ഇപ്പോഴിതാ പ്രമുഖ മാദ്ധ്യമപ്രവർത്തകൻ രാജ്ദീപ് സർദേശായിയുടേത് എന്ന പേരിൽ സമൂഹമാദ്ധ്യമങ്ങളിൽ ഒരു വീഡിയോ വൈറലാവുകയാണ്. 2024 ലെ തിരഞ്ഞെടുപ്പുമായി ബന്ധപ്പെട്ട വിഷയങ്ങളാണ് വീഡിയോയിൽ പറയുന്നത്.
2024 ലെ തിരഞ്ഞെടുപ്പിൽ ആര് വിജയിക്കുമെന്ന വിഷയവുമായി ബന്ധപ്പെട്ട് താൻ കോൺഗ്രസ് നേതാക്കളുമായി സംസാരിച്ചുവെന്നും അവർ മുൻകൂട്ടി തന്നെ പരാജയം സമ്മതിച്ചുവെന്നുമാണ് വീഡിയോയിൽ പറയുന്നത്. 2029 ലേക്ക് തയാറെടുത്താൽ മതിയെന്നാണ് മിക്ക നേതാക്കളും അഭിപ്രായപ്പെടുന്നതെന്നും സർദേശായിയുടേത് എന്ന പേരിൽ പ്രചരിക്കുന്ന വീഡിയോയിൽ പറയുന്നു.
ഞാൻ സംസാരിച്ച കോൺഗ്രസ് നേതാക്കളാകട്ടെ കോൺഗ്രസ് ഇതര പ്രതിപക്ഷ പാർട്ടികളാകട്ടെ 2024 ൽ നടക്കാൻ പോകുന്ന തെരഞ്ഞെടുപ്പിൽ മുൻകൂറായി പരാജയം സമ്മതിച്ചിരിക്കുകയാണ് ഒന്നോ രണ്ടോ പേരൊഴിച്ചു എല്ലാവരും പറയുന്നതു ഇനി 2029 ലേക്ക് തയാറെടുത്താൽ മതിയെന്നാണ്
രാജ്ദീപ് സർദേശായി #Modi2024 pic.twitter.com/l10JVJRuoh
— JOTHISH NAIR (Modi Ka Parivar) (@jothishnair1010) February 23, 2023
”ഞാൻ സംസാരിച്ച കോൺഗ്രസ് നേതാക്കളാകട്ടെ കോൺഗ്രസ് ഇതര പ്രതിപക്ഷ പാർട്ടികളാകട്ടെ, 2024 ൽ നടക്കാൻ പോകുന്ന തെരഞ്ഞെടുപ്പിൽ മുൻകൂറായി പരാജയം സമ്മതിച്ചിരിക്കുകയാണ്. ഒന്നോ രണ്ടോ പേരൊഴിച്ചു എല്ലാവരും പറയുന്നത് ഇനി 2029 ലേക്ക് തയാറെടുത്താൽ മതിയെന്നാണ്.” ഇതാണ് വീഡിയോയിൽ ഉള്ളത്. എന്നാൽ വീഡിയോ രാജ്ദീപ് സർദേശായിയുടേത് ആണോയെന്ന കാര്യത്തിൽ സ്ഥിരീകരണമൊന്നുമില്ല.
