ചില സ്ഥലങ്ങളില്‍ ചെന്നാല്‍ എന്തെന്നില്ലാത്ത ഒരു സന്തോഷം തോന്നാറില്ലേ. ചില വസ്തുക്കള്‍ കാണുമ്പോഴോ ചില ചിത്രങ്ങള്‍ കാണുമ്പോഴോ ഒക്കെ മനസ് നിറഞ്ഞ, പോസിറ്റീവ് ആയ അനുഭൂതി ഉണ്ടാകാറില്ലേ. നമുക്ക് ചുറ്റുമുള്ള വസ്തുക്കള്‍ നമ്മുടെ ചിന്തയെയും മനസ്സിനെയുമെല്ലാം സ്വാധീനിക്കുന്നുണ്ട്. ഒരോ വസ്തുവിനും അതിന്റേതായ ഊര്‍ജ്ജമുണ്ടെന്നാണ് പറയപ്പെടുന്നത്. നാം ജീവിക്കുന്ന ചുറ്റുപാട് കൂടിയാണ് നമ്മള്‍. നമ്മുടെ ചിന്തകള്‍, നമ്മോടൊപ്പമുള്ള മനുഷ്യര്‍, വസ്തുക്കള്‍, പ്രകൃതി ഇവയെല്ലാം കൂടിച്ചേരുമ്പോഴാണ് നമ്മുടെ അസ്തിത്വം പൂര്‍ണ്ണമാകുന്നത്.
കാലം മുന്നോട്ടുപോകുന്നതിനനുസരിച്ച് മനുഷ്യരുടെ ജീവിതം കൂടുതല്‍ യാന്ത്രികമായി മാറിക്കൊണ്ടിരിക്കുകയാണ്. മനുഷ്യരേക്കാള്‍ കൂടുതല്‍ യന്ത്രങ്ങളാണ് ഇന്ന് നമുക്ക് ചുറ്റുമുള്ളത്. നമ്മുടെ ജീവിതത്തില്‍ അവയുടെ സ്വാധീനവും വളരെ വലുതാണ്. തിരക്ക് പിടിച്ച ജീവിതത്തിന്റെയും ജോലിയുടെയും ഒഴുക്കില്‍ മുന്നോട്ട് നീങ്ങുന്നവരാണ് പലരും. ഇത്തരമൊരു ചുറ്റുപാടില്‍ പലപ്പോഴും പോസിറ്റിവിറ്റി കണ്ടെത്തുക വളരെ പാടാണ്.
ഓഫീസും വീടും പോലെ എപ്പോഴും ഒരേ ചുറ്റുപാടുകളില്‍ ജീവിതം മുന്നോട്ടുപോകുന്നവര്‍ക്ക് അവിടം പോസിറ്റിവിറ്റിയാല്‍ നിറയ്ക്കാന്‍ ഏറ്റവും മികച്ച ഉപാധിയാണ് കല. കല ഒരു വീടിനെ മാനവീയമാക്കുന്നവെന്ന് പറയുന്നതില്‍ ഒരു തെറ്റുമില്ല. വീട്ടിലോ നിങ്ങള്‍ സമയം ചിലവഴിക്കുന്ന മറ്റേതൊരിടത്തോ മികച്ച കലാസൃഷ്ടികള്‍ ഉണ്ടെങ്കില്‍ നിങ്ങള്‍ കൂടുതല്‍ പോസിറ്റീവ് ആകും.
അകത്തളങ്ങളെ മനോഹരമാക്കാനും ഒപ്പം മനസിന് സന്തോഷം പകരാനും പെയിന്റിംഗുകള്‍ വളരെ നല്ലതാണ്. ചില പെയിന്റിംഗുകള്‍ക്ക് മനുഷ്യരെ ഊര്‍ജ്ജസ്വലരാക്കാന്‍ കഴിവുണ്ടെന്നാണ് വാസ്തുശാസ്ത്രം പറയുന്നത്. അത്തരത്തില്‍ ചുറ്റുപാടുകളില്‍ പോസിറ്റിവിറ്റി വാരിവിതറാന്‍ വാസ്തുശാസ്ത്രം നിര്‍ദ്ദേശിക്കുന്ന ചില പെയിന്റിംഗുകള്‍ നോക്കാം.
കുതിരകളുടെ പെയിന്റിംഗുകള്‍
വാസ്തുശാസ്ത്രം അനുസരിച്ച് കുതിരകള്‍ ഐശ്വര്യത്തിന്റെ പ്രതീകമാണ്. സ്ഥൈര്യം, ധീരത, ശക്തി, വിശ്വസ്തത എന്നിവയുടെ പ്രതീകമാണ് കുതിര. ഓടുന്ന കുതിരകളുടെ പെയിന്റിംഗ് വീടിന്റെയോ ഓഫീസിന്റെയോ തെക്ക് ദിശയില്‍ വെക്കുന്നത് അവിടെ വസിക്കുന്നവരുടെ ജീവിതത്തെ പോസിറ്റീവ് ആയി സ്വാധീനിക്കുമെന്നാണ് പറയപ്പെടുന്നത്. ഓടുന്ന കുതിരകള്‍ ജീവിതത്തിന്റെ വേഗതയും വ്യാപ്തിയും പ്രതിനിധാനം ചെയ്യുന്നു.
പൂക്കളുടെ ചിത്രങ്ങള്‍
പൂക്കളുടെ ചിത്രങ്ങളും വാസ്തുശാസ്ത്ര പ്രകാരം പോസിറ്റിവിറ്റിക്കായി അകത്തളങ്ങളില്‍ വെക്കാന്‍ മികച്ച ഒന്നാണ്. പൂക്കള്‍ ജീവിതത്തോട് കൂടുതല്‍ ആകര്‍ഷീയത ഉണ്ടാക്കുന്നു. താമസിക്കുന്ന ഇടത്തിന്റെ മൂഡ് പോലും മാറ്റാന്‍ പൂക്കള്‍ക്ക് സാധിക്കും. വാസ്തുശാസ്ത്രം അനുസരിച്ച് ആമ്പല്‍പ്പൂക്കള്‍ സന്തോഷത്തിന്റെയും ഒരുമയുടെയും സമാധാനത്തിന്റെയും പ്രതീകമാണ്. കിടപ്പുമുറികള്‍ ഇവ വെച്ചാല്‍ നല്ല ഉറക്കം ലഭിക്കുമെന്ന് പറയപ്പെടുന്നു.
കാളയുടെ ചിത്രങ്ങള്‍
ശക്തിയുടെയും അധികാരത്തിന്റെയും വേഗതയുടെയും ശുഭപ്രതീക്ഷയുടെയുമെല്ലാം പ്രതീകമാണ് കാള. ഓഫീസുകളില്‍ പ്രത്യേകിച്ച് കാളയുടെ പെയിന്റിംഗുകള്‍ വെക്കുന്നത് വിജയവും ഐശ്വര്യവും കൊണ്ടുവരുമെന്നും നെഗറ്റീവ് ചിന്തകളെ അകറ്റുമെന്നുമാണ് വിശ്വാസം.
കാമധേനു പെയിന്റിംഗുകള്‍
ആഗ്രഹിക്കുന്നതെന്തും നല്‍കാന്‍ കഴിവുള്ള ദിവ്യപശുവാണ് കാമധേനു എന്നാണ് ഹിന്ദുമത വിശ്വാസം. ഭാരതീയ ഗൃഹങ്ങളില്‍ പണ്ടുകാലം മുതല്‍ക്കേ കമാധേനു വിഗ്രഹമോ ചിത്രങ്ങളോ സൂക്ഷിക്കാറുണ്ട്. വടക്ക്-കിഴക്ക് ദിശയില്‍ കാമധേനു ചിത്രമോ വിഗ്രഹമോ വെച്ചാല്‍ അത് സമ്പത്തും സന്തോഷവും കൊണ്ടുവരുമെന്നാണ് വിശ്വാസം.
കല്‍പ്പവൃക്ഷം
കല്‍പ്പവൃക്ഷം അഥവാ ജീവിതവൃക്ഷം ദൈവികമായ അന്തരീക്ഷമുണ്ടാക്കും. പരിശുദ്ധി, ഫലസമൃദ്ധി എന്നിവയുടെയും പ്രതീകമാണ് കല്‍പ്പവൃക്ഷം. വീട്ടിലെ സ്വീകരണമുറിയിലായാലും ഓഫീസിലായാലും വ്യാപാരസ്ഥാപനങ്ങളില്‍ ആയാലും വടക്ക് കിഴക്ക് ദിശയില്‍ കല്‍പ്പവൃക്ഷത്തിന്റെ പെയിന്റിംഗ് സ്ഥാപിക്കുന്നത് അവിടെയുള്ളവര്‍ക്ക് ഉന്മേഷം നല്‍കും. മാത്രമല്ല ആധ്യാത്മികമായ അന്തരീക്ഷവും കല്‍പ്പവൃക്ഷത്തിന്റെ കാഴ്ച നല്‍കും.
