അയ്യോ പാമ്പ്… പാമ്പിനെ കണ്ട നിമിഷം തന്നെ നമ്മൾ ഈ കൂവിവിളിക്കുന്നതിന്റെ കാരണെന്താണ്? അവയുടെ വിഷം തന്നെ, ല്ലേ.. കരയിലും കടയിലുമായി നൂറുകണക്കിന് ഇനം പാമ്പുകളാണ് ഇങ്ങനെ നമ്മളെ പേടിപ്പിച്ച് വിലസുന്നത്. പാമ്പുകളിൽ വിഷം ഉള്ളതും ഇല്ലാത്തതുമായ ഒട്ടേറെ ഇനങ്ങൾ ഉണ്ടെങ്കിലും പാമ്പ് പാമ്പാവണമെങ്കിൽ വിഷം ഉണ്ടാവണമെന്നാണ് പലരുടെയും അഭിപ്രായം. അങ്ങനെയെങ്കിൽ ഒരു ചോദ്യം. ലോകത്ത് ഏറ്റവും വിഷമുള്ള പാമ്പ് ഏതാണ്? അനാക്കോണ്ടയും മൂർഖനുമാണ് മനസിൽ വരുന്ന ഉത്തരമെങ്കിൽ തെറ്റി. ആളൊരു വിദേശിയാണ്.. കാണാൻ അത്ര ഭീകരലുക്കില്ലെങ്കിലും അപകടകാരിയായ ഇൻലാൻഡ് തായ്പാൻ ആണ് ആ പാമ്പ്.
ഓസ്ട്രേലിയൻ സ്വദേശിയായ ഇൻലാൻഡ് തായ്പാന്റെ ഒറ്റക്കടിയിലൂടെ പുറത്തുവരുന്ന വിഷത്തിന് ഏകദേശം നൂറ് പേരുടെ ജീവനെടുക്കാൻ സാധിക്കുമത്രെ.! മനുഷ്യന്റെ കാര്യം ഇങ്ങനെയെങ്കിൽ മറ്റ് ജീവികളുടെ കാര്യം ആലോചിച്ച് നോക്കൂ. 250,000ത്തോളം എലികളെ ഇത്രയും മാത്രം വിഷത്തിന് കൊല്ലാനാകും. ഒറ്റയടിക്ക് തന്നെ 110 മില്ലിഗ്രാം വിഷമാണ് പുറത്തുവരുന്നത്. ഉടനെ ചികിത്സ കിട്ടിയില്ലെങ്കിൽ 30-45 മിനിറ്റുകൾക്കുള്ളിൽ തന്നെ രോഗി മരിക്കും.
ഇത്രയ്ക്കും ഭീകരനാണെങ്കിലും ഇൻലാൻഡ് തായ്പാനുകൾ പൊതുവെ ആരുടെയും ശല്യമില്ലാതെ മനുഷ്യവാസമില്ലാത്ത വിജനമായ പ്രദേശങ്ങളിൽ ജീവിക്കാൻ ഇഷ്ടപ്പെടുന്നവയാണ്. മാത്രമല്ല പ്രകോപനങ്ങളിൽ നിന്ന് പരമാവധി ഒഴിഞ്ഞുമാറാൻ ഇവ ശ്രമിക്കുന്നു. എന്നാൽ തങ്ങളുടെ ജീവന് ഭീഷണിയെന്ന് കണ്ടാൽ ഇവയും ആക്രമിക്കും. ഇവ മനുഷ്യരുടെ മുന്നിൽപ്പെടുന്നതും അപൂർവമാണ്. അത് കൊണ്ടു തന്നെ ഇവയെ മനുഷ്യർക്ക് ഏറ്റവും അപകടകരം ആയ പാമ്പുകളിൽ ഒന്നായി കണക്കാക്കുന്നില്ല.
ചതുരാകൃതിയിലുള്ള തലയാണ് ഇവയ്ക്ക്. 5 അടി മുതൽ 8 അടി വരെ നീളം കാണപ്പെടുന്നു ഇവയ്ക്ക്. പുലർച്ചെയാണ് ഇവ കൂടുതലും പുറത്തിറങ്ങുന്നത്. മണ്ണിൽ ആഴത്തിലുള്ള വിണ്ണലുകളും ജീവികളുടെ മാളങ്ങളുമൊക്കെ ഇവയക്ക് പ്രിയപ്പെട്ട ഇടങ്ങളാണ്. ഓസ്‌ട്രേലിയക്ക് പുറത്ത് ഇൻലാൻഡ് തായ്പെനുകൾ അത്ര സുപരിചിതർ അല്ല.
