ഇടുക്കി: അരിക്കൊമ്പൻ കമ്പം ടൗണിൽ. ഇന്ന് രാവിലെയോടെ കമ്പത്തെ ജനവാസമേഖലയിൽ എത്തി. ലോവർ ക്യാമ്പിൽ നിന്നും വനാതിർത്തിയിലൂടെ എത്തിയതാണെന്നാണ് നിഗമനം. പ്രദേശത്തെ ജനങ്ങളെല്ലാം കടുത്ത പരിഭ്രാന്തിയിലാണെന്ന് അധികൃതർ പറയുന്നു. ജനവാസമേഖലയിൽ തന്നെയാണ് ആന നിലവിൽ നിലയുറപ്പിച്ചിരിക്കുന്നത്. സ്ഥലത്തേക്ക് വനംവകുപ്പ് ഉദ്യോഗസ്ഥരടക്കം എത്തിയിട്ടുണ്ട്.
ഇന്നലെ രാത്രിയോടെ തമിഴ്‌നാട്ടിലെ ലോവർ ക്യാമ്പിനും ഗൂഡല്ലൂരിനും ഇടയിലുള്ള വനമേഖലയിലാണ് ആന ഉണ്ടായിരുന്നത്. ഇന്ന് രാവിലെ ആനയുടെ കഴുത്തിൽ ഘടിപ്പിച്ച റേഡിയോ കോളറിൽ നിന്നുള്ള സിഗ്നലുകൾ ലഭിക്കുന്നത് നഷ്ടമായിരുന്നു. പിന്നാലെയാണ് ആന കമ്പത്തെ ജനവാസമേഖലയിൽ എത്തിയെന്ന് മനസിലാകുന്നത്.
പ്രദേശത്തെ റോഡിലൂടെ നടന്ന് വരുന്നതിനിടെയാണ് ആളുകൾ ആനയെ കാണുന്നത്. ആളുകൾ ബഹളം വച്ചതോടെ ഇവിടെ തൊട്ടടുത്തുള്ള പുളിമരങ്ങളുടെ ഇടയിലേക്കാണ് ആന ഓടിക്കയറിയിരിക്കുന്നത്. ഉടൻ തന്നെ കൂടുതൽ വനംവകുപ്പ് ഉദ്യോഗസ്ഥരടക്കം സ്ഥലത്തെത്തും. പ്രദേശത്ത് നിന്ന് ആനയെ തുരത്താനുള്ള ശ്രമങ്ങളാണ് നിലവിൽ നടക്കുന്നത്.
