ന്യൂഡൽഹി : പ്രധാനമന്ത്രി നരേന്ദ്ര മോദിയെ നേപ്പാളിലേക്ക് ക്ഷണിച്ച് പ്രചണ്ഡ. നരേന്ദ്ര മോദി രാജ്യത്ത് ഔദ്യോഗിക സന്ദർശനം നടത്തുമെന്ന് പ്രതീക്ഷിക്കുന്നതായി നേപ്പാൾ പ്രധാനമന്ത്രി പുഷ്പ കമൽ ദഹൽ പറഞ്ഞു.
”നേപ്പാൾ സന്ദർശനത്തിനായി മോദിജിയെ ഞാൻ സ്‌നേഹപൂർവ്വം ക്ഷണിച്ചിട്ടുണ്ട്. ഉടൻ തന്നെ അദ്ദേഹം നേപ്പാളിലേക്ക് എത്തുമെന്ന് പ്രതീക്ഷിക്കുന്നു,” ഡൽഹിയിലെ ഹൈദരാബാദ് ഹൗസിൽ സംയുക്ത വാർത്താ സമ്മേളനത്തിൽ പ്രചണ്ഡ പറഞ്ഞു.
ഇന്ത്യയും നേപ്പാളും തമ്മിൽ ഏറെ കാലമായി ബന്ധമുണ്ടെന്ന് മോദിയുമായുള്ള കൂടിക്കാഴ്ചയ്ക്ക് ശേഷം ദഹൽ പറഞ്ഞു. നരേന്ദ്ര മോദിയുടെ നേതൃത്വത്തിൽ ഇന്ത്യയുടെ സമ്പദ്വ്യവസ്ഥയുടെയും രാഷ്ട്രീയ സാഹചര്യവും വികസിക്കുകയാണ്. ഇതിൽ നേപ്പാൾ സന്തുഷ്ടരാണ്.
‘നേപ്പാൾ പ്രധാനമന്ത്രിയായി ഇത് എന്റെ നാലാമത്തെ ഇന്ത്യാ സന്ദർശനമാണ്. 2018 സെപ്റ്റംബറിലും, 2016 സെപ്റ്റംബറിലും ഒക്ടോബറിലുമായി രണ്ട് തവണയും ഇന്ത്യയിലേക്ക് ഞാൻ നടത്തിയ സന്ദർശനം ഇന്നും ഓർക്കുന്നു. പ്രധാനമന്ത്രി നരേന്ദ്ര മോദിയുടെ സമർത്ഥമായ നേതൃത്വത്തിന് കീഴിൽ ഇന്ത്യയുടെ സമ്പദ്വ്യവസ്ഥയുടെയും രാഷ്ട്രീയ സാഹചര്യങ്ങളുടെയും ശ്രദ്ധേയമായ പരിവർത്തനം കാണുന്നതിൽ ഞങ്ങൾക്ക് സന്തോഷമുണ്ട്” ദഹൽ പറഞ്ഞു.
‘നിരവധി നേട്ടങ്ങൾ സ്വന്തമാക്കിക്കൊണ്ട് ബിജെപി സർക്കാർ ഒമ്പത് വർഷം പൂർത്തിയാക്കിയതിന് പ്രധാനമന്ത്രി മോദിയെ അഭിനന്ദിക്കുന്നു. ഇന്ത്യയും നേപ്പാളും തമ്മിലുള്ള ബന്ധം എത്രയോ പഴക്കമുള്ളതാണ്. ഈ ബന്ധങ്ങൾ നിർമ്മിതമായത് സാംസ്‌കാരിക സാമൂഹിക-സാമ്പത്തിക ബന്ധത്തിന്റെ സമ്പന്നമായ പാരമ്പര്യത്തിലൂടെയും, സമത്വം, പരസ്പര ബഹുമാനം, ധാരണ, സഹകരണം എന്നിവയിലൂടെയുമാണ്, ”ദഹൽ കൂട്ടിച്ചേർത്തു.
ഇന്ത്യ-നേപ്പാൾ ബന്ധത്തിലെ പുരോഗതിയെക്കുറിച്ച് താനും മോദിയും വിപുലമായ അവലോകനം നടത്തിയെന്നും ഇന്ത്യയുടെ ‘അയൽ രാജ്യം ആദ്യം’ എന്ന നയത്തെ അഭിനന്ദിക്കുന്നതായും അദ്ദേഹം വ്യക്തമാക്കി. വ്യാപാരം, ഗതാഗതം, നിക്ഷേപം, ജലവൈദ്യുത വികസനം, വൈദ്യുതി, വ്യാപാരം, ജലസേചനം, കൃഷി, കണക്റ്റിവിറ്റി, റെയിൽവേ, പാലം, ട്രാൻസ്മിഷൻ ലൈൻ, പെട്രോളിയം പൈപ്പ് ലൈൻ വിപുലീകരണം തുടങ്ങി വിവിധ മേഖലകളിലെ സഹകരണം കൂടുതൽ ശക്തിപ്പെടുത്തുന്നതിനുള്ള മാർഗങ്ങൾ യോഗത്തിൽ ചർച്ച ചെയ്തു’ ദഹൽ പറഞ്ഞു.
താനും പ്രധാനമന്ത്രിയും അതിർത്തി വിഷയം ചർച്ച ചെയ്തതായും ഇന്റർനാഷണൽ സോളാർ അലയൻസിന്റെ ഇന്ത്യയുടെ മൾട്ടിലാറ്ററൽ പരിപാടിയിൽ ചേരുന്നതിൽ നേപ്പാളിന് സന്തോഷമുണ്ടെന്ന് അദ്ദേഹം പറഞ്ഞു.
”ഉഭയകക്ഷി നയതന്ത്ര സംവിധാനത്തിലൂടെ അതിർത്തി പ്രശ്‌നം പരിഹരിക്കാൻ ഞാൻ പ്രധാനമന്ത്രിയോട് അഭ്യർത്ഥിച്ചു. ജി 20 അദ്ധ്യക്ഷ സ്ഥാനത്ത് ഇരിക്കുന്ന രാജ്യത്തിന്റെ പ്രധാനമന്ത്രി വഹിച്ച പങ്കിനെ അഭിനന്ദിക്കുന്നു. ഇന്ത്യയുമായി ചേർന്ന് നേപ്പാളിൽ രാസവള നിർമ്മാണ ശാല ആരംഭിക്കാൻ പദ്ധതിയിടുന്നുണ്ട്. നേപ്പാളിന്റെ വികസനത്തിന് ഇന്ത്യയുടെ പിന്തുണ അനിവാര്യമാണെന്നും പ്രചണ്ഡ പറഞ്ഞു.
