പൂനൈ: മയക്കുമരുന്നുകളുടെ കോഡുകളായി ഇമോജികൾ ഉപയോഗിക്കുന്നതായി പൂനൈ പോലീസ്. കൗമാരക്കാരായ വിതരണക്കാരും ഉപഭോക്താക്കളും മയക്കുമരുന്നിനെ കുറിച്ച് ആശയവിനിമയം നടത്താനാണ് ഈ കോഡുകൾ ഉപയോഗിക്കുന്നത്. ഓരോ മയക്കുമരുന്നും പ്രത്യേക ഇമോജികൾ ഉപയോഗിച്ചാണ് സൂചിപ്പിക്കുന്നത്. മാതാപിതാക്കൾ ഇക്കാര്യത്തിൽ ജാഗ്രത പാലിക്കണമെന്ന് പോലീസ് നിർദ്ദേശം നൽകി. ജൂൺ 26 ലോക ലഹരിവിരുദ്ധ ദിനാചരണത്തിന് മുന്നോടിയായി നടത്തിയ ബോധവൽക്കരണത്തിന്റെ ഭാഗമായാണ് പൂനെെ പോലീസ് ഈ ട്വീറ്റ് പങ്കുവെച്ചത്.
Ganja 🍀😮💨 Cocaine 👃🏼😛❄️ MDMA 💊🍬 Mushrooms 🍄 Meth 🧪⚗️ Xanax 🍫 Heroin 💉
എന്നിങ്ങനെയാണ് കോഡ് ഉപയോഗിക്കുന്നത്. കൗമാരക്കാരുടെ ഫോണുകൾ പരിശോധിച്ചപ്പോൾ, പ്രത്യേക ഇമോജികളിലൂടെ മയക്കുമരുന്നുകളുടെ ആവശ്യവും വിതരണവും സൂചിപ്പിക്കുന്ന തരത്തിലുള്ള ആശയവിനിമയങ്ങളാണ് ഞങ്ങൾ കണ്ടെത്തിയിരിക്കുന്നത്. അതിനാൽ കുട്ടികളുടെ ഫോണിലെ ഇത്തരം ഇടപെടലുകളെക്കുറിച്ച് ജാഗ്രത പുലർത്താൻ മാതാപിതാക്കളോട് അഭ്യർത്ഥിക്കുന്നുവെന്ന് പൂനൈ പോലീസ് ആന്റി നാർക്കോട്ടിക് സെല്ലിലെ ഇൻസ്‌പെക്ടർ വിനായക് ഗെയ്ക്വാദ് പറഞ്ഞു.
58 കേസുകളിൽ നിന്നായി 77.83 ലക്ഷം രൂപ വിലമതിക്കുന്ന 385 കിലോഗ്രാം കഞ്ചാവ്, 3.754 കോടി രൂപ വിലമതിക്കുന്ന 1.874 കിലോഗ്രാം മെഫെഡ്രോൺ, 40.35 ലക്ഷം രൂപ വിലവരുന്ന 201.4 ഗ്രാം കൊക്കെയ്ൻ, 76,000 രൂപ വിലമതിക്കുന്ന 5 കിലോഗ്രാം പോപ്പി ഹസ്‌ക് , 8.34 ലക്ഷം രൂപ വിലമതിക്കുന്ന 417 ഗ്രാം ഒപ്പിയം, 7 ലക്ഷം രൂപ വിലമതിക്കുന്ന കാത്ത എഡുലിസ, 1.18 കോടി രൂപ വിലമതിക്കുന്ന 42.295 ഗ്രാം എൽഎസ്ഡി സ്റ്റാമ്പുകൾ, 40.33 ലക്ഷം രൂപ വിലമതിക്കുന്ന 336 ഗ്രാം ബ്രൗൺ ഷുഗർ, ഒരു ലക്ഷം രൂപ വിലമതിക്കുന്ന മാജിക് മഷ്‌റൂം, 3.9 ലക്ഷം രൂപ വിലമതിക്കുന്ന 29 ഗ്രാം ഹാഷിഷ് ഓയിൽ എന്നിവയാണ് പോലീസ് പിടികൂടിയിട്ടുള്ളത്.
