മാരി സെൽവരാജ് സംവിധാനം ചെയ്ത മാമന്നൻ വ്യാഴാഴ്ച റിലീസായിരിക്കുകയാണ്. വടിവേലുവും ഉദയനിധി സ്റ്റാലിനും ഫഹദ് ഫാസിലും കീർത്തി സുരേഷും തകർത്തഭിനയിച്ച സിനിമയ്ക്ക് മികച്ച പ്രതികരണമാണ് ലഭിക്കുന്നത്.
ചിത്രത്തിൻറെ ഇൻറർവെൽ ബ്ലോക്കിനെ വലിയ തോതിൽ ആളുകൾ പ്രശംസിക്കുന്നുണ്ട്. വടിവേലു, ഫഹദ് എന്നിവരുടെ പ്രകടനവും എആർ റഹ്മാൻറെ സംഗീതവും ചിത്രത്തെ വലിയതോതിൽ തുണച്ചുവെന്നാണ് പ്രേക്ഷകരുടെ അഭിപ്രായം. വടിവേലുവിന്റെ എക്കാലത്തെയും മികച്ച പ്രകടനമാണ് ഇതെന്നും സമാനതകളില്ലാത്ത തിരിച്ചുവരവാണ് താരം നടത്തിയതെന്നും ആരാധകർ പറയുന്നു. എന്നാൽ നായകനായി എത്തിയ ഉദയനിധി ചിത്രത്തിന് നെഗറ്റീവ് ആകുന്നുണ്ടെന്നും അഭിപ്രായമുണ്ട്.
അതിനിടെ സിനിമയെ പ്രശംസിച്ചുകൊണ്ട് തെന്നിന്ത്യൻ താരം ധനുഷും രംഗത്തെത്തി. ”മാരി സെൽവരാജിന്റെ മാമന്നൻ ഒരു വികാരമാണ്. വടിവേലുവും ഉദയനിധി സ്റ്റാലിനും വളരെ മികച്ച പ്രകടനമാണ് കാഴ്ചവെച്ചത്. ഫഹദും കീർത്തി സുരേഷും തകർത്തഭിനയിച്ചു. ഇന്റർവെൽ ബ്ലോക്കിൽ തിയേറ്ററുകളിൽ വിസ്മയം തീർക്കുകയാണ്. എ.ആർ.റഹ്മാൻ സാർ.. മനോഹരം അങ്ങയുടെ മ്യൂസിക് ‘ എന്നും ധനുഷ് കുറിച്ചു.
പ്രശസ്ത പ്രൊഡക്ഷൻ ആൻഡ് ഡിസ്ട്രിബൂഷൻ കമ്പനി ആയ റെഡ് ജയന്റ് ആണ് ചിത്രത്തിന്റെ നിർമ്മാണം. ചിത്രത്തിന്റെ ഛായാഗ്രഹണം തേനി ഈശ്വർ ആണ്. ആർആർആർ, വിക്രം, ഡോൺ, വിടുതലൈ തുടങ്ങിയ മാസ്റ്റർ ക്ലാസ് സിനിമകൾ വിതരണം ചെയ്ത എച്ച് ആർ പിക്‌ചേഴ്‌സ് ആണ് ചിത്രം കേരളത്തിൽ വിതരണത്തിനെത്തിക്കുന്നത്. പി ആർ ഓ പ്രതീഷ് ശേഖർ. സെൽവ ആർ.കെ.യാണ് എഡിറ്റിംഗ്. കുമാർ ഗംഗപ്പന്റെ കലാസംവിധാനം ചെയ്തിരിക്കുന്നു.
