അൽഫോൻസ് പുത്രൻ സംവിധാനം ചെയ്ത പ്രേമം എന്ന ഒറ്റ ചിത്രത്തിലൂടെ മലയാളികളുടെ ഹൃദയത്തിൽ ഇടം കണ്ടെത്തിയ നടിയാണ് സായ് പല്ലവി. സ്വന്തം അഭിപ്രായങ്ങളും നിലപാടുകളും തുറന്നു പറഞ്ഞു താരം വാർത്തകളിലും ഇടം പിടിക്കാറുണ്ട്. എന്നാൽ രഹസ്യമായി സായി പല്ലവിയുടെ വിവാഹം കഴിഞ്ഞോ എന്നാണ് ആരാധകര്‍ ഇപ്പോള്‍ ആകാംഷയോടെയും തെല്ലു പരിഭവത്തോടെയും ചോദിക്കുന്നത്.
കഴിഞ്ഞ ദിവസം സോഷ്യല്‍ മീഡിയയില്‍ പ്രചരിച്ച ഒരു ചിത്രമാണ് ഇതിനെല്ലാം കാരണം. പൂമാലയണിഞ്ഞ് ഒരു യുവാവിനൊപ്പം നില്‍ക്കുന്ന ചിത്രമായിരുന്നു ഇത്. ‘സായ് പല്ലവിക്ക് അഭിനന്ദനങ്ങള്‍, പ്രണയത്തിന് നിറമില്ല എന്ന് സായ് പല്ലവി തെളിയിച്ചു’ എന്ന ക്യാപ്‌ഷനോടെയാണ്‌ ഫേസ്ബുക്കിലും എക്‌സിലും ചിത്രം പ്രത്യക്ഷപ്പെട്ടത്. ചിത്രത്തിലുള്ളത് സംവിധായകൻ രാജ്‌കുമാര്‍ പെരിയസ്വാമിയാണെന്ന വിവരവും പിന്നീട് പുറത്തുവന്നു. ചിത്രം വൈറലായതോടെ നിരവധി ആളുകളാണ് സായ് പല്ലവിക്ക് അഭിനന്ദനം നേര്‍ന്നുള്ള പോസ്റ്റുകളുമായി എത്തിയത്. എന്നാലിപ്പോൾ ചിത്രത്തിന്റെ സത്യാവസ്ഥ പുറത്തുവന്നിരിക്കുകയാണ്.
രാജ്‌കുമാർ പെരിയസ്വാമി സംവിധാനം ചെയ്യുന്ന ശിവകാർത്തികേയൻ നായകനായ പുതിയ ചിത്രത്തിന്റെ പൂജ ചടങ്ങിൽ നിന്നുള്ളതാണ് ഈ ചിത്രം. നിലവിൽ എസ്കെ 21 എന്ന് പേരിട്ടിരിക്കുന്ന ചിത്രത്തിൽ സായ് പല്ലവി തന്നെയാണ് നായിക.
സിനിമയുടെ പൂജ ചടങ്ങിന്റെ ഭാഗമായാണ് ഈ സിനിമയിൽ പ്രവർത്തിക്കുന്നവരെല്ലാം പൂമാല ധരിച്ചതും ചിത്രം എടുത്തതും. ഏതോ വിരുതൻ ചിത്രത്തില്‍ മറ്റുള്ളവരെയും പൂജയുടെ ഭാഗവും ഒഴിവാക്കി, സായ് പല്ലവിയുടെയും സംവിധായകന്‍ രാജ്‌കുമാര്‍ പെരിയസ്വാമിയുടെയും ഭാഗം മാത്രം കട്ട് ചെയ്‌തെടുത്ത് വിവാഹ ചിത്രമെന്ന പേരില്‍ പ്രചരിപ്പിക്കുകയാണ് ഉണ്ടായത്. അതേസമയം എസ്കെ 21 എന്ന ഈ ചിത്രത്തിന്റെ ഷൂട്ടിങ് തിരക്കുകളിലാണ് സായ് പല്ലവി ഇപ്പോൾ. ചിത്രത്തിന്റെ കാശ്‌മീർ ഷെഡ്യൂൾ അടുത്തിടെ പൂർത്തിയായിരുന്നു. ശിവകാർത്തികേയൻ പട്ടാളക്കാരന്റെ വേഷത്തിലാണ് ചിത്രത്തിൽ എത്തുന്നത്. നാഗ ചൈതന്യയുടെ പുതിയ ചിത്രമായ എൻസി 23യിലും സായ് പല്ലവിയാണ് നായിക എന്നാണ് റിപ്പോർട്ടുകൾ. മലയാളത്തിൽ ഇനിയും ചിത്രങ്ങൾ ചെയ്യാൻ ആഗ്രഹം ഉണ്ടെന്നും നല്ല വേഷങ്ങൾ ലഭിച്ചാൽ തീർച്ചയായും തിരികെ വരുമെന്നും അടുത്തിടെ ഒരു ഇന്റർവ്യൂവിൽ താരം സൂചിപ്പിച്ചിരുന്നു.
