ഭുവനേശ്വർ: രാഷ്ട്രപതി ദ്രൗപദി മുർമുവിന്റെ നാടായ ഒഡീഷയിലെ മയൂർഭഞ്ചിലേക്ക് ആദ്യമായി പാസഞ്ചർ സർവ്വീസ്. മൂന്ന് തീവണ്ടികളാണ് ഇവിടേയ്ക്ക് സർവ്വീസ് നടത്തുന്നത്. മയൂർഭഞ്ചിലെ റൈരംഗ്പൂർ ആണ് രാഷ്ട്രപതിയുടെ ജന്മദേശം.
പുതിയ തീവണ്ടികൾ സർവ്വീസ് ആരംഭിക്കുന്ന വിവരം ഇന്ത്യൻ റെയിൽവേ ആണ് പുറത്തുവിട്ടത്. കൊൽക്കത്ത-ബദാംപഹാർ വീക്ക്‌ലി എക്‌സ്പ്രസ്, ബദാംപഹാർ-റൂർക്കേല വീക്ക്‌ലി എക്‌സ്പ്രസ്, റൂർക്കേല-ടാറ്റാനഗർ എക്‌സ്പ്രസ് എന്നിവയാണ് പുതിയ വണ്ടികൾ. ദീർഘനാളായി ഇവിടുത്തെ ജനങ്ങൾ പാസഞ്ചർ തീവണ്ടികൾ വേണമെന്ന് ആവശ്യപ്പെടുന്നുണ്ട്. ഇത് പരിഗണിച്ചാണ് റെയിൽവേ മന്ത്രാലയം തീവണ്ടി അനുവദിച്ചത്. ഗോത്രവിഭാഗങ്ങൾ കൂടുതലായി തിങ്ങിപ്പാർക്കുന്ന പ്രദേശമാണ് ഇത്.
രാഷ്ട്രപതിയുടെ ജന്മസ്ഥലമായ റൈരംഗ്പൂരിലേക്കുൾപ്പെടെയാണ് പുതിയ സർവ്വീസ്. കൊൽക്കത്ത-ബദാംപഹാർ വീക്ക്‌ലി എക്‌സ്പ്രസ് എല്ലാ ശനിയാഴ്ചയും രാത്രി 11.05 ന് ഷാലിമറിൽ നിന്ന് പുറപ്പെട്ട് അടുത്ത ദിവസം പുലർച്ചെ 05.40 ന് ബദാംപഹാറിലെത്തും. തിരിച്ച്, ഞായറാഴ്ച രാത്രി 9.30-ന് ബദാംപഹാറിൽ നിന്ന് പുറപ്പെട്ട്, അടുത്ത ദിവസം പുലർച്ചെ 5-ന് കൊൽക്കത്തയിലെ ഷാലിമാറിൽ എത്തിച്ചേരും. ഈ ട്രെയിൻ സാന്ത്രാഗച്ചി, ഖരഗ്പൂർ, ജാർഗ്രാം, ഘട്‌സില, അസൻബോണി, ടാറ്റാനഗർ, ബഹൽദ റോഡ്, ഔൻലജോരി, റൈരംഗ്പൂർ എന്നിവിടങ്ങളിലാകും സ്റ്റോപ്പ് ഉണ്ടാകുക.
ബദാംപഹാർ-റൂർക്കേല വീക്ക്‌ലി എക്‌സ്പ്രസ് എല്ലാ ഞായറാഴ്ചയുമാണ് സർവ്വീസ് നടത്തുക.
രാവിലെ 06.10-ന് ബദാംപഹാറിൽ നിന്ന് പുറപ്പെട്ട് 11.40-ന് റൂർക്കേലയിലെത്തും. ഉച്ചയ്ക്ക് 2.20-ന് റൂർക്കേലയിൽ നിന്ന് പുറപ്പെട്ട് രാത്രി 7.25-ന് ബദാംപഹാറിൽ എത്തിച്ചേരും. ഈ ട്രെയിന് റൈരംഗ്പൂർ, ഔൻലജോരി, ബഹൽദ റോഡ്, ടാറ്റാനഗർ, സിനി, രാജ്ഖർസ്വാൻ, ചക്രധർപൂർ, ഗോയിൽകേര, മനോഹർകെര-രൂർകേരപൂർ എന്നിവിടങ്ങളിൽ സ്റ്റോപ്പുണ്ടാകുമെന്നും റെയിൽവേ മന്ത്രാലയം അറിയിച്ചു.
റൂർക്കേല-ടാറ്റാനഗർ എക്‌സ്പ്രസ് ആഴ്ചയിൽ 6 ദിവസമാകും സർവ്വീസ് നടത്തുക. ഞായറാഴ്ച ഈ തീവണ്ടി സർവ്വീസ് നടത്തില്ല. മറ്റ് എല്ലാ ദിവസവും പുലർച്ചെ 4.50 ന് റൂർക്കേലയിൽ നിന്ന് പുറപ്പെട്ട് രാവിലെ 09.15 ന് ടാറ്റാനഗറിലെത്തും. ഉച്ചകഴിഞ്ഞ് 3.25 ന് ടാറ്റാനഗറിൽ നിന്ന് പുറപ്പെട്ട് രാത്രി 7.35 ന് റൂർക്കേലയിൽ എത്തിച്ചേരും. ഇതിന് ബിസ്ര, മനോഹർപൂർ, ചക്രധർപൂർ, സിനി, ആദിത്യപൂർ എന്നിവിടങ്ങളിൽ സ്റ്റോപ്പുണ്ടാകും
ടാറ്റാനഗർ- ബദാംപഹാർ എക്‌സ്പ്രസ് ആഴ്ചയിൽ 6 ദിവസം സർവീസ് നടത്തും. ഞായറാഴ്ച ഒഴികെ എല്ലാ ദിവസവും രാവിലെ 9.55 ന് ടാറ്റാനഗറിൽ നിന്ന് പുറപ്പെടുന്ന ട്രെയിൻ ഉച്ചയ്ക്ക് 12.15 ന് ബദാംപഹാറിലെത്തും. മടക്കയാത്രയിൽ, ഞായറാഴ്ച ഒഴികെയുള്ള ദിവസങ്ങളിൽ ബദാംപഹാറിൽ നിന്ന് ഉച്ചയ്ക്ക് 12.45-ന് പുറപ്പെടുന്ന ട്രെയിൻ 3.20-ന് ടാറ്റാനഗറിലെത്തും. ഹലുദ്പുക്കൂർ, ഔൻലജോരി, റൈരംഗ്പൂർ, കുൽദിഹ, ചൻവ എന്നിവിടങ്ങളിൽ ട്രെയിന് സ്റ്റോപ്പുണ്ടാകുമെന്നും റെയിൽവേ കൂട്ടിച്ചേർത്തു.
സതേൺ ഈസ്റ്റേൺ സോണിന് കീഴിലാണ് പുതിയ സർവ്വീസുകൾ. പുതിയ തീവണ്ടികൾ വരുന്നതോട് കൂടി രാജ്യത്തെ ജനങ്ങളുടെ യാത്ര കൂടുതൽ എളുപ്പമാകുമെന്ന് കേന്ദ്ര റെയിൽവേ മന്ത്രി അശ്വിനി വൈഷ്ണവ് വ്യക്തമാക്കി. പ്രദേശത്തിന്റെ സമ്പദ്‌വ്യവസ്ഥയെയും ഉത്തേജിപ്പിക്കും. വനവാസി മേഖലയുടെ വികസനത്തിന് സഹായകമാകും. നഗരങ്ങൾ തമ്മിൽ കൂടുതൽ ബന്ധം നൽകും. മൂന്ന് സർവ്വീസുകളും ഉടൻ ആരംഭിക്കുമെന്നും അദ്ദേഹം കൂട്ടിച്ചേർത്തു.
