സച്ചിൻ ടെണ്ടുൽക്കറോട് ആരാധന തോന്നാത്ത ഇന്ത്യക്കാരാരും തന്നെ ഉണ്ടാവില്ല. ഭാരതീയരായ ഓരോ ക്രിക്കറ്റ് പ്രേമികൾക്കും ദൈവതുല്യമായ ആവേശവും വികാരവും ആണ് സച്ചിൻ ടെണ്ടുൽക്കർ. അത്തരത്തിൽ സച്ചിൻ ടെണ്ടുൽക്കറുടെ വലിയ ആരാധകനായ ഒരു യുവാവിന് തന്റെ ജീവിതത്തിലെ ഏറ്റവും വലിയ സ്വപ്നം സാക്ഷാത്കരിക്കപ്പെട്ട ഒരു നിമിഷം ആണ് ഇപ്പോൾ സമൂഹമാദ്ധ്യമങ്ങളിൽ തരംഗമായി മാറുന്നത്.
സ്പോർട്സ് താരങ്ങളുടെ ജേഴ്സി ധരിച്ച് നടക്കുന്ന ധാരാളം ആരാധകരെ നമ്മൾ പലയിടത്തും കണ്ടിട്ടുണ്ടായിരുന്നു. എന്നാൽ എപ്പോഴെങ്കിലും ഈ ജേഴ്സി കണ്ട് ആ താരം തന്നെ അത് ധരിച്ച ആളെ വന്ന് പരിചയപ്പെടുന്നതിനെ കുറിച്ച് ആലോചിച്ചു നോക്കിയിട്ടുണ്ടോ. ഓരോ ആരാധകർക്കും അതൊരു വലിയ സ്വപ്നം തന്നെയായിരിക്കും. അത്തരത്തിൽ ഒരു വലിയ സ്വപ്നം സാക്ഷാത്കരിച്ച സന്തോഷത്തിലാണ് ഒരു സച്ചിൻ ടെണ്ടുൽക്കർ ഫാൻ.
‘ടെണ്ടുൽക്കർ മിസ്സ് യു’ എന്നെഴുതിയ മുംബൈ ഇന്ത്യൻസ് ജേഴ്സി ധരിച്ച് ബൈക്കിൽ സഞ്ചരിക്കുകയായിരുന്ന ഒരു യുവാവിനെ അപ്രതീക്ഷിതമായാണ് കാറിൽ യാത്ര ചെയ്യുകയായിരുന്ന സച്ചിൻ കണ്ടെത്തിയത്. ആ ആരാധകന് ഒരു സർപ്രൈസ് നൽകാൻ തന്നെ താരം തീരുമാനിച്ചു. ഉടൻതന്നെ സച്ചിന്റെ കാർ ബൈക്ക് യാത്രക്കാരന് തൊട്ടരികിൽ നിർത്തിക്കൊണ്ട് സച്ചിൻ എയർപോർട്ടിലേക്കുള്ള വഴി ഏതാണെന്ന് ചോദിക്കുകയായിരുന്നു. സാക്ഷാൽ സച്ചിനെ കണ്ടതും അത്ഭുതവും ആഹ്ലാദവും കൊണ്ട് തൊഴുതു പോയി ആരാധകൻ.
സാക്ഷാൻ സച്ചിൻ ടെണ്ടുൽക്കറെ നേരിട്ട് കണ്ടത് ശരിക്കും അപ്രതീക്ഷിതമായിരുന്നു ആ ആരാധകന്. സച്ചിനെ വലിയൊരു വികാരമായി തന്നെ നെഞ്ചേറ്റി നടക്കുന്ന ആളായിരുന്നു അദ്ദേഹം. അതുകൊണ്ടുതന്നെ ജേഴ്സി മാത്രമല്ല, സച്ചിന്റെ ടാറ്റൂവും ചിത്രങ്ങൾ ഒട്ടിച്ച ഒരു പുസ്തകവും എല്ലാം അദ്ദേഹത്തിന്റെ കയ്യിൽ ഉണ്ടായിരുന്നു. ഒടുവിൽ ഒന്നിച്ച് സെൽഫി എടുക്കുകയും ഓട്ടോഗ്രാഫ് നൽകുകയും ചെയ്ത ശേഷമാണ് സച്ചിൻ യാത്രയായത്. ” ‘സച്ചിൻ’ ടെണ്ടുൽക്കറെ കണ്ടുമുട്ടി” എന്ന ക്യാപ്ഷനോടെ സമൂഹമാദ്ധ്യമങ്ങളിലൂടെ സച്ചിൻ പങ്കുവെച്ച ഈ വീഡിയോ ഇതിനകം തന്നെ നിരവധി പേരാണ് കണ്ടുകഴിഞ്ഞത്. ഇതുപോലെ ഒരു നിമിഷം തങ്ങളുടെയും സ്വപ്നമാണ് എന്നാണ് വീഡിയോയ്ക്ക് താഴെ എല്ലാ സച്ചിൻ ആരാധകരും അഭിപ്രായപ്പെടുന്നത്.
https://fb.watch/pXrp-zzUe7/?mibextid=Nif5oz
