ഭൂമി ഇന്ന് നേരിടുന്ന പ്രധാന പ്രതിസന്ധികളാണ് പരിസ്ഥിതി മലിനീകരണവും വനനശീകരണവും എല്ലാം. സ്വന്തം സ്വാർത്ഥ ലാഭത്തിനായി മനുഷ്യൻ മരങ്ങൾ വെട്ടി നശിപ്പിക്കുന്ന ഈ കാലത്ത് എല്ലാവർക്കും മാതൃകയാവുകയാണ് ഇന്ത്യയിലെ ഒരു ഗ്രാമം. രാജസ്ഥാനിലെ അജ്മീർ ജില്ലയിലെ പദമ്പുര ഗ്രാമമാണിത്. ആര്യവേപ്പ് മരങ്ങളെ സംരക്ഷിച്ചു കൊണ്ടാണ് ഈ ഗ്രാമം ഇന്ന് രാജ്യം മുഴുവൻ ചർച്ചയാകുന്നത്. അതും ഇന്നോ ഇന്നലെയോ തുടങ്ങിയതല്ല, കഴിഞ്ഞ ഏഴ് നൂറ്റാണ്ടുകളായി ഈ ഗ്രാമത്തിൽ ഒരു ആര്യവേപ്പ് മരം പോലും നശിപ്പിക്കപ്പെട്ടിട്ടില്ല.
‘നീം വാല ഗാവ്’ എന്നൊരു വിശേഷണം തന്നെയുണ്ട് പദമ്പുര ഗ്രാമത്തിന്. ഈ ഗ്രാമത്തിൽ എവിടെ നോക്കിയാലും ധാരാളമായി കാണാൻ കഴിയുന്നവയാണ് ആര്യവേപ്പ് മരങ്ങൾ. അജ്മീറിൽ നിന്ന് 18 കിലോമീറ്റർ അകലെ ആരവല്ലി മലനിരകളുടെ താഴ്‌വരയിലായി സ്ഥിതി ചെയ്യുന്ന പദമ്പുര ഗ്രാമത്തിന് 705 വർഷത്തെ ചരിത്രമുണ്ട്. നൂറ്റാണ്ടുകളായി ഇവിടെ ആര്യവേപ്പ് മരങ്ങൾ മുറിക്കുന്നത് കുറ്റകരമാണ്. വേപ്പ് മരത്തിന്റെ ഒരു കൊമ്പടിക്കാൻ പോലും ഗ്രാമത്തിൽ ആർക്കും അനുവാദമില്ല. ഈ ഗ്രാമവാസികൾ ആരും തന്നെ അതിന് തയ്യാറല്ല എന്നതാണ് വാസ്തവം. ആര്യവേപ്പിനെ അവർ അത്രത്തോളം തങ്ങളുടെ ജീവിതത്തിന്റെ ഭാഗമായി കണക്കാക്കുന്നു.
ഏകദേശം 1200 പേരാണ് നിലവിൽ പദമ്പുര ഗ്രാമത്തിൽ ജീവിക്കുന്നത്. ഗ്രാമത്തിലെ ഭൂരിഭാഗം ജനങ്ങളും ഗുർജാർ സമുദായത്തിൽപ്പെട്ടവരാണ്.
ഈ ഗ്രാമവാസികൾക്ക് വേപ്പ് വൃക്ഷം വിശ്വാസത്തിൻ്റെ ഭാഗം മാത്രമല്ല, പൂർവ്വികർ കൈമാറിയ പൈതൃകം കൂടിയാണ്. ഭഗവാൻ നാരായണന്റെ സ്വരൂപമായാണ് അവർ ആര്യവേപ്പ് മരങ്ങളെ കാണുന്നത്. അതിനാൽ തന്നെ ഈ മരങ്ങൾ ഒരു കാരണവശാലും മുറിക്കില്ല ഇന്ന് പൂർവികർ എടുത്ത ദൃഢനിശ്ചയം ഇന്നും ഒരു നിയമമായി പാലിക്കപ്പെടുകയാണ് പദമ്പുര ഗ്രാമത്തിൽ.
