പഴയ കറന്‍സി നോട്ടുകള്‍ നിങ്ങള്‍ ശേഖരിച്ചുവെക്കാറുണ്ടോ, ഇപ്പോഴിതാ അത്തരത്തില്‍ കളക്ഷനുള്ള ഒരാള്‍ക്ക് സംഭവിച്ചതാണ് ഇപ്പോള്‍ സോഷ്യല്‍ മീഡിയയില്‍ തരംഗമാകുന്നത്. യുഎസ് സ്വദേശിയായ ടോമി എന്ന ഈ യുവാവിന്റെ കയ്യില്‍ മുത്തശ്ശിയില്‍ നിന്നും പാരമ്പര്യസ്വത്തായി ലഭിച്ച ഒരു അഞ്ച് ഡോളറിന്റെ കറന്‍സിനോട്ടുണ്ട്. 1988 ല്‍ ഇറങ്ങിയ ഈ നോട്ടിന് ഇന്ന് വന്‍വിലയാണുള്ളത്. എന്നാല്‍ പലരും കോടിക്കണക്കിന് രൂപ വിലപറഞ്ഞിട്ടും കൊടുക്കാന്‍ തയ്യാറല്ലെന്ന് പറയുകയാണ് ഇയാള്‍്. 1അച്ചടിപിശക് സംഭവിച്ച നോട്ടുകൂടിയാണിത്.
നോട്ടിന്റെ വലതുകോണില്‍ ഏറ്റവും താഴെയായി ‘5’ എന്ന സംഖ്യ രണ്ട് തവണ അച്ചടിച്ചിട്ടുണ്ട്. വലതുവശത്ത് തെറ്റായി ക്രമീകരിച്ച മഷിയടയാളവും ഉണ്ട്. ഇത്തരത്തില്‍ അച്ചടിപ്പിശക് പറ്റിയ നോട്ടാണ് ടോമി നിധിപോലെ കാത്തുസൂക്ഷിക്കുന്നത്
ഈ നോട്ടിന്റെ ചിത്രമടങ്ങുന്ന വീഡിയോ ടോമിയുടെ കാമുകിയായ ചാര്‍ലറ്റ് കാരോള്‍ ടിക് ടോക്കില്‍ പോസ്റ്റ് ചെയ്തിരുന്നു. ഇതോടെ ഈ നോട്ടിന് 3.3 കോടി രൂപ വരെ വിലയിട്ട് ചിലര്‍ ടോമിയെ സമീപിച്ചിരുന്നുവെന്നും കാരോള്‍ പറഞ്ഞു. എന്നാല്‍ മുത്തശ്ശിയുടെ ഓര്‍മ്മയ്ക്കായി സൂക്ഷിച്ചിരിക്കുന്ന ഈ കറന്‍സി നോട്ട് വില്‍ക്കാന്‍ ടോമി തയ്യാറായല്ല എന്നാണ് കാമുകി പറയുന്നത്.
കാലിഫോര്‍ണിയയിലെ യൂണിവേഴ്സല്‍ സ്റ്റുഡിയോയുടെ ഫിനാന്‍സ് വിഭാഗത്തിലാണ് ടോമിയുടെ മുത്തശ്ശി ജോലി ചെയ്തിരുന്നത്. അവിടെ നിന്നുമാണ് ഈ കറന്‍സി നോട്ട് മുത്തശ്ശിയ്ക്ക് ലഭിച്ചതെന്ന് കരുതപ്പെടുന്നുവെന്ന് കാരോള്‍ പറഞ്ഞു.
ഇത്തരത്തില്‍ അച്ചടിപ്പിശക് സംഭവിച്ച നോട്ടുകള്‍ക്ക് അവയുടെ മുഖവിലയെക്കാള്‍ വലിയ വില നല്‍കി ശേഖരിക്കുന്ന ആളുകളുണ്ട്. ചുവപ്പ്, നീല, ഗോള്‍ഡ് മുദ്ര പതിച്ച തെറ്റായ രീതിയില്‍ അച്ചടിച്ച നോട്ടുകള്‍ക്ക് വലിയ വില തന്നെ ലഭിക്കും.
