ന്യൂഡൽഹി : പാകിസ്താൻ ചാര ഏജൻസിയായ ഇന്റർ സർവീസസ് ഇന്റലിജൻസ് (ഐഎസ്‌ഐ)യുമായി ബന്ധമുള്ള മൂന്ന് തീവ്രവാദികൾ അറസ്റ്റിൽ. പഞ്ചാബിലെ അമൃത്സറിൽ നിന്നാണ് ഡൽഹി പോലീസിന്റെ സ്‌പെഷ്യൽ സെൽ തീവ്രവാദികളെ അറസ്റ്റ് ചെയ്തത്. കഴിഞ്ഞദിവസം ഡൽഹിയിൽ നിന്നും അറസ്റ്റിലായ അഭിഭാഷകൻ റിസ്വാനിൽ നിന്നും ലഭിച്ച വിവരങ്ങളെ തുടർന്നാണ് പഞ്ചാബിൽ നിന്നും തീവ്രവാദികളെ പിടികൂടിയത്.
ഐഎസ്‌ഐക്ക് വേണ്ടി ചാരവൃത്തിയും തീവ്രവാദ ധനസഹായവും നൽകുന്ന ഒരു പ്രധാന ശൃംഖലയാണ് ഇതോടെ പോലീസ് തകർത്തത്. “പാകിസ്താൻ രഹസ്യാന്വേഷണ ഏജൻസിയുടെ നിർദ്ദേശപ്രകാരം പ്രവർത്തിക്കുന്ന ഗുണ്ടാസംഘമായ ഷഹ്‌സാദ് ഭട്ടി നയിക്കുന്ന ഒരു മൊഡ്യൂൾ ഡൽഹി പോലീസിന്റെ പ്രത്യേക സെൽ കണ്ടെത്തി. മൂന്ന് പേരെ അറസ്റ്റ് ചെയ്തു” എന്ന് പോലീസ് ഔദ്യോഗിക പ്രസ്താവനയിൽ അറിയിച്ചു.
25-ാം തീയതി ഗുരുദാസ്പൂർ സിറ്റി പോലീസ് സ്റ്റേഷന് മുന്നിൽ ഒരു ഹാൻഡ് ഗ്രനേഡ് എറിഞ്ഞ സംഭവത്തിൽ ബന്ധമുള്ളവരാണ് അറസ്റ്റിലായ പ്രതികൾ. രണ്ട് മാസത്തിനിടെ ഇത് രണ്ടാം തവണയാണ് ഡൽഹി പോലീസ് പാകിസ്ഥാൻ ആസ്ഥാനമായുള്ള ഒരു ഭീകര മൊഡ്യൂൾ കണ്ടെത്തുന്നത്. പാകിസ്താനുമായി ബന്ധപ്പെട്ട് കോടിക്കണക്കിന് രൂപയുടെ ഹവാല പണമിടപാടുകൾ നടത്തിയതിനും പഞ്ചാബിലെ ദേശവിരുദ്ധ പ്രവർത്തനങ്ങൾക്ക് ധനസഹായം നൽകിയതിനും മൂന്ന് പ്രതികൾക്കുമെതിരെ ഗുരുതരമായ കുറ്റങ്ങളാണ് ചുമത്തിയിരിക്കുന്നത്.
