മാസങ്ങൾ നീണ്ട കാത്തിരിപ്പിനൊടുവിൽ തെലുങ്ക് സിനിമയിലെ ‘റൗഡി ബോയ്’ വിജയ് ദേവരക്കൊണ്ടയും ‘നാഷണൽ ക്രഷ്’ രശ്മിക മന്ദാനയും ജീവിതത്തിൽ ഒന്നിച്ചു. ഹൈദരാബാദിൽ നടന്ന സ്വകാര്യ ചടങ്ങിലായിരുന്നു വിവാഹം. ഫോട്ടോകൾക്ക് കർശന നിയന്ത്രണം ഏർപ്പെടുത്തിയിരുന്നതിനാൽ വിവാഹദിവസം ചിത്രങ്ങളൊന്നും പുറത്തുവന്നിരുന്നില്ല. എന്നാൽ ഇപ്പോൾ വിവാഹ ചിത്രങ്ങൾക്കൊപ്പം വിജയ് പങ്കുവെച്ച കുറിപ്പാണ് സോഷ്യൽ മീഡിയയിൽ തരംഗമാകുന്നത്.
വിവാഹ ചിത്രങ്ങൾ പങ്കുവെച്ചുകൊണ്ട് വിജയ് കുറിച്ച വാക്കുകൾ പെട്ടെന്നുതന്നെ ചർച്ചയായി. “ഒരു ദിവസം ഞാൻ അവളെ വല്ലാതെ മിസ്സ് ചെയ്തു. അവൾ കൂടെ ഉണ്ടായിരുന്നെങ്കിൽ എന്റെ ദിവസം നന്നാകുമായിരുന്നു എന്ന് തോന്നി. അവൾ എന്റെ എതിർവശത്ത് ഇരുന്നിരുന്നെങ്കിൽ എന്റെ ഭക്ഷണം കൂടുതൽ ആരോഗ്യകരമാകുമെന്നും, കൂടെ വ്യായാമം ചെയ്യാൻ ഉണ്ടായിരുന്നെങ്കിൽ അത് കൂടുതൽ രസകരമാകുമെന്നും തോന്നി. എനിക്ക് അവളെ അത്രമേൽ ആവശ്യമായിരുന്നു. അങ്ങനെ ഞാൻ എന്റെ ഉറ്റ സുഹൃത്തിനെ, എന്റെ ഭാര്യയെ കണ്ടെത്തി,” വിജയ് കുറിച്ചു.
ആരാധകർ ഇരുവർക്കും നൽകിയ ‘വിരോഷ്’ എന്ന പേര് തങ്ങളുടെ വിവാഹത്തിന് നൽകിക്കൊണ്ട് താരങ്ങൾ ആരാധകരോടുള്ള സ്നേഹം പ്രകടിപ്പിച്ചു. “ഞങ്ങൾ എന്തെങ്കിലും പ്ലാൻ ചെയ്യുന്നതിന് മുൻപേ നിങ്ങൾ ഞങ്ങൾക്ക് വേണ്ടി നിലകൊണ്ടു. സ്നേഹത്തോടെ നിങ്ങൾ ഞങ്ങളെ വിരോഷ് എന്ന് വിളിച്ചു. ഇന്ന് നിറഞ്ഞ ഹൃദയത്തോടെ ഈ കൂടിച്ചേരലിനെ ‘വിരോഷിന്റെ വിവാഹം’ എന്ന് വിളിക്കാൻ ഞങ്ങൾ ആഗ്രഹിക്കുന്നു,” എന്ന് രശ്മികയും വിജയും സംയുക്തമായി പങ്കുവെച്ച കുറിപ്പിൽ പറയുന്നു.
‘ഗീത ഗോവിന്ദം’, ‘ഡിയർ കൊമ്രേഡ്’ എന്നീ ചിത്രങ്ങളിലെ ഇവരുടെ കെമിസ്ട്രി കണ്ടപ്പോഴേ ഇരുവരും പ്രണയത്തിലാണെന്ന വാർത്തകൾ പ്രചരിച്ചിരുന്നു. എന്നാൽ അപ്പോഴെല്ലാം സൗഹൃദം മാത്രമാണെന്നായിരുന്നു താരങ്ങളുടെ മറുപടി. ഒടുവിൽ എല്ലാ ഒളിച്ചുകളികളും അവസാനിപ്പിച്ച് ഔദ്യോഗികമായി ഇരുവരും ഒന്നായതിന്റെ ആവേശത്തിലാണ് സിനിമാ ലോകം.
View this post on Instagram
