ഇന്ത്യൻ ക്രിക്കറ്റ് പ്രേമികൾ ഏറെ ആകാംഷയോടെ കാത്തിരിക്കുന്ന 2027-ലെ ഏകദിന ലോകകപ്പിനുള്ള ടീം ഒരുക്കങ്ങൾ ബിസിസിഐയും സെലക്ടർമാരും ഇതിനകം തന്നെ ആരംഭിച്ചു കഴിഞ്ഞു. എന്നാൽ, കരിയറിലെ ഏറ്റവും നിർണ്ണായക ഘട്ടത്തിലൂടെ കടന്നുപോകുന്ന മലയാളി വിക്കറ്റ് കീപ്പർ ബാറ്റർ സഞ്ജു സാംസണിന് ഏകദിന ടീമിലേക്കുള്ള തിരിച്ചുവരവ് ഇനി അത്ര എളുപ്പമാകില്ലെന്ന സൂചനകളാണ് നിലവിലെ സാഹചര്യങ്ങൾ നൽകുന്നത്. ടീമിലെ മറ്റ് പ്രമുഖ വിക്കറ്റ് കീപ്പർമാരായ കെ.എൽ. രാഹുൽ, ഇഷാൻ കിഷൻ എന്നിവരുടെ തകർപ്പൻ ഫോമും സ്ഥിരതയുമാണ് സഞ്ജുവിന്റെ ലോകകപ്പ് സ്വപ്നങ്ങൾക്ക് കരിനിഴൽ വീഴ്ത്തുന്നത്.
ഇന്ത്യൻ ഏകദിന ടീമിലെ മിഡിൽ ഓർഡറിൽ വിക്കറ്റ് കീപ്പർ ബാറ്റർ എന്ന നിലയിൽ കെ.എൽ. രാഹുൽ തന്റെ സ്ഥാനം ഏതാണ്ട് ഉറപ്പിച്ചു കഴിഞ്ഞു. അനുഭവസമ്പത്തും ഏത് സാഹചര്യത്തിലും ബാറ്റ് ചെയ്യാനുള്ള കഴിവും രാഹുലിനെ സെലക്ടർമാരുടെ ഒന്നാം ചോയ്സാക്കി മാറ്റുന്നു. മറുഭാഗത്ത്, യുവതാരം ഇഷാൻ കിഷൻ നിലവിൽ തകർപ്പൻ ഫോമിലാണ്. ഇടംകയ്യൻ ബാറ്റർ ആണെന്നതും, ഓപ്പണിങ്ങിലും മിഡിൽ ഓർഡറിലും ഒരുപോലെ തിളങ്ങാൻ കഴിയുമെന്നതും ഇഷാന് ടീമിൽ വലിയ മുൻഗണന നൽകുന്നുണ്ട്. ബാറ്റിങ്ങിലും വിക്കറ്റ് കീപ്പിങ്ങിലും ഇരുവരും നിലനിർത്തുന്ന ഈ മികച്ച ഫോം സഞ്ജു സാംസൺ ഇനി ഏകദിന ടീമിൽ ഇടം പിടിക്കേണ്ടതുണ്ടോ എന്ന ചോദ്യം ശക്തമാക്കുകയാണ്.
അഫ്ഗാനെതിരെ നടക്കുന്ന പരമ്പര ലോകകപ്പിനുള്ള ഒരു റിഹേഴ്സൽ എന്ന നിലയിൽ നമുക്ക് കാണാം. ആദ്യ മത്സരത്തിൽ ഇന്ത്യ തകർപ്പൻ ജയം സ്വന്തമാക്കിയപ്പോൾ അവിടെ പ്രമുഖ താരങ്ങൾ എല്ലാം തിളങ്ങിയിരുന്നു. രണ്ടാം മത്സരത്തിലും ഇഷാനും, ഗില്ലും ഒകെ കാഴ്ച്ചവെച്ച തകർപ്പൻ പ്രകടനം കാണുമ്പോൾ ഒരു കാര്യം ഉറപ്പിക്കാം – അത്ഭുതങ്ങൾ സംഭവിച്ചില്ലെങ്കിൽ സഞ്ജുവിന്റെ പേര് ചർച്ചയിൽ പോലും വരില്ല.
മികച്ച പ്രതിഭയുണ്ടായിട്ടും സഞ്ജു സാംസണിന് ചിലപ്പോൾ എങ്കിലും സ്ഥിരത കുറവ് ഒരു പ്രശ്‌നമാകുന്നു. ഇന്ത്യൻ പ്രീമിയർ ലീഗിൽ ഈ സീസണിൽ സഞ്ജു സാംസന്റെ പ്രകടനം അതിന് ഉദാഹരണമായി പറയാം. കൂടാതെ ഋഷഭ് പന്ത്, ധ്രുവ് ജുറെൽ തുടങ്ങിയ മറ്റ് യുവ വിക്കറ്റ് കീപ്പർമാരും നിരരിലുണ്ടെന്നത് ടീം സെലക്ഷൻ കൂടുതൽ സങ്കീർണ്ണമാക്കുന്നു. ഇനി ആഭ്യന്തര ക്രിക്കറ്റിലടക്കം തുടർച്ചയായി സെഞ്ചുറികൾ നേടി സെലക്ടർമാർക്ക് പൂർണ്ണമായും അവഗണിക്കാൻ കഴിയാത്ത വിധം റൺസ് അടിച്ചുകൂട്ടിയാൽ മാത്രമേ സഞ്ജുവിന് വരാനിരിക്കുന്ന ലോകകപ്പ് സ്ക്വാഡിൽ ഒരു ബാക്കപ്പ് വിക്കറ്റ് കീപ്പറായെങ്കിലും ഇടം നേടാൻ സാധിക്കൂ.
ചുരുക്കത്തിൽ, രാഹുലും ഇഷാനും നിലവിലെ ഫോം തുടർന്നാൽ സഞ്ജു സാംസണിന് ഏകദിന ക്രിക്കറ്റിലെ കരിയർ മുന്നോട്ട് കൊണ്ടുപോകുക എന്നത് കടുത്ത അഗ്നിപരീക്ഷയായിരിക്കും. മലയാളി താരത്തിന് ഇനി ഏകദിന ടീമിൽ സ്ഥാനം ലഭിക്കുമോ അതോ ടി20 ഫോർമാറ്റിൽ മാത്രമായി താരം ഒതുങ്ങുമോ എന്നത് വരും മാസങ്ങളിലെ പ്രകടനങ്ങളെ ആശ്രയിച്ചിരിക്കും.
