കൊൽക്കത്ത : പശ്ചിമ ബംഗാളിൽ മമതാ ബാനർജിക്കും തൃണമൂൽ കോൺഗ്രസിനും വീണ്ടും കനത്ത തിരിച്ചടി. തൃണമൂൽ കോൺഗ്രസിൽ നിന്നും രാജിവച്ച മൂന്ന് രാജ്യസഭാ എംപിമാർ ബിജെപിയിൽ ചേർന്നു. ഏതാനും ദിവസങ്ങൾക്ക് മുമ്പ് പാർട്ടിയിൽ നിന്നും രാജ്യസഭയിൽ നിന്നും രാജിവെച്ച പ്രമുഖ നേതാക്കളായ സുസ്മിത ദേവ്, സുഖേന്ദു ശേഖർ റേ, പ്രകാശ് ചിക് ബരായ്ക് എന്നിവരാണ് ബിജെപിയിൽ ചേർന്നത്. കൊൽക്കത്തയിലെ സാൾട്ട് ലേക്കിലുള്ള ബിജെപി സംസ്ഥാന ആസ്ഥാനത്ത് നടന്ന ചടങ്ങിൽ വെസ്റ്റ് ബംഗാൾ ബിജെപി അധ്യക്ഷൻ സമിക് ഭട്ടാചാര്യ മൂന്ന് നേതാക്കൾക്കും പാർട്ടി പതാക നൽകി ഔദ്യോഗികമായി സ്വീകരിച്ചു.
പശ്ചിമ ബംഗാൾ നിയമസഭാ തിരഞ്ഞെടുപ്പിൽ തൃണമൂൽ കോൺഗ്രസ് നേരിട്ട പരാജയത്തെത്തുടർന്ന് പാർട്ടിയിൽ ഉടലെടുത്ത ആഭ്യന്തര തർക്കങ്ങളാണ് രാജ്യസഭാ എംപിമാരായിരുന്ന ഇവരുടെ കൂട്ടരാജിക്കും പാർട്ടി മാറ്റത്തിനും വഴിതെളിച്ചത്.
ദേശീയ തലത്തിൽ മികച്ച പാർലമെന്ററി പരിചയമുള്ള ഈ മുതിർന്ന നേതാക്കളുടെ വരവ് സംസ്ഥാനത്ത് ബിജെപിയുടെ സംഘടനാ അടിത്തറയും ഭരണപരമായ സ്വാധീനവും കൂടുതൽ ശക്തമാക്കുമെന്ന് സമിക് ഭട്ടാചാര്യ പ്രത്യാശ പ്രകടിപ്പിച്ചു. പ്രധാനമന്ത്രി നരേന്ദ്ര മോദിയുടെ വികസന നയങ്ങളിലുള്ള വിശ്വാസമാണ് നേതാക്കളെ ബിജെപിയിലേക്ക് ആകർഷിച്ചതെന്നും അദ്ദേഹം കൂട്ടിച്ചേർത്തു.
മുമ്പ് കോൺഗ്രസ് വിട്ട് 2021-ൽ തൃണമൂലിൽ എത്തിയ സുസ്മിത ദേവ് പാർട്ടിയുടെ ദേശീയ വക്താവായിരുന്നു. ഓൾ ഇന്ത്യ മഹിളാ കോൺഗ്രസ് അധ്യക്ഷയായും അസമിലെ സിൽചാറിൽ നിന്നുള്ള ലോക്സഭാ എംപിയായും പ്രവർത്തിച്ചിട്ടുള്ള അവർ വ്യക്തിപരവും രാഷ്ട്രീയവുമായ കാരണങ്ങളാലാണ് പാർട്ടി വിട്ടതെന്നും ഇനി അസം കേന്ദ്രീകരിച്ച് പ്രവർത്തിക്കാനാണ് താല്പര്യമെന്നും വ്യക്തമാക്കി. 2011 മുതൽ തൃണമൂലിനൊപ്പം നിൽക്കുകയും രാജ്യസഭയിൽ പാർട്ടിയുടെ ചീഫ് വിപ്പായി പ്രവർത്തിക്കുകയും ചെയ്ത മുതിർന്ന പാർലമെന്റേറിയനാണ് സുഖേന്ദു ശേഖർ റേ. ആർജി കർ ആശുപത്രി വിവാദം, അഴിമതികൾ, മോശം ഭരണം എന്നിവയെത്തുടർന്ന് നേതൃത്വവുമായി ഉണ്ടായ അഭിപ്രായവ്യത്യാസങ്ങളാണ് തന്റെ തീരുമാനത്തിന് പിന്നിലെന്ന് അദ്ദേഹം വെളിപ്പെടുത്തി. 2023-ൽ രാജ്യസഭയിലെത്തിയ പ്രകാശ് ചിക് ബരായ്ക് ജനവിധി മാനിച്ചാണ് താൻ തൃണമൂൽ വിട്ടതെന്ന് വ്യക്തമാക്കി. അതേസമയം, പ്രതിസന്ധി ഘട്ടത്തിൽ പാർട്ടിയെ വഞ്ചിച്ച നേതാക്കൾക്ക് ജനങ്ങൾ മാപ്പ് നൽകില്ലെന്ന് മുഖ്യമന്ത്രി മമതാ ബാനർജിയും, മുൻപ് പദവികളൊന്നും ലഭിക്കാതിരുന്ന സുഖേന്ദു ശേഖറിന് രാജ്യസഭാ അംഗത്വം നൽകി ആദരിച്ചത് തൃണമൂലാണെന്ന് പാർട്ടി നേതാവ് കുനാൽ ഘോഷും വിമർശിച്ചു. മൂന്ന് നേതാക്കളുടെയും രാജി മൂലം രാജ്യസഭയിൽ ഉണ്ടായ ഒഴിവുകളിലേക്ക് ഉപതിരഞ്ഞെടുപ്പ് നടക്കാനിരിക്കെ, നിലവിലെ നിയമസഭാ ഭൂരിപക്ഷം വെച്ച് ഈ സീറ്റുകൾ പിടിച്ചെടുക്കാനാണ് ബിജെപിയുടെ നീക്കം.
