അമേരിക്കയും ഇറാനും തമ്മിലുള്ള സൈനിക ഏറ്റുമുട്ടൽ പശ്ചിമേഷ്യയെ യുദ്ധക്കളമാക്കുമ്പോൾ, തങ്ങളുടെ സ്വന്തം താല്പര്യങ്ങൾ സംരക്ഷിക്കാനാകാതെ പാകിസ്താൻ കടുത്ത പരിഭ്രാന്തിയിൽ. യുഎസും ഇറാനും തമ്മിൽ അടുത്തിടെ ഒപ്പുവെച്ച ‘ഇസ്‌ലാമാബാദ് സമാധാനക്കരാർ’ (Islamabad Peace Deal MoU) തകരുമെന്ന ഭീതിയിലാണ് പാകിസ്താൻ ഇപ്പോൾ അടിയന്തരമായി യുദ്ധം ഒഴിവാക്കണമെന്ന ആവശ്യവുമായി അന്താരാഷ്ട്ര തലത്തിൽ നെട്ടോട്ടമോടുന്നത്. പാക് സൈനിക മേധാവി ഫീൽഡ് മാർഷൽ അസിം മുനീറിന്റെ നേതൃത്വത്തിൽ യുഎസ്, ഇറാൻ പ്രതിനിധികളോട് യാചനയ്ക്ക് തുല്യമായ രീതിയിലാണ് ഹോട്ട്‌ലൈൻ വഴി ചർച്ചകൾക്ക് ശ്രമിക്കുന്നതെന്ന് ഉന്നത സുരക്ഷാ വൃത്തങ്ങളിൽ നിന്ന് പുറത്തുവരുന്ന വിവരങ്ങൾ വ്യക്തമാക്കുന്നു. എന്നാൽ ഇരു വൻശക്തികളും പാകിസ്താന്റെ ഈ മധ്യസ്ഥശ്രമങ്ങളെ ഗൗരവത്തോടെ കാണുന്നില്ലെന്നാണ് നയതന്ത്ര രംഗത്തെ വിലയിരുത്തൽ.
മേഖലയിൽ തങ്ങളുടെ നയതന്ത്ര പ്രസക്തി നഷ്ടപ്പെടുമെന്ന ഭയത്താൽ സൌദി അറേബ്യ, ഈജിപ്ത്, തുർക്കി, ഖത്തർ തുടങ്ങിയ രാജ്യങ്ങളുടെ സഹായം തേടാനും പാകിസ്താൻ ശ്രമിക്കുന്നുണ്ട്. ഖത്തറിനെ കൂട്ടുപിടിച്ച് ഇരുപത്തിനാല് മണിക്കൂറും ബാക്ക്ചാനൽ ചർച്ചകൾ നടത്തുന്നു എന്ന് അവകാശപ്പെടുമ്പോഴും, യുദ്ധത്തിന്റെ ഗതി മാറ്റാൻ പാകിസ്താന് യാതൊരു സ്വാധീനവുമില്ലെന്നാണ് പശ്ചിമേഷ്യൻ രാഷ്ട്രീയ നിരീക്ഷകർ ചൂണ്ടിക്കാണിക്കുന്നത്. വരും മണിക്കൂറുകളിൽ തങ്ങളുടെ മധ്യസ്ഥശ്രമങ്ങൾ പരാജയപ്പെട്ടാൽ അത് ഇസ്‌ലാമാബാദ് കരാറിന്റെ പൂർണ്ണ തകർച്ചയ്ക്ക് കാരണമാകുമെന്നത് പാകിസ്താന് വലിയ നയതന്ത്ര തിരിച്ചടിയാകും.
ജൂലൈ 17-ന് ജോർദാനിലെ യുഎസ് സൈനിക ക്യാമ്പിന് നേരെ ഇറാൻ നടത്തിയ വ്യോമാക്രമണത്തിൽ രണ്ട് അമേരിക്കൻ സൈനികർ കൊല്ലപ്പെട്ടതോടെയാണ് പാകിസ്താന്റെ സമാധാന മോഹങ്ങൾക്ക് മേൽ കരിനിഴൽ വീണത്. യുഎസ് വ്യോമസേന തുടർച്ചയായി എട്ടാം രാത്രിയും ഇറാന്റെ ഇസ്‌ലാമിക് റെവല്യൂഷണറി ഗാർഡ് കോർപ്സ് (IRGC) താവളങ്ങളും പ്രതിരോധ റഡാറുകളും ബോംബിട്ടു തകർത്തതോടെ പാകിസ്താൻ കൂടുതൽ പ്രതിരോധത്തിലായി.
ഇതിനു പ്രതികാരമായി കുവൈത്തിലുള്ള അമേരിക്കൻ താവളങ്ങളായ ക്യാമ്പ് ഉദൈരി, അലി അൽ സലേം എയർ ബേസ് എന്നിവയ്ക്ക് നേരെ ഇറാൻ നടത്തിയ കാമികാസെ ആത്മഹത്യാ ഡ്രോൺ ആക്രമണം പശ്ചിമേഷ്യയെ വൻ യുദ്ധത്തിലേക്ക് തള്ളിവിട്ടിരിക്കുകയാണ്. കുവൈത്ത് സിറ്റിയിലാകെ അടിയന്തര സൈറണുകൾ മുഴങ്ങിയതോടെ ഭീതിയിലായ പാകിസ്താൻ, യുദ്ധത്തിന്റെ പ്രത്യാഘാതം തങ്ങളുടെ ആഭ്യന്തര സമ്പദ്‌വ്യവസ്ഥയെ തകർക്കുമെന്ന ഭയത്തിലാണ്.
