ന്യൂഡൽഹി : പശ്ചിമേഷ്യയിൽ രൂക്ഷമാകുന്ന സംഘർഷങ്ങളുടെ പശ്ചാത്തലത്തിൽ രാജ്യത്തിന്റെ ഊർജ്ജ സുരക്ഷയും പ്രവാസികളുടെ ക്ഷേമവും വിലയിരുത്തുന്നതിനായി പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ സുരക്ഷാ കാര്യങ്ങൾക്കായുള്ള കാബിനറ്റ് സമിതിയുടെ (സിസിഎസ്) നാലാമത് പ്രത്യേക യോഗം ഡൽഹിയിൽ ചേർന്നു. പ്രതിരോധ മന്ത്രി രാജ്‌നാഥ് സിംഗ്, ആഭ്യന്തര മന്ത്രി അമിത് ഷാ, വിദേശകാര്യ മന്ത്രി എസ്. ജയ്ശങ്കർ, ധനമന്ത്രി നിർമ്മല സീതാരാമൻ, ദേശീയ സുരക്ഷാ ഉപദേഷ്ടാവ് അജിത് ഡോവൽ തുടങ്ങിയ മുതിർന്ന നേതാക്കളും വിവിധ മന്ത്രാലയങ്ങളിലെ ഉന്നത ഉദ്യോഗസ്ഥരും യോഗത്തിൽ പങ്കെടുത്തു. അന്താരാഷ്ട്ര തലത്തിൽ ഉടലെടുത്ത ഈ ഭൗമരാഷ്ട്രീയ പ്രതിസന്ധി ഇന്ത്യയിലെ സാധാരണക്കാരെയും സാമ്പത്തിക മേഖലയെയും ബാധിക്കാതിരിക്കാൻ എല്ലാ മന്ത്രാലയങ്ങളും വകുപ്പുകളും ഒരുമിച്ച് ഏകോപിതമായി പ്രവർത്തിക്കണമെന്ന് പ്രധാനമന്ത്രി നിർദ്ദേശിച്ചു.
രാജ്യത്ത് അസംസ്‌കൃത എണ്ണ, എൽപിജി, എൽഎൻജി എന്നിവയുടെ വിതരണം തടസ്സമില്ലാതെ തുടരുന്നുണ്ടെന്നും ഇന്ധന സ്രോതസ്സുകൾ വിവിധ രാജ്യങ്ങളിലേക്ക് വൈവിധ്യവത്കരിച്ചിട്ടുണ്ടെന്നും കാബിനറ്റ് സെക്രട്ടറി യോഗത്തെ അറിയിച്ചു. വരാനിരിക്കുന്ന റാബി കൃഷി സീസണിൽ കർഷകർക്ക് ആവശ്യമായ വളം തടസ്സമില്ലാതെ ലഭ്യമാക്കുന്നതിനുള്ള മുൻകരുതലുകളും യോഗം വിലയിരുത്തി. പരമ്പരാഗത ഇന്ധനങ്ങളെ മാത്രം ആശ്രയിക്കുന്നത് കുറയ്ക്കാനും, സൗരോർജ്ജം അടക്കമുള്ള പുനരുപയോഗ ഊർജ്ജ സ്രോതസ്സുകളിലേക്ക് അതിവേഗം മാറി ഊർജ്ജ മേഖലയിൽ പൂർണ്ണ സ്വയംപര്യാപ്തത കൈവരിക്കാനും പ്രധാനമന്ത്രി ആഹ്വാനം ചെയ്തു. ഇതിനൊപ്പം യുദ്ധസാഹചര്യമുള്ള കടൽപ്പാതകളിലൂടെ സഞ്ചരിക്കുന്ന കപ്പലുകളിലെ ഇന്ത്യൻ നാവികരുടെയും വിദേശത്തുള്ള പ്രവാസി ഇന്ത്യക്കാരുടെയും സുരക്ഷ ഉറപ്പാക്കാൻ പ്രത്യേക അടിയന്തര സഹായ കേന്ദ്രങ്ങളും കൗൺസിലിംഗും ആരംഭിക്കാനും കേന്ദ്ര സർക്കാർ തീരുമാനിച്ചിട്ടുണ്ട്.
