രാജ്യതലസ്ഥാനത്ത് രാജ്യവിരുദ്ധ മുദ്രാവാക്യങ്ങളുമായി സമരം നയിച്ചവരുടെ യഥാർത്ഥ മുഖം തുറന്നുകാട്ടിയ പ്രമുഖ ദേശീയ ചിന്തകനും ബി.ജെ.പി അനുഭാവിയുമായ ടി. ജി. മോഹൻദാസിന് ജാമ്യം. കേവലം സോഷ്യൽ മീഡിയ പ്രതികരണത്തിന്റെ പേരിൽ വൻ പോലീസ് സന്നാഹവുമായെത്തി അറസ്റ്റ് ചെയ്ത സംസ്ഥാന സർക്കാരിന്റെ നീക്കങ്ങൾക്ക് തിരുവനന്തപുരം എ.സി.ജെ.എം (ACJM) കോടതിയിൽ നിന്ന് നേരിട്ടത് വമ്പൻ തിരിച്ചടി. ടി. ജി. മോഹൻദാസിനെ കസ്റ്റഡിയിൽ വേണമെന്ന പോലീസിന്റെയും പ്രോസിക്യൂഷന്റെയും കടുംപിടുത്തവും അനാവശ്യ വാദങ്ങളും തള്ളിയാണ് കോടതി അദ്ദേഹത്തിന് ഉപാധികളോടെ ജാമ്യം അനുവദിച്ചത്.
ദില്ലിയിൽ സമരം ചെയ്ത ചിലർക്കെതിരെ ദേശീയ താൽപ്പര്യം മുൻനിർത്തി അഭിപ്രായം പറഞ്ഞതിനാണ് ടി. ജി. മോഹൻദാസിനെതിരെ ജാമ്യമില്ലാ വകുപ്പുകൾ ചുമത്തി പോലീസ് കേസെടുത്തത്. ഭാരതീയ ന്യായ സംഹിത (BNS) പ്രകാരം കലാപത്തിന് ആഹ്വാനം ചെയ്യൽ (BNS 192), സമൂഹത്തിൽ ശത്രുത പരത്തൽ (BNS 353(1)(b)), സ്ത്രീത്വത്തെ അപമാനിക്കൽ (BNS 79), കെ.പി ആക്ട് 120(o) തുടങ്ങി ഭീകര വകുപ്പുകളാണ് അദ്ദേഹത്തിന് മേൽ അടിച്ചേൽപ്പിക്കാൻ ശ്രമിച്ചത്. എന്നാൽ അന്വേഷണവുമായി പൂർണ്ണമായി സഹകരിച്ച വ്യക്തിയെ വേട്ടയാടാനാണ് പ്രോസിക്യൂഷൻ ശ്രമിച്ചതെന്ന് കോടതിക്ക് മുന്നിൽ വ്യക്തമായി.
അന്വേഷണത്തിന് കസ്റ്റഡി അനിവാര്യമാണെന്ന പ്രോസിക്യൂഷന്റെ വാദങ്ങൾ കോടതിയിൽ പൂർണ്ണമായും പൊളിഞ്ഞു വീണു. കൃത്യമായ നടപടിക്രമങ്ങൾ പാലിക്കാതെയും മുൻകൂട്ടി കസ്റ്റഡി അപേക്ഷ നൽകാതെയുമാണ് പോലീസ് രാഷ്ട്രീയ സമ്മർദ്ദത്താൽ കസ്റ്റഡി ആവശ്യപ്പെട്ടതെന്ന് പ്രതിഭാഗം അഭിഭാഷകൻ ശക്തമായി വാദിച്ചു. പോലീസ് വീട്ടിലെത്തി എല്ലാ രേഖകളും ഫോണും നേരത്തെ തന്നെ പിടിച്ചെടുത്തിട്ടുണ്ടെന്നും, അന്വേഷണവുമായി പൂർണ്ണമായി സഹകരിച്ച വ്യക്തിയെ വീണ്ടും തടവിൽ പാർപ്പിക്കുന്നത് രാഷ്ട്രീയ വൈരാഗ്യം തീർക്കാനാണെന്നും കോടതിക്ക് ബോധ്യപ്പെട്ടു.
