സാങ്കേതികവിദ്യ യുദ്ധത്തിലെ പോരാട്ടങ്ങളുടെ ദൈർഘ്യം കുറയ്ക്കുന്നുണ്ടെങ്കിലും യുദ്ധത്തിന്റെ ദൈർഘ്യം അതേ രീതിയിൽ കുറയണമെന്നില്ലെന്ന് കരസേനാ മേധാവി ജനറൽ ധീരജ് സേത്ത്. യുദ്ധത്തിലെ വിജയത്തിന്റെ വ്യക്തമായ മാനദണ്ഡമായി കരയിലെ നിയന്ത്രണവും പ്രദേശം കൈവശപ്പെടുത്തി സുരക്ഷിതമാക്കാനുള്ള ശേഷിയും തുടർന്നും പ്രസക്തമായിരിക്കുമെന്നും അദ്ദേഹം പറഞ്ഞു. എൻഡിടിവി ഡിഫൻസ് സമ്മിറ്റ് 2026ൽ സംസാരിക്കുകയായിരുന്നു അദ്ദേഹം.
സാമൂഹ്യമാധ്യമങ്ങളിൽ ലോകമെമ്പാടുമുള്ള യുദ്ധങ്ങളെക്കുറിച്ച് നിരന്തരം വിവരങ്ങളും ദൃശ്യങ്ങളും പ്രചരിക്കുന്ന സാഹചര്യത്തിൽ യഥാർഥ യുദ്ധചിത്രം പലപ്പോഴും ആശയക്കുഴപ്പത്തിലാകുന്നുവെന്ന് ജനറൽ സേത്ത് ചൂണ്ടിക്കാട്ടി. എന്നാൽ ഈ ആശയക്കുഴപ്പങ്ങൾക്കിടയിലും മാറാത്ത ഒരു യാഥാർഥ്യമുണ്ട്; യുദ്ധവിജയത്തിന്റെ ഏറ്റവും വ്യക്തമായതും പ്രായോഗികവുമായ ഘടകം ഭൂമിയിലെ നിയന്ത്രണമാണെന്നാണ് അദ്ദേഹത്തിന്റെ നിലപാട്. ഒരു പ്രദേശം കൈവശപ്പെടുത്തുകയും സുരക്ഷിതമാക്കുകയും പ്രതിരോധിക്കുകയും ചെയ്യുന്നത് സൈനിക ശക്തിയിലൂടെയാണെന്നും അദ്ദേഹം പറഞ്ഞു.
സൈനിക ശേഷി വികസിപ്പിക്കുമ്പോൾ യുദ്ധഭൂമിയിൽ നേരിട്ട് നിലയുറപ്പിക്കുന്ന സൈനികനെയാണ് കേന്ദ്രബിന്ദുവാക്കേണ്ടതെന്നും കരസേനാ മേധാവി വ്യക്തമാക്കി. വികസിപ്പിക്കുന്ന ഓരോ സാങ്കേതികവിദ്യയും സൈനികന്റെ പ്രവർത്തനശേഷിയെ എങ്ങനെ മെച്ചപ്പെടുത്തുന്നു എന്നതാണ് പ്രധാന ചോദ്യമാകേണ്ടതെന്നും അദ്ദേഹം പറഞ്ഞു.
1971ലെ ബംഗ്ലാദേശ് വിമോചനയുദ്ധത്തിന്റെ അവസാനഘട്ടത്തിൽ പാകിസ്താൻ സൈനികർ കീഴടങ്ങുന്ന ചിത്രം ഓർമിപ്പിച്ചുകൊണ്ടായിരുന്നു ജനറൽ സേത്തിന്റെ പരാമർശം. 1971 ഡിസംബർ 16ലെ ആ ചിത്രം യുദ്ധം അവസാനിച്ചുവെന്ന വ്യക്തമായ നിമിഷത്തെ അടയാളപ്പെടുത്തിയിരുന്നു. എന്നാൽ ഇന്നത്തെ സംഘർഷങ്ങളിൽ യുദ്ധം അവസാനിക്കുന്നതായി രേഖപ്പെടുത്താവുന്ന വ്യക്തമായ നിമിഷമോ അതിർത്തിരേഖയോ പലപ്പോഴും കാണാനാകുന്നില്ലെന്നും അദ്ദേഹം പറഞ്ഞു.
സംഘർഷങ്ങളുടെ കാലയളവ് കൂടുതൽ അനിശ്ചിതമാകുകയാണെന്നും ഇടയ്ക്കിടെ ശക്തമായ പോരാട്ടങ്ങൾ ഉണ്ടാകുന്ന രീതിയാണ് രൂപപ്പെടുന്നതെന്നും ജനറൽ സേത്ത് ചൂണ്ടിക്കാട്ടി. സാങ്കേതികവിദ്യ യുദ്ധത്തിലെ ഓരോ പോരാട്ടത്തിന്റെയും ദൈർഘ്യം കുറയ്ക്കുന്നുണ്ടെങ്കിലും യുദ്ധം തന്നെ അവസാനിപ്പിക്കണമെന്നില്ലെന്നും അദ്ദേഹം പറഞ്ഞു. സംഘർഷത്തിനിടയിലെ ഇടവേളകൾ പോലും ഇപ്പോൾ സൈനിക തന്ത്രത്തിന്റെ ഭാഗമാകുന്നുവെന്നും അദ്ദേഹം കൂട്ടിച്ചേർത്തു.
ദീർഘകാലം നീളുന്ന പ്രതിസന്ധികളെ നേരിടാൻ പ്രതിരോധ മേഖലയിലെ സ്വയംപര്യാപ്തത അനിവാര്യമാണെന്നും ജനറൽ സേത്ത് പറഞ്ഞു. മറ്റ് രാജ്യങ്ങളിൽനിന്നുള്ള വിതരണത്തെ ആശ്രയിക്കാതെ പ്രതിസന്ധി ഘട്ടങ്ങളിൽ ദീർഘകാലം നിലനിൽക്കാനുള്ള ശേഷിയാണ് ആത്മനിർഭരതയിലൂടെ ലക്ഷ്യമിടേണ്ടതെന്നും അദ്ദേഹം വ്യക്തമാക്കി.
അതേസമയം, സാങ്കേതികവിദ്യയുടെ വളർച്ചയുടെ വേഗത്തേക്കാൾ സൈനിക ശേഷി വികസിപ്പിക്കുന്നതിനുള്ള സമയം കൂടുതലാണെന്ന വെല്ലുവിളിയും അദ്ദേഹം ചൂണ്ടിക്കാട്ടി. തദ്ദേശീയമായി വികസിപ്പിക്കുന്ന സാങ്കേതികവിദ്യകൾ തന്നെ ഉപയോഗത്തിലാകുമ്പോഴേക്കും കാലഹരണപ്പെടുന്ന സാഹചര്യം ഒഴിവാക്കേണ്ടതുണ്ടെന്നും അദ്ദേഹം പറഞ്ഞു. സാങ്കേതികവിദ്യ മാറുന്ന വേഗത്തിനനുസരിച്ച് പ്രതിരോധ ശേഷിയും തുടർച്ചയായി നവീകരിക്കേണ്ടതുണ്ടെന്നാണ് കരസേനാ മേധാവിയുടെ സന്ദേശം.
