തിരുവനന്തപുരം: തനിക്കെതിരെ കാപ്പ (KAAPA) ചുമത്തി ജയിലിലടച്ചത് പൂർണ്ണമായും രാഷ്ട്രീയ പകപോക്കലിന്റെ ഭാഗമായാണെന്ന് തിരുവനന്തപുരം കോർപറേഷനിലെ വാഴോട്ടുകോണം ബി.ജെ.പി കൗൺസിലർ ആർ. സുഗതൻ. ഹൈക്കോടതി ഉത്തരവിലൂടെ കാപ്പ പ്രകാരമുള്ള കരുതൽ തടങ്കൽ റദ്ദാക്കപ്പെട്ട് നാല് മാസത്തെ ജയിൽവാസത്തിന് ശേഷം പുറത്തിറങ്ങിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. പോലീസിന്റെ ‘ഓപ്പറേഷൻ തൂഫാൻ’ ലഹരിവിരുദ്ധ റെയ്ഡുകൾ നടക്കേണ്ടത് ജയിലിനുള്ളിലാണെന്നും, സംസ്ഥാനത്തെ പ്രധാന ലഹരി കച്ചവടം നടക്കുന്നത് ജയിലുകൾക്കുള്ളിലാണെന്നും സുഗതൻ തുറന്നടിച്ചു.
ജനകീയ ആവശ്യങ്ങൾക്കായും നാടിന്റെ വികസനത്തിനായും ഇനിയും ജയിലിൽ പോകാൻ മടിയില്ലെന്ന് സുഗതൻ വ്യക്തമാക്കി. ജനപ്രതിനിധി സ്ഥാനത്തുനിന്ന് തന്നെ ഒഴിവാക്കാനും വികസന പോരാട്ടങ്ങളെ തളർത്താനും സംസ്ഥാനം ഭരിക്കുന്ന പാർട്ടിയും സർക്കാരും ചേർന്ന് നടത്തിയ ആസൂത്രിത രാഷ്ട്രീയ നീക്കമാണ് തനിക്കെതിരെയുണ്ടായത്. വട്ടിയൂർക്കാവ് ജംഗ്ഷൻ വികസനവുമായി ബന്ധപ്പെട്ട് എട്ടു വർഷം മുൻപ് ആരംഭിച്ച ജനകീയ സമരത്തിന്റെ സംഘാടകനായി പ്രവർത്തിച്ചതു മുതലാണ് ഭരണകൂടം തന്നെ ലക്ഷ്യമിടാൻ തുടങ്ങിയത്. ഫണ്ട് അനുവദിച്ചിട്ടും വികസനം നടപ്പിലാക്കാത്തതിനെതിരെ പ്രദേശത്തെ ക്ലബ്ബുകളെയും അസോസിയേഷനുകളെയും ഏകോപിപ്പിച്ച് നടത്തിയ സമരത്തിന്റെ പേരിലാണ് തനിക്കെതിരെ ഗുണ്ടാ ആക്ട് ചുമത്തിയതെന്നും അദ്ദേഹം ആരോപിച്ചു.
പ്രതിസന്ധി ഘട്ടത്തിൽ ഒപ്പം നിന്ന പാർട്ടി പ്രവർത്തകർക്കും, വാർഡിലെ ജനങ്ങൾക്കും, മേയർ വി.വി. രാജേഷിനും, മറ്റ് കൗൺസിലർമാർക്കും അഭിഭാഷകർക്കും സുഗതൻ നന്ദി അറിയിച്ചു. സർക്കാരിന്റെ കരിനിയമങ്ങൾ കൊണ്ടും വ്യാജ കേസുകൾ കൊണ്ടും ജനപ്രതിനിധികളെയും ജനകീയ സമരങ്ങളെയും അടിച്ചമർത്താനാവില്ലെന്ന് സുഗതന്റെ മോചനത്തോടെ തെളിഞ്ഞിരിക്കുകയാണെന്ന് ബി.ജെ.പി നേതൃത്വം പ്രതികരിച്ചു.
