ഇന്ത്യ-വെസ്റ്റ് ഇൻഡീസ് അഞ്ച് മത്സര ടി20 പരമ്പരയിലെ രണ്ടാം മത്സരത്തിലും വൈഭവ് സൂര്യവംശിക്ക് ബെഞ്ചിൽ തന്നെ തുടരേണ്ടി വരുമെന്ന് മുൻ ഇന്ത്യൻ താരം ദിനേശ് കാർത്തിക്. ആദ്യ ടി20യിൽ എട്ട് വിക്കറ്റിന്റെ വിജയം സ്വന്തമാക്കി പരമ്പരയിൽ 1-0ന് മുന്നിലെത്തിയ ഇന്ത്യ, ഒക്ടോബർ 9ന് റാഞ്ചിയിൽ നടക്കുന്ന രണ്ടാം മത്സരത്തിനായി ഒരുങ്ങുകയാണ്.
2026ലെ ഏഷ്യൻ ഗെയിംസിലെ ഇന്ത്യയുടെ വിജയകരമായ ക്യാംപെയ്‌നിൽ ഭാഗമായിരുന്ന വൈഭവ് സൂര്യവംശി, വെസ്റ്റ് ഇൻഡീസിനെതിരായ ആദ്യ ടി20യിലും പ്ലേയിങ് ഇലവനിൽ ഇടം നേടിയിരുന്നില്ല. അഭിഷേക് ശർമ്മയും സഞ്ജു സാംസണും വീണ്ടും ഓപ്പണിങ് സ്ഥാനങ്ങളിലേക്ക് എത്തിയതോടെയാണ് വൈഭവിന് അവസരം നഷ്ടമായത്. അതേസമയം, അവസാന നാല് ഇന്നിങ്സുകളിൽ വെറും 29 റൺസ് മാത്രമാണ് സഞ്ജുവിന്റെ സമ്പാദ്യം. വെസ്റ്റ് ഇൻഡീസിനെതിരായ ആദ്യ ടി20യിൽ നേടിയ 11 റൺസും ഇതിൽ ഉൾപ്പെടുന്നു.
എന്നാൽ ഈ ഘട്ടത്തിൽ സഞ്ജു സാംസണെ മാറ്റുന്നത് നീതിയുക്തമല്ലെന്നാണ് ദിനേഷ് കാർത്തിക്കിന്റെ നിലപാട്. പരമ്പരയിൽ കൂടുതൽ താരങ്ങൾക്ക് അവസരം നൽകാനാണ് ടീം മാനേജ്‌മെന്റിന്റെ പദ്ധതിയെങ്കിൽ പ്രിൻസ് യാദവിനെയും നിതീഷ് കുമാർ റെഡ്ഡിയെയും രണ്ടാം മത്സരത്തിൽ പ്ലേയിങ് ഇലവനിൽ ഉൾപ്പെടുത്താൻ സാധ്യതയുണ്ടെന്നും കാർത്തിക് പറഞ്ഞു. “കഴിയുന്നത്ര താരങ്ങളെ പരീക്ഷിക്കാനാണ് അവർ ആഗ്രഹിക്കുന്നതെന്ന് ഞാൻ കേട്ടിട്ടുണ്ട്. അതുകൊണ്ട് പ്രിൻസ് യാദവിനും നിതീഷ് കുമാർ റെഡ്ഡിക്കും പ്ലേയിങ് ഇലവനിൽ അവസരം ലഭിക്കാം.
വൈഭവ് സൂര്യവംശി വളരെ കൗതുകകരമായ താരമാണ്. ലോക ചാമ്പ്യൻ ബാറ്ററാണ്, ഈ തലത്തിൽ ഇതുവരെ പൂർണമായി തെളിയിച്ചിട്ടില്ലെങ്കിലും അദ്ദേഹത്തെ തടയാൻ ആർക്കും കഴിയില്ല. ആ പ്രായത്തിൽ പുറത്തിരുന്ന് അവസരത്തിനായി കാത്തിരിക്കുന്നത് സ്വാഭാവികമായും അദ്ദേഹത്തെ കൂടുതൽ വിശപ്പുള്ളവനാക്കും. പക്ഷേ സഞ്ജു സാംസൺ പുറത്താകാതെ വൈഭവിന് ടീമിൽ ഇടം കണ്ടെത്താൻ ബുദ്ധിമുട്ടാണ്. ഇപ്പോഴത്തെ സാഹചര്യത്തിൽ സഞ്ജുവിനെ മാറ്റുന്നത് അനീതിയാണെന്നാണ് ഞാൻ കരുതുന്നത്,” ക്രിക്ക്ബസിനോട് ദിനേഷ് കാർത്തിക് പറഞ്ഞു.
അതേസമയം, പരിക്കിനെ തുടർന്ന് ഏറെക്കാലമായി ടീമിന് പുറത്തായിരുന്ന പ്രിൻസ് യാദവിനും തിരിച്ചുവരവിന്റെ സാധ്യതയുണ്ട്. ജൂലൈയിൽ സിംബാബ്‌വെ പര്യടനത്തിനിടെയാണ് താരത്തിന് ഹാംസ്ട്രിങ് പരിക്ക് സംഭവിച്ചത്. നിതീഷ് കുമാർ റെഡ്ഡി അഫ്ഗാനിസ്ഥാനെതിരായ ടി20 പരമ്പരയിലൂടെയാണ് പരിക്കിന് ശേഷം തിരിച്ചെത്തിയത്. വെസ്റ്റ് ഇൻഡീസിനെതിരായ ഏകദിന പരമ്പരയ്ക്കുള്ള ടീമിൽ അവസാന നിമിഷം ഉൾപ്പെടുത്തിയെങ്കിലും ഉയർന്ന സ്കോറുകൾ പിറന്ന മത്സരങ്ങളിൽ പ്രതീക്ഷിച്ച പ്രകടനം പുറത്തെടുക്കാൻ താരത്തിന് കഴിഞ്ഞിരുന്നില്ല.
സഞ്ജു സാംസണെ കുറിച്ചുള്ള സമ്മർദ്ദം ഇപ്പോൾ അനാവശ്യമായി വർധിക്കുന്നുണ്ടെന്നും മുൻ ഇന്ത്യൻ താരം അജിങ്ക്യ രഹാനെയും അഭിപ്രായപ്പെട്ടു. അടുത്ത മൂന്ന്-നാല് ടി20 മത്സരങ്ങൾ സഞ്ജുവിനെ സംബന്ധിച്ച് നിർണായകമാണെന്നും ഈ മത്സരങ്ങളിൽ മികച്ച പ്രകടനം നടത്തിയാൽ കാര്യങ്ങൾ മാറുമെന്നും രഹാനെ വ്യക്തമാക്കി. സഞ്ജു പരാജയപ്പെട്ടാൽ വൈഭവ് സൂര്യവംശിക്ക് അവസരം നൽകണമെന്ന ആവശ്യം ശക്തമാകുമെന്നും അദ്ദേഹം ചൂണ്ടിക്കാട്ടി.
വൈഭവ് സൂര്യവംശിയെ തിടുക്കത്തിൽ പ്ലേയിങ് ഇലവനിൽ ഉൾപ്പെടുത്തുന്നത് തിരിച്ചടിയാകാമെന്നും രഹാനെ മുന്നറിയിപ്പ് നൽകി. താരത്തിന്റെ കഴിവുകൾ വ്യത്യസ്തമാണെങ്കിലും ടീമിന്റെ കോമ്പിനേഷൻ ഉൾപ്പെടെ നിരവധി ഘടകങ്ങൾ പരിഗണിച്ച ശേഷമേ അന്തിമ തീരുമാനം എടുക്കാനാകൂ എന്നാണ് അദ്ദേഹത്തിന്റെ വിലയിരുത്തൽ.
