ഒരു നിമിഷത്തെ ചെറിയൊരു അശ്രദ്ധ മതി, നിങ്ങളുടെ ബാങ്ക് അക്കൗണ്ടിലെ സമ്പാദ്യം മുഴുവൻ നിമിഷനേരം കൊണ്ട് തട്ടിയെടുക്കാൻ. ലോകമെമ്പാടുമുള്ള കോടിക്കണക്കിന് ആളുകൾ ഉപയോഗിക്കുന്ന പ്രമുഖ സന്ദേശമയയ്ക്കൽ ആപ്പായ വാട്സ്ആപ്പ് ഇപ്പോൾ സൈബർ തട്ടിപ്പുകാരുടെ പ്രധാന താവളമായി മാറിയിരിക്കുകയാണ്. വ്യാജ ഓഫറുകൾ, പ്രമുഖരുടെ പേരിലുള്ള വ്യാജ പ്രൊഫൈലുകൾ, അപകടകരമായ എപികെ ഫയലുകൾ, വ്യാജ നിക്ഷേപ പദ്ധതികൾ തുടങ്ങി ഒമ്പതോളം പുതിയ രീതികളിലാണ് തട്ടിപ്പുകാർ ആളുകളെ കുരുക്കുന്നത്. വിശ്വസനീയമെന്ന് തോന്നുന്ന സന്ദേശങ്ങൾ പോലും ലക്ഷകണക്കിന് രൂപയുടെ സാമ്പത്തിക നഷ്ടത്തിനും വ്യക്തിഗത വിവരങ്ങൾ ചോരുന്നതിനും കാരണമാകുന്നുണ്ടെന്ന് സൈബർ വിദഗ്ധർ മുന്നറിയിപ്പ് നൽകുന്നു.
പ്രമുഖരുടെ പേരിലുള്ള ആൾമാറാട്ട തട്ടിപ്പാണ് ഇതിൽ ഏറ്റവും പ്രധാനം. പരിചയമുള്ളവരുടെയോ രാജ്യത്തെ പ്രമുഖ വ്യക്തികളുടെയോ പേരും ചിത്രവും ഉപയോഗിച്ച് വ്യാജ അക്കൗണ്ടുകൾ ഉണ്ടാക്കിയാണ് ഇവർ പണം തട്ടുന്നത്. മുൻ രാജ്യസഭാംഗം നരേഷ് ഗുജ്റാളിന്റെ പേരിൽ ആൾമാറാട്ടം നടത്തി അദ്ദേഹത്തിന്റെ കമ്പനിയിലെ മുതിർന്ന ധനകാര്യ ഉദ്യോഗസ്ഥനെ കബളിപ്പിച്ച് 7.8 കോടി രൂപ തട്ടിയെടുത്ത സംഭവം അടുത്തിടെ വലിയ ചർച്ചയായിരുന്നു. ഇതിന് പുറമെ കമ്പനി മേധാവികളുടെയും സർക്കാർ ഏജൻസി പ്രതിനിധികളുടെയും പേരിൽ വ്യാജ സന്ദേശങ്ങളും അപകടകരമായ ഫയലുകളും അയച്ച് സ്ഥാപനങ്ങളുടെ രഹസ്യ വിവരങ്ങളും വാട്സ്ആപ്പ് അക്കൗണ്ടുകളുടെ നിയന്ത്രണവും കൈക്കലാക്കുന്ന സിഇഒ തട്ടിപ്പുകളും സജീവമാണ്.
ഓഹരി വിപണിയിലും മറ്റ് ഓൺലൈൻ പദ്ധതികളിലും ഉയർന്ന ലാഭം വാഗ്ദാനം ചെയ്ത് വ്യാജ ആപ്പുകൾ ഡൗൺലോഡ് ചെയ്യിപ്പിച്ച് പണം തട്ടിയെടുക്കുന്ന നിക്ഷേപ തട്ടിപ്പുകൾ മറ്റൊരു വലിയ ഭീഷണിയാണ്. വ്യാജ ലാഭക്കണക്കുകൾ കാണിച്ച് ഇരകളെ വിശ്വസിപ്പിച്ച ശേഷം പണം പിൻവലിക്കാൻ ശ്രമിക്കുമ്പോൾ തട്ടിപ്പുകാർ അപ്രത്യക്ഷരാകുന്നു. ഉപയോക്താക്കളുടെ അക്കൗണ്ടുകൾ മറ്റൊരു ഡിവൈസിലേക്ക് രഹസ്യമായി മാറ്റുന്ന ‘ഗോസ്റ്റ് പെയറിങ്’ (Ghost Pairing) രീതിയും ക്യൂആർ കോഡ് തട്ടിപ്പുകളും വ്യാപകമായി നടക്കുന്നുണ്ട്.
ഏറ്റവും പുതിയതും അപകടകരവുമായ ഒന്നാണ് വ്യാജ വിവാഹ ക്ഷണക്കത്തുകൾ വഴിയുള്ള തട്ടിപ്പ്. സാധാരണ ചിത്രങ്ങൾക്കോ പിഡിഎഫുകൾക്കോ പകരം എപികെ (APK) ഫയലുകളായിട്ടാണ് വിവാഹക്കത്തുകൾ എത്തുന്നത്. ഇത് ഫോണിൽ ഇൻസ്റ്റാൾ ചെയ്യുന്നതോടെ ഫോണിന്റെ പൂർണ്ണ നിയന്ത്രണം ഹാക്കർമാരുടെ കൈകളിൽ എത്തുകയും ബാങ്കിംഗ് വിവരങ്ങളും ഒടിപികളും ചോർത്തപ്പെടുകയും ചെയ്യും. സമാനമായ രീതിയിൽ എട്ടാം ശമ്പള കമ്മീഷൻ ശമ്പള കാൽക്കുലേറ്ററുകൾ, ബാങ്ക് റിവാർഡ് പോയിന്റുകൾ പണമാക്കി മാറ്റാമെന്നുള്ള വ്യാജ സന്ദേശങ്ങൾ, യൂട്യൂബ് വീഡിയോകൾ ലൈക്ക് ചെയ്താൽ പണം നൽകുന്ന വ്യാജ ജോലി വാഗ്ദാനങ്ങൾ, ക്രെഡിറ്റ് കാർഡ് പരിധി ഉയർത്താമെന്ന വ്യാജേനയുള്ള കെവൈസി തട്ടിപ്പുകൾ എന്നിവയും വാട്സ്ആപ്പ് വഴി വ്യാപകമായി നടക്കുന്നുണ്ട്.
ഇത്തരം തട്ടിപ്പുകളിൽ നിന്ന് രക്ഷനേടാൻ ഉപയോക്താക്കൾ അതീവ ജാഗ്രത പാലിക്കണമെന്ന് പൊലീസ് നിർദ്ദേശിക്കുന്നു. പരിചയമുള്ളവരാണെങ്കിൽ പോലും പണമോ വ്യക്തിഗത വിവരങ്ങളോ ആവശ്യപ്പെട്ട് സന്ദേശം വന്നാൽ നേരിട്ട് ഫോണിൽ വിളിച്ച് ഉറപ്പുവരുത്തുക. അപരിചിതമായ നമ്പറുകളിൽ നിന്നോ സ്രോതസ്സുകളിൽ നിന്നോ വരുന്ന ലിങ്കുകളോ എപികെ ഫയലുകളോ യാതൊരു കാരണവശാലും ഡൗൺലോഡ് ചെയ്യരുത്. പ്ലേ സ്റ്റോറിന് പുറത്തുനിന്നുള്ള ആപ്പുകൾ ഇൻസ്റ്റാൾ ചെയ്യുന്നത് ഫോണിൽ ബ്ലോക്ക് ചെയ്തുവെക്കുക. ഒടിപികളും പാസ്‌വേഡുകളും ആരുമായും പങ്കുവെക്കാതിരിക്കുക. സൈബർ തട്ടിപ്പിനിരയായാൽ ഉടൻ തന്നെ ദേശീയ സൈബർ ഹെൽപ്പ് ലൈൻ നമ്പറായ 1930-ലോ cybercrime.gov.in എന്ന ഔദ്യോഗിക പോർട്ടലിലോ പരാതിപ്പെടേണ്ടതാണ്.
