ശ്രീനഗർ: ജമ്മു കശ്മീരിലെ കുൽഗാം ജില്ലയിൽ സുരക്ഷാ സേനയും ഭീകരരും തമ്മിൽ ഏറ്റുമുട്ടൽ തുടരുന്നു. സി.ആർ.പി.എഫ് ചെക്ക്പോസ്റ്റിനു നേരെ ആക്രമണം നടത്തിയ ലഷ്കർ-ഇ-തൊയ്ബ കമാൻഡർ മുഹമ്മദ് ലത്തീഫ് ഭട്ടിനെ ലക്ഷ്യമിട്ടാണ് സുരക്ഷാ സേന തെരച്ചിലും ഏറ്റുമുട്ടലും ശക്തമാക്കിയിരിക്കുന്നത്.
കഴിഞ്ഞ ദിവസം കുൽഗാമിലുണ്ടായ ഏറ്റുമുട്ടലിൽ ലത്തീഫ് ഭട്ടിന്റെ സഹായിയായ ഉമർ നിസാർ ദർ കൊല്ലപ്പെട്ടിരുന്നു. തുടർന്ന് ഒളിവിൽ കഴിയുന്ന ലത്തീഫ് ഭട്ടിനായി സുരക്ഷാ സേന പ്രദേശം മുഴുവൻ വളഞ്ഞ് തെരച്ചിൽ ഊർജിതമാക്കിയിരിക്കുകയാണ്. പ്രദേശത്ത് കനത്ത ജാഗ്രതാ നിർദ്ദേശം നൽകിയിട്ടുണ്ട്.
നവംബർ 11-ന് സി.ആർ.പി.എഫ് (CRPF) ചെക്ക്പോസ്റ്റിനു നേരെ ആക്രമണം നടത്തുന്നതിന് മുൻപ്, ലഷ്കർ-ഇ-തൊയ്ബ കമാൻഡർ മുഹമ്മദ് ലത്തീഫ് ഭട്ടും കൂട്ടാളി ഉമർ നിസാർ ദറും പ്രദേശത്ത് ചുറ്റിപ്പറ്റി ലക്ഷ്യങ്ങൾ നിരീക്ഷിക്കുന്നതിന്റെ സി.സി.ടി.വി ദൃശ്യങ്ങൾ അന്വേഷണ ഉദ്യോഗസ്ഥർ പുറത്തുവിട്ടിട്ടുണ്ട്.
ലഷ്കർ ഭീകരർക്ക് കഴിഞ്ഞ ആറുമാസത്തോളമായി ഒളിത്താവളവും മറ്റ് സഹായങ്ങളും നൽകിയിരുന്നത് ഉമർ നിസാർ ദറാണെന്ന് അന്വേഷണത്തിൽ വ്യക്തമായിട്ടുണ്ട്. മുൻപ് കല്ലേറു കേസുകളിൽ ഉൾപ്പെട്ടിട്ടുള്ള ഇയാൾ, കുടുംബത്തിന്റെ പരാതിയെ തുടർന്ന് കാണാതായതായി റിപ്പോർട്ട് ചെയ്യപ്പെട്ടിരുന്നു. തുടർന്ന് പാകിസ്ഥാൻ ആസ്ഥാനമായുള്ള ഭീകര സംഘടനയുടെ നിഴൽ സംഘടനയായ ‘ദി റെസിസ്റ്റൻസ് ഫ്രണ്ടിൽ’ ചേരുകയായിരുന്നു.
ഏറ്റുമുട്ടലിൽ ഉമർ നിസാർ ദർ കൊല്ലപ്പെടുകയും, വെടിയേറ്റ ലത്തീഫ് ഭട്ട് രക്ഷപ്പെടുകയും ചെയ്തിരുന്നു. കാൽനടയായും മറ്റും വനമേഖലയിലേക്ക് കടന്നുകളഞ്ഞ ഇയാൾക്കായി സുരക്ഷാ സേനയും പൊലീസും സംയുക്തമായി പ്രദേശം വളഞ്ഞ് തെരച്ചിൽ ശക്തമാക്കിയിരിക്കുകയാണ്. കശ്മീർ ഉപതാഴ്വരയിലെ സജീവമായ പ്രധാനപ്പെട്ട ലോക്കൽ ഭീകരരിൽ ഒരാളാണ് ലത്തീഫ് ഭട്ട്.








