2027-ൽ നടക്കാനിരിക്കുന്ന ഉത്തർപ്രദേശ് നിയമസഭാ തിരഞ്ഞെടുപ്പിൽ സമാജ്വാദി പാർട്ടിയുമായി (എസ്.പി) സീറ്റ് വിഭജന ചർച്ചകൾ നടത്തുന്നതിനായി പ്രിയങ്കാ ഗാന്ധി വാദ്രയുടെ നേതൃത്വത്തിൽ കോൺഗ്രസ് അഞ്ചംഗ ഉന്നതതല സമിതി രൂപീകരിച്ചു. കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ ഡൽഹിയിലെ വസതിയിൽ ചേർന്ന നിർണ്ണായക നേതൃയോഗത്തിലാണ് ഈ തീരുമാനമുണ്ടായത്. പ്രിയങ്കാ ഗാന്ധിയെ കൂടാതെ എ.ഐ.സി.സി സംഘടനാ ജനറൽ സെക്രട്ടറി കെ.സി. വേണുഗോപാൽ, ഉത്തർപ്രദേശിന്റെ ചുമതലയുള്ള രാജേന്ദ്ര പാൽ ഗൗതം, സംസ്ഥാന കോൺഗ്രസ് അധ്യക്ഷ ആരാധന മിശ്ര, വർക്കിംഗ് പ്രസിഡന്റ് ഇമ്രാൻ മസൂദ് എന്നിവരാണ് സമിതിയിലെ മറ്റ് അംഗങ്ങൾ. സമാജ്വാദി പാർട്ടി കോൺഗ്രസിന്റെ പ്രധാന സഖ്യകക്ഷിയാണെന്നും, പരസ്പര ബഹുമാനത്തോടെയും മാന്യമായും വേണം സീറ്റ് വിഭജന ചർച്ചകൾ മുന്നോട്ട് കൊണ്ടുപോകാനെന്നും ലോക്സഭാ പ്രതിപക്ഷ നേതാവ് രാഹുൽ ഗാന്ധി യോഗത്തിൽ നേതാക്കൾക്ക് നിർദ്ദേശം നൽകി.
403 അംഗ ഉത്തർപ്രദേശ് നിയമസഭയിലേക്ക് 181 സീറ്റുകളിൽ മത്സരിക്കാൻ ആഗ്രഹിക്കുന്നതായി കോൺഗ്രസ് നേരത്തെ നിലപാടെടുത്തിരുന്നു. എന്നാൽ, സമാജ്വാദി പാർട്ടിയുടെ സിറ്റിംഗ് എം.എൽ.എമാരുള്ള 22 മണ്ഡലങ്ങളും 2022-ൽ രണ്ടാം സ്ഥാനത്തെത്തിയ നിരവധി സീറ്റുകളും കോൺഗ്രസിന്റെ പട്ടികയിലുണ്ടെന്ന് ചൂണ്ടിക്കാട്ടി എസ്.പി നേതാക്കൾ ഇതിനോട് വിയോജിപ്പ് പ്രകടിപ്പിച്ചിട്ടുണ്ട്. സീറ്റ് വിഭജന ഫോർമുലയിൽ ധാരണയാകാത്തതിനെ തുടർന്ന് ചൊവ്വാഴ്ച നടക്കാനിരുന്ന സഖ്യകക്ഷികളുടെ ആദ്യ യോഗം മാറ്റിവെക്കുകയും ചെയ്തു. സഖ്യകക്ഷികളെക്കുറിച്ച് അനാവശ്യമായ പരസ്യ പ്രസ്താവനകൾ നടത്തരുതെന്ന് രാജേന്ദ്ര പാൽ ഗൗതമിനോടും ഇമ്രാൻ മസൂദിനോടും ഖാർഗെയും രാഹുൽ ഗാന്ധിയും കർശനമായി നിർദ്ദേശിച്ചിട്ടുണ്ട്.
അതേസമയം, സ്ഥാനാർത്ഥികളുടെ വിജയസാധ്യതയും പരസ്പര ബഹുമാനവും അടിസ്ഥാനമാക്കി സീറ്റ് വിഭജനം പൂർത്തിയാക്കുമെന്ന് സമാജ്വാദി പാർട്ടി അധ്യക്ഷൻ അഖിലേഷ് യാദവ് വ്യക്തമാക്കി. 2024-ലെ ലോക്സഭാ തിരഞ്ഞെടുപ്പിൽ ഉത്തർപ്രദേശിലെ 80 സീറ്റുകളിൽ 43 എണ്ണവും വിജയിച്ച ഇന്ത്യ സഖ്യത്തിന് 215 നിയമസഭാ മണ്ഡലങ്ങളിൽ വ്യക്തമായ മുൻതൂക്കമുണ്ടെന്നാണ് കോൺഗ്രസിന്റെ വിലയിരുത്തൽ. ഭരണഘടനാ ദിനമായ നവംബർ 26-ന് ലഖ്നൗവിൽ നിന്നും തുടർന്ന് ഡിസംബർ ആദ്യവാരത്തോടെയും സംസ്ഥാനവ്യാപകമായി തിരഞ്ഞെടുപ്പ് പ്രചാരണ പരിപാടികൾക്ക് തുടക്കം കുറിക്കാനാണ് കോൺഗ്രസ് നേതൃത്വം തീരുമാനിച്ചിരിക്കുന്നത്.










