ആപ്പിളിന്റെ ആപ്പ് സ്റ്റോറിനും ആൻഡ്രോയ്ഡിന്റെ ഗൂഗിൾ പ്ലേ സ്റ്റോറിനും പകരം ഇന്ത്യൻ ആപ്പ് സ്റ്റോർ പുറത്തിറക്കാനൊരുങ്ങി കേന്ദ്രം. ആത്മനിർഭർ ഭാരതിന്റെ ഭാഗമായാണ് കേന്ദ്രം ഇന്ത്യയുടെ സ്വന്തം ആപ്പ്സ്‌റ്റോർ നിർമിക്കാനൊരുങ്ങുന്നത്. സർക്കാർ ആപ്പുകൾക്കു മാത്രമായി ഒരു പ്ലേ സ്റ്റോർ മുമ്പ് വികസിപ്പിച്ചിരുന്നു.
ഇതിനോടൊപ്പം മറ്റു ആപ്പുകൾ കൂടി ഉൾപ്പെടുത്താനുള്ള ആലോചനയിലാണ് കേന്ദ്രമെന്നാണ് റിപ്പോർട്ടുകൾ. സിഡാക് വികസിപ്പിച്ച ആപ്പ് സ്റ്റോറിൽ നിലവിൽ ഉമാംങ്‌, ആരോഗ്യസേതു, ഡിജിലോക്കർ ഉൾപ്പെടെ 61 സർക്കാർ ആപ്ലിക്കേഷനുകളാണുള്ളത്. കേന്ദ്രത്തിന്റെ പുതിയ നീക്കത്തിന് ചില ഇന്ത്യൻ ടെക് കമ്പനികൾ പിന്തുണ നൽകിയിട്ടുണ്ടെന്നാണ് സൂചനകൾ. ഇന്ത്യയിൽ 50 കോടിയോളം സ്മാർട്ട് ഫോൺ ഉപയോക്താക്കൾ ഉണ്ട്. ഇതിൽ ഭൂരിഭാഗവും ഉപയോഗിക്കുന്നത് ആൻഡ്രോയിഡ് ഫോണുകളാണ്.
ഗൂഗിളിന്റെ പുതിയ നയങ്ങൾ തങ്ങളുടെ വളർച്ചയ്ക്ക് തടസ്സം നിൽക്കുന്നുവെന്ന ആരോപണം ഇന്ത്യൻ സ്റ്റാർട്ടപ്പുകളിൽ നിന്നും ഉയർന്നിരുന്നു. ഇതേ തുടർന്നാണ് പുതിയ ആപ്പ് സ്റ്റോർ നിർമിക്കാൻ കേന്ദ്രം തീരുമാനിച്ചതെന്നാണ് റിപ്പോർട്ടുകൾ.
