ഡൽഹി: നാല് വർഷങ്ങൾക്ക് മുൻപ് രാജ്യത്ത് 4ജി വിപ്ലവം സൃഷ്ടിച്ചതിന്റെ അലയൊലികൾ സജീവമായി നിലനിൽക്കെ ടെലികമ്മ്യൂണിക്കേഷൻ രംഗത്ത് അടുത്ത വിസ്മയ പദ്ധതിയുമായി വീണ്ടും റിലയൻസ് ജിയോ. അയ്യായിരം രൂപക്ക് താഴെ 5ജി സ്മാർട്ട്ഫോൺ വിപണിയിൽ ലഭ്യമാക്കാൻ തയ്യാറെടുക്കുകയാണ് റിലയൻസ്. വിൽപ്പന വർദ്ധിക്കുന്നതിനനുസരിച്ച് വില 2500ൽ എത്തിക്കാനും കമ്പനി പദ്ധതിയിടുന്നതായി എക്കണോമിക് ടൈംസ് റിപ്പോർട്ട് ചെയ്യുന്നു. നിലവിൽ 2ജി കണക്ഷൻ ഉപയോഗിക്കുന്ന മുപ്പത് കോടി ജനങ്ങളെ സഹിതമാണ് കമ്പനി ലക്ഷ്യമിടുന്നത്.
നിലവിൽ 27,000 രൂപ മുതലാണ് രാജ്യത്ത് 5ജി സ്മാർട്ട്ഫോണുകൾ വിൽക്കപ്പെടുന്നത്. ഉപഭോക്താക്കൾക്ക് സൗജന്യ നിരക്കിൽ 4ജി കണക്ഷനും തിരിച്ചുനൽകുന്ന ഡെപ്പോസിറ്റ് വ്യവസ്ഥയിൽ സൗജന്യമായി 4ജി മൊബൈൽ ഫോണും ലഭ്യമാക്കി രാജ്യത്ത് ടെലികോം രംഗത്ത് വിപ്ലവം സൃഷ്ടിച്ച ജിയോയുടെ പുതിയ പദ്ധതിയെ ആവേശത്തോടെയാണ് ടെക് ലോകം കാത്തിരിക്കുന്നത്.
ഇന്ത്യ 5ജി യുഗത്തിന്റെ പടിവാതിൽക്കൽ എത്തി നിൽക്കുകയാണെന്നും ‘2ജി മുക്ത ഇന്ത്യ‘ എന്ന ലക്ഷ്യത്തിലെത്താൻ സമയമായിരിക്കുകയാണെന്നും റിലയൻസ് ഇൻഡസ്ട്രീസിന്റെ 43ആമത് വാർഷിക യോഗത്തിൽ ചെയർമാൻ മുകേഷ് അംബാനി വ്യക്തമാക്കിയിരുന്നു.
അമേരിക്കൻ ടെക് ഭീമൻ ഗൂഗിളിൽ നിന്നും 33,737 കോടി രൂപയുടെ റെക്കോർഡ് നിക്ഷേപം സ്വീകരിച്ച ജിയോ ആൻഡ്രോയ്ഡ് അധിഷ്ഠിതമായ പുതിയ ഓപ്പറേറ്റിംഗ് സിസ്റ്റം വികസിപ്പിക്കാനുള്ള പദ്ധതിയുമായി മുന്നോട്ട് പോകുകയാണ്. ഉത്പന്നങ്ങൾ വിപണിയിലെത്തിക്കുന്നതിന് മുന്നോടിയായി 5ജി ശൃംഖലാക്ഷമത പരിശോധിക്കാൻ കേന്ദ്ര ടെലികോം മന്ത്രാലയത്തിന് അപേക്ഷ നൽകാൻ ഒരുങ്ങുകയാണ് ജിയോ. പ്രധാനമന്ത്രി നരേന്ദ്ര മോദിയുടെ സ്വപ്ന പദ്ധതിയായ മേക്ക് ഇൻ ഇന്ത്യയുടെ ഭാഗമായിട്ടാകും ജിയോ സാങ്കേതിക രംഗത്തെ പുതിയ വിപ്ലവത്തിന് തുടക്കം കുറിക്കുക.
നിലവിൽ രാജ്യത്ത് 5ജി സാങ്കേതിക വിദ്യ ലഭ്യമായിട്ടില്ല. എന്നാൽ ഇതിനായുള്ള സ്പെക്ട്രം ലേലത്തിന്റെ പ്രാരംഭ ചർച്ചകൾ ആരംഭിച്ചു കഴിഞ്ഞതായാണ് വിവരം.
