പാലക്കാട്: അവശ്യമരുന്നുകൾ ഉൾപ്പെടെ വൻ വിലക്കുറവിൽ സാധാരണക്കാർക്ക് ലഭ്യമാക്കുന്ന പ്രധാനമന്ത്രി ജൻ ഔഷധിയുടെ വിപുലമായ സ്റ്റോർ ഷൊർണ്ണൂരിൽ പ്രവർത്തനം ആരംഭിച്ചു. സിനിമാ താരവും ബിജെപി മുൻ എംപിയുമായ സുരേഷ് ഗോപിയാണ് സ്റ്റോറിന്റെ ഉദ്ഘാടനം നിർവ്വഹിച്ചത്. രാജ്യത്തെ തന്നെ ജൻ ഔഷധിയുടെ ഏറ്റവും വലിയ സ്‌റ്റോറാണ് ഷൊർണ്ണൂരിലേത്.
സുരേഷ് ഗോപിയിൽ നിന്നും കാരേക്കാട് മണികണ്ഠൻ ആദ്യ വിൽപ്പന ഏറ്റുവാങ്ങി. ഷൊർണ്ണൂർ സ്വദേശി സിദ്ധാർത്ഥ് ശ്രീകുമാറാണ് ഈ സ്റ്റോറിന്റെ ഉടമ. ഭാര്യ കാർത്തിക, പിതാവ് പ്രഭാ ശങ്കർ, മാതാവ് കുമാരി തുടങ്ങിയവരും കുടുംബാംഗങ്ങളും സുഹൃത്തുക്കളും ഉദ്ഘാടനത്തിൽ പങ്കുകൊണ്ടു. ബിജെപി നേതാക്കളും നഗരസഭാ കൗൺസിലർമാരും പരിപാടിയിൽ സന്നിഹിതരായിരുന്നു.
എല്ലാ ഇംഗ്ലീഷ് മരുന്നുകളും ജൻ ഔഷധി സ്റ്റോറിൽ ലഭ്യമാണ്. ഇതിന് പുറമേ കണ്ണടകൾ, സർജിക്കൽ- മെഡിക്കൽ എക്യുപ്‌മെന്റ്‌സ്, ഓർത്തോപീഡിക് ഡയബറ്റിക് ഫൂട് വെയർ കോസ്‌മെറ്റിക്‌സ് എന്നിവയും സ്റ്റോറിൽ ലഭ്യമാണ്. കാഴ്ച തകരാറുള്ളവർക്ക് ഇവിടെ നേത്രപരിശോധന നടത്താം. പരിശോധന തീർത്തും സൗജന്യമായിരിക്കും.
Discussion about this post