ഇന്നത്തെ കാലത്ത് ടാറ്റു ചെയ്യാത്തവർ വളരെ ചുരുക്കം മാത്രമാണ്. എന്നാൽ, ചുരുക്കം ചിലർക്കെങ്കിലും ടാറ്റു ചെയ്തതിന് ശേഷം വേണ്ടായിരുന്നു എന്ന് തോന്നാറുണ്ട്. എന്നാൽ, ഇത് വളരെ പണിപ്പെട്ട ഒരു സംഗതിയാണ്. സൂചി ഉപയോഗിച്ച് മഷിയെ ലോക്ക് ചെയ്യുകയാണ് ടാറ്റു ചെയ്യുമ്പോൾ ചെയ്യുന്നത്. ലേസർ ട്രീറ്റ്‌മെന്റാണ് ഇതിനുള്ള പ്രധാന വഴി. ലേസർ ഉപയോഗിച്ച് എങ്ങനെ ടാറ്റു നീക്കം ചെയ്യാം എന്ന് നോക്കാം..
ഉയർന്ന തീവ്രതയിൽ ലേസർ പൾസുകൾ ചർമത്തിലെ മഷിയിലേക്ക് ഏൽപ്പിക്കുകയാണ് ലേസർ ട്രീറ്റ്‌മെന്റിൽ ചെയ്യുന്നത്. മഷിയിലേക്ക് മാത്രം ലേസർ പതിപ്പിക്കുന്നതിനാൽ ഇത് ചുറ്റുമുള്ള ചർമ്മത്തിന് കേടുപാടുകൾ വരുത്തില്ല.
ഓരോ നിറവും വ്യത്യസ്ത തരംഗ ദൈർഘ്യമാണ് ആഗീതരണം ചെയ്യുന്നത്. അതുകൊണ്ട്, ഓരോ നിറത്തിനും ഓരോ ലേസർ പ്രക്രിയ വേണ്ടി വരും. എന്നാൽ, ചില നിറങ്ങൾ മായ്ച്ചു കളയുന്നത് ഏറെ പ്രയാസകരമാണെന്ന് വിദഗ്ധർ പറയുന്നു. കറുപ്പും മഞ്ഞയും പോലെയുള്ള നിറങ്ങൾ നീക്കാൻ എളുപ്പമാണ്. എന്നാൽ, വെള്ള നിറങ്ങൾ കളയുന്നതിന് കൂടുതൽ സമയമെടുക്കും.
ലേസർ റിമൂവലിസ്റ്റിനെ തിരഞ്ഞെടുക്കുമ്പോഴും പ്രത്യേകം ശ്രദ്ധിക്കണം. ലേസർ ചെയ്യുന്നത് ചർമ്മത്തെ അമിതമായി ചൂടാക്കുന്നു. പിഗ്മെന്റ് ഉൽപ്പാദിപ്പിക്കുന്ന കോശങ്ങളെ നശിപ്പിക്കാനും സാധ്യതയുണ്ട്. ഇത് ചർമ്മം ഇരുണ്ടതാക്കുന്നു. അതിനാൽ ലേസർ എങ്ങനെ പ്രവർത്തിപ്പിക്കണമെന്ന് മാത്രമല്ല, ശരിയായ തരംഗദൈർഘ്യം തിരഞ്ഞെടുക്കുന്നതിലും ശ്രദ്ധ വേണം. അതുകൊണ്ട് തന്നെ ടാറ്റു മാറുന്നതിന് അനുസരിച്ച് ചികിത്സയിലും മാറ്റം വരുത്താൻ അറിയുന്ന ടാറ്റൂ റിമൂവലിസ്റ്റിനെ വേണം തിരഞ്ഞെടുക്കാൻ.
ടാറ്റൂ നീക്കം ചെയ്യാൻ ഒന്നിലധികം സെഷനുകൾ ആവശ്യമാണ്. മഷി, ആർട്ട് ശൈലി, ടാറ്റൂവിന്റെ വലുപ്പം എന്നിവയെ അടിസ്ഥാനപ്പെടുത്തിയാണ് സെഷനുകൾ തീരുമാനിക്കുക. ഏതു ഭാഗത്താണ് ടാറ്റു ചെയ്തിരിക്കുന്നത് എന്നതും ചികിത്സയിൽ വ്യത്യാസം വരുത്തിയേക്കാം.
