വണ്ണം കുറയ്ക്കാൻ പല ഡയറ്റ് പ്ലാനുകളും നടത്തുന്നവരാണ് നമ്മൾ മനുഷ്യർ. ഡയറ്റിനോടൊപ്പം, വർക്ക് ഔട്ടുകളും മറ്റുമായി കഷ്ടപ്പെടുന്നവരാണ് മിക്കവരും. എന്നാൽ, ഒരു പുലി വണ്ണം കുറയ്ക്കാനായി ഡയറ്റ് തുടങ്ങിയാൽ എങ്ങനെയിരിക്കും… മറ്റെവിടെയുമല്ല, ചൈനയിലെ ഒരു മൃഗശാലയിലാണ് തങ്ങളുടെ പുള്ളിപ്പുലിയ്ക്കായി ഡയറ്റ് പ്ലാൻ സെറ്റ് ചെയ്തത്.
പുള്ളിപ്പുലിയുടെ അമിത ഭാരത്തെ കുറിച്ച് നിരന്തരം വിമർശനം ഉയർന്ന് തുടങ്ങിയതോടെയാണ് ഡയറ്റ് എന്ന കടുംകൈയ്ക്ക് മൃഗശാല നീങ്ങിയത്. എന്നാൽ, ഇപ്പോൾൾ ഈ ഡയറ്റ് നിർത്തിവച്ചതായാണ് മൃഗശാല അധികൃതർ അറിയിച്ചിരിക്കുന്നത്. ചൈനയിലെ സിചുവാനിലുള്ള പൻസിഹുവ മൃഗശാലയിലാണ് സംഭവം.
ഈ വർഷം ആദ്യമാണ് പുള്ളിപ്പുലിയുടെ ചിത്രങ്ങളും വീഡീയോകളുമെല്ലാം സോഷ്യൽ മീഡിയയിൽ വൈറലായത്. 16 വയസുള്ള പുള്ളിപ്പുലിയുടെ അമിത ഭാരം തന്നെയാണ് ആളുകളുടെ ശ്രദ്ധയാകർഷിക്കാൻ പ്രധാന കാരണം. ഇതോടെ പുലിയുടെ ആരോഗ്യത്തെ കുറിച്ച് നിരവധി പേർ ആശങ്ക പ്രകടിപ്പിച്ച് തുടങ്ങി. ഇതോടെയാണ് മൃഗശാല അധികൃതർ ഡയറ്റിനെ കുറിച്ച് ആലോചിച്ചത്. ഇതിനായി പുലിയ്ക്ക് നൽകുന്ന മാംസത്തിന്റെ അളവും നൽകുന്ന ഭക്ഷണത്തിന്റെ തവണകളും കുറയ്ക്കുകയായിരുന്നു.
എന്നാൽ, അധികം വൈകാതെ തന്നെ ഈ ഡയറ്റ് അധികൃതർ നിർത്തി. 16 വയസാണ് ഇപ്പോൾ പുലിയ്ക്ക് ഉള്ളത്. അതായത് മനുഷ്യന്റെ വയസിനോട് താരതമ്യപ്പെടുത്തിയാൽ ഏകദേശം 70- 80 വയസിനോടടുത്ത് പ്രായം വരും ഈ പുലിയ്ക്ക്. അതിനാൽ, തന്നെ ഈ പ്രായത്തിൽ ഈ പുള്ളിപ്പുലിയുടെ ഭഷണത്തിൽ കുറവ് വരുത്താൻ സാാധിക്കില്ലെന്നാണ് കണ്ടെത്തിയിരിക്കുന്നത്. നിലവിൽ ഈ തടി കൊണ്ട് പുലിയ്ക്ക് മറ്റ് ആരോഗ്യ പ്രശ്‌നങ്ങൾ ഇല്ലെന്ന് ഡോക്ടർമാരും വിലയിരുത്തിയതോടെയാണ് ഡയറ്റ് വേണ്ടെന്ന് മൃഗശാലക്കാർ തീരുമാനിച്ചത്.
