സോള്‍: എഐ് രംഗത്ത് തരംഗമായ ഡീപ്സീക്കിനെ കുറിച്ച് അന്വേഷണം നടത്താന്‍ ദക്ഷിണ കൊറിയ. ഡീപ്സീക്ക് ഉപഭോക്താക്കളുടെ സ്വകാര്യ വിവരങ്ങള്‍ എങ്ങനെയാണ് കൈകാര്യം ചെയ്യുന്നത് എന്ന് കമ്പനിയോട് രേഖാമൂലം ഉടന്‍ ആരായുമെന്ന് ദക്ഷിണ കൊറിയന്‍ പേര്‍സണല്‍ ഇന്‍ഫര്‍മേഷന്‍ പ്രൊട്ടക്ഷന്‍ കമ്മീഷന്‍ വ്യക്തമാക്കി. അതേസമയം, ഉപഭോക്താക്കളുടെ വ്യക്തിവിവരങ്ങള്‍ ഡീപ്സീക്ക് എങ്ങനെയാണ് കൈകാര്യം ചെയ്യുന്നത് എന്നറിയാന്‍ ഫ്രാന്‍സും ഇറ്റലിയും അയര്‍ലന്‍ഡും തീരുമാനിച്ചിട്ടുണ്ട്.
അടുത്തിടെ പുറത്തിറക്കിയ ‘ഡീപ്സീക്ക് ആര്‍1’ എന്ന ലാര്‍ജ് ലാഗ്വേജ് മോഡലാണ് ഇപ്പോഴിതാ ശ്രദ്ധേയമാവുന്നത്. ഓപ്പണ്‍ എഐയുടെ ചാറ്റ് ജിപിടി ഓ1നോട് കിടപിടിക്കുന്ന ചാറ്റ്ബോട്ടാണ് കുറഞ്ഞ മുതല്‍മുടക്കില്‍ വികസിപ്പിച്ചതെന്ന് ഡീപ്സീക്ക് അവകാശപ്പെടുന്ന ഡീപ്സീക്ക് ആര്‍1.
ഡൗണ്‍ലോഡുകളുടെ എണ്ണത്തില്‍ ചാറ്റ് ജിപിടിയെ ഇക്കഴിഞ്ഞ തിങ്കളാഴ്ച ഡീപ്സീക്ക് മറികടന്നിരുന്നു. യുഎസ് ചിപ്പ്, ഗ്രാഫിക്‌സ് പ്രൊസസര്‍ നിര്‍മാണ ഭീമനായ എന്‍വിഡിയയുടെ ഓഹരിമൂല്യം പോലും ഇടിച്ചുതാഴ്ത്താനും ഡീപ്സീക്കിന്റെ പുതിയ ചാറ്റ്‌ബോട്ടിനായി.
ഡീപ്സീക്ക് തരംഗമായതോടെ ചൈനീസ് ടെക് ഭീമന്‍മാരായ ആലിബാബ ഡീപ്സീക്കിന്റെ എതിരാളിയായ പുതിയ എഐ ചാറ്റ്ബോട്ട് അവതരിപ്പിച്ചു. ‘Qwen 2.5-Max’ എന്ന് പേരുള്ള ആര്‍ട്ടിഫിഷ്യല്‍ ഇന്റലിജന്‍സ് ലാര്‍ജ് ലാംഗ്വേജ് മോഡലാണ് ആലിബാബ പുറത്തിറക്കിയത്. പ്രകടനമികവില്‍ ക്വെന്‍ 2.5 മാക്‌സ്, ഡീപ്‌സീക്കിനെയും ഓപ്പണ്‍ എഐയുടെ ചാറ്റ് ജിപിടിയെയും മറികടക്കുമെന്ന് വി ചാറ്റ് അക്കൗണ്ടിലൂടെ ആലിബാബ അവകാശപ്പെട്ടു.
