എഴുത്തിന് പരിമിതിയുള്ളത് കൊണ്ട് ട്വിറ്ററില്‍ ആഴത്തിലുള്ള ആശയപ്രകടനം സാധിക്കാതെ നിരാശരായവര്‍ക്ക് ഒരു സന്തോഷവാര്‍ത്തയുണ്ട്. ഇനിയങ്ങോട്ട് ട്വിറ്ററില്‍ ആശയം വാരിവിതറിക്കോളൂ, വേണമെങ്കില്‍ ഒരു ഉപന്യാസം തന്നെ എഴുതിക്കോളൂ. പറയുന്നത് ട്വിറ്റര്‍ സിഇഒ സാക്ഷാല്‍ ഇലോണ്‍ മസ്ക് തന്നെയാണ്, അതും ട്വിറ്ററിലൂടെ തന്നെ. പതിനായിരം അക്ഷരങ്ങള്‍ വരെയുള്ള ട്വീറ്റുകള്‍ക്ക് ഉപയോക്താക്കളെ അനുവദിക്കുന്ന ഫീച്ചറിനായി ശ്രമിച്ചുകൊണ്ടിരിക്കുകയാണെന്നാണ് മസ്ക് അറിയിച്ചിരിക്കുന്നത്. ഉടന്‍ തന്നെ ഈ സൗകര്യം ലഭ്യമാകുമെന്നാണ് സൂചന. ആഴത്തിലെഴുതി ശീലമുള്ളവര്‍ ഇനി ട്വിറ്ററിനായി ആറ്റിക്കുറുക്കി എഴുതി കഷ്ടപ്പെടേണ്ട.
നിലവില്‍ 280 അക്ഷരങ്ങള്‍ വലുപ്പമുള്ള ട്വീറ്റ് മാത്രമേ സാധാരണഗതിയില്‍ ട്വിറ്റര്‍ അനുവദിക്കുന്നുള്ളു. നീല ടിക്കുള്ള അല്ലെങ്കില്‍ അംഗത്വത്തിനായി പണം നല്‍കുന്ന ഉപയോക്താക്കള്‍ക്ക് 4,000 അക്ഷരങ്ങള്‍ വരെയുള്ള ട്വീറ്റിന് സൗകര്യമുണ്ട്. അതേസമയം ഇനി അവതരിപ്പിക്കാന്‍ പോകുന്ന ഉപന്യാസമെഴുതാനുള്ള സൗകര്യം കമ്പനിയുടെ നീല സബ്‌സ്‌ക്രിപ്ഷന്‍ ഉള്ളവര്‍ക്ക് മാത്രമാണോ അല്ല അംഗത്വത്തിനായി പണം നല്‍കാത്തവര്‍ക്കും ലഭിക്കുമോ എന്ന് ട്വിറ്റര്‍ മേധാവി വെളിപ്പെടുത്തിയിട്ടില്ല. എന്തായാലും ഒരുപാട് ഉപയോക്താക്കള്‍ കാത്തിരിക്കുന്ന സൗകര്യമാണിതെന്നതില്‍ ഒരു സംശയവുമില്ല.
അടുത്തിടെയുള്ള മസ്‌കിന്റെ തീരുമാനങ്ങള്‍ കണക്കിലെടുക്കുമ്പോള്‍ നീണ്ട ട്വീറ്റുകള്‍ നടത്താനുള്ള സൗകര്യം സൗജന്യമായി എല്ലാവര്‍ക്കും നല്‍കുമെന്ന് കരുതാനാകില്ല. ഒരുപക്ഷേ സാധാരണ ഉപയോക്താക്കള്‍ക്ക് ട്വീറ്റിന്റെ വലുപ്പം അല്‍പ്പം കൂടി നീട്ടാനും വരിക്കാര്‍ക്ക് പതിനായിരം അക്ഷരങ്ങള്‍ വരെ നീളമുള്ള ട്വീറ്റിന് സൗകര്യമൊരുക്കാനുമായിരിക്കും ട്വിറ്ററിന്റെ പദ്ധതി. പെട്ടെന്നുതന്നെ ഇതിനുള്ള സൗകര്യമൊരുക്കും എന്നറിയിച്ചുവെങ്കിലും ഇത് എപ്പോഴായിരിക്കും എന്ന് മസ്ക് വ്യക്തമാക്കിയിട്ടില്ല.
