ന്യൂഡല്‍ഹി : ഇന്ത്യ സന്ദര്‍ശനം നടത്തുന്ന ഓസ്ട്രേലിയന്‍ ഉപപ്രധാനമന്ത്രി റിച്ചാര്‍ഡ് മാര്‍ലെസും വിദേശകാര്യ മന്ത്രി പെന്നി വോങ്ങും ചൊവ്വാഴ്ച ദേശീയ സുരക്ഷാ ഉപദേഷ്ടാവ് (എന്‍എസ്എ) അജിത് ഡോവലുമായി ന്യൂഡല്‍ഹിയില്‍ കൂടിക്കാഴ്ച നടത്തി. പ്രതിരോധ മന്ത്രി രാജ്നാഥ് സിംഗ്, വിദേശകാര്യ മന്ത്രി എസ് ജയശങ്കര്‍ എന്നിവരുമായി നടത്തിയ കൂടിക്കാഴ്ചകള്‍ക്ക് പിന്നാലെയാണ് അജിത് ഡോവലുമായും ചര്‍ച്ചകള്‍ നടത്തിയത്. ആഗോള, പ്രാദേശിക സംഭവവികാസങ്ങള്‍ ഉള്‍പ്പെടെ നിരവധി വിഷയങ്ങള്‍ ഡോവലുമായി ഇരുവരും ചര്‍ച്ച ചെയ്തു.
കൂടാതെ ഓസ്ട്രേലിയയും ഇന്ത്യയും തമ്മിലുള്ള സുരക്ഷയും പ്രതിരോധ സഹകരണവും കൂടിക്കാഴ്ചയില്‍ ചര്‍ച്ചയായി. ഗ്ലോബല്‍ കോമണ്‍സിന്റെ ഭാഗമായ സമുദ്രം, ബഹിരാകാശം തുടങ്ങിയ മേഖലകളിലെ വെല്ലുവിളികളെക്കുറിച്ചും അവസരങ്ങളെക്കുറിച്ചും ഇരുപക്ഷവും സംസാരിച്ചു.
പ്രതിരോധ മന്ത്രി രാജ്നാഥ് സിംഗും വിദേശകാര്യ മന്ത്രി എസ് ജയശങ്കറും ദേശീയ തലസ്ഥാനത്ത് ഡെപ്യൂട്ടി പ്രധാനമന്ത്രിയും പ്രതിരോധ മന്ത്രിയുമായ റിച്ചാര്‍ഡ് മാര്‍ലെസ്, വിദേശകാര്യ മന്ത്രി വോങ് എന്നിവരുമായി രണ്ടാം ഇന്ത്യ-ഓസ്ട്രേലിയ 2+2 പ്രതിരോധ, വിദേശകാര്യ മന്ത്രിതല സംഭാഷണം നടത്തിയതിന് തൊട്ടുപിന്നാലെയാണ് ഈ കൂടിക്കാഴ്ച. പ്രതിരോധം, സുരക്ഷ, വ്യാപാരം, നിക്ഷേപം തുടങ്ങിയ മേഖലകളിലുള്‍പ്പെടെ ബഹുമുഖ ബന്ധങ്ങള്‍ ആഴത്തിലാക്കുന്നതിനെ കുറിച്ച് മന്ത്രിമാര്‍ അഭിപ്രായങ്ങള്‍ കൈമാറി.
അതേസമയം, ഇരു രാജ്യങ്ങളും തമ്മില്‍ പങ്കിട്ട മൂല്യങ്ങളും പൈതൃകവും മന്ത്രിമാര്‍ എടുത്തു പറഞ്ഞു. ഇന്തോ-പസഫിക്, ആസിയാന്‍, ആഫ്രിക്ക, ഗ്ലോബല്‍ സൗത്ത്, പസഫിക് ദ്വീപുകള്‍ എന്നിവിടങ്ങളിലെ രാജ്യങ്ങളെ അവരുടെ വികസന ലക്ഷ്യങ്ങള്‍ സുസ്ഥിരമായ രീതിയില്‍ കൈവരിക്കുന്നതിന് സഹായിക്കേണ്ടതിന്റെ പ്രാധാന്യവും അവര്‍ ചര്‍ച്ച ചെയ്തു.
ഇന്ത്യയിലേയും ഓസ്ട്രേലിയയിലേയും ക്രിക്കറ്റ് താരങ്ങള്‍ പരസ്പരം പുലര്‍ത്തുന്ന പോസിറ്റീവ് വികാരങ്ങളെ കൂടിക്കാഴ്ചയില്‍ മാര്‍ലെസ് അഭിനന്ദിച്ചു. ലോകകപ്പ് ക്രിക്കറ്റ് ഫൈനലില്‍ ഓസ്ട്രേലിയയുടെ വിജയത്തില്‍ ദേശീയ സുരക്ഷാ ഉപദേഷ്ടാവ് നേതാക്കളെ അഭിനന്ദിക്കുകയും ഇരു ടീമുകളുടെയും കഴിവിനെയും കായികക്ഷമതയെയും പ്രശംസിക്കുകയും ചെയ്തു.
