ഉച്ച നേരത്തെ ഭക്ഷണം കഴിഞ്ഞാൽ ചെറിയൊരു ഉറക്കം. ഭൂരിഭാഗം ആളുകളുടെയും ശീലങ്ങളിൽ ഒന്നാണ് ഉച്ചയുറക്കം. ഉച്ചയ്ക്ക് ഒന്നുറങ്ങാതെ ഒരു ദിനം പൂർത്തിയാക്കുക തന്നെ പലർക്കും പ്രയാസമുള്ള കാര്യമാണ്. കുട്ടികൾ മുതൽ പ്രായമായവർ വരെ ഉച്ചയ്ക്ക് ഉറങ്ങാറുണ്ട്. ഓഫീസുകളിൽ വിശ്രമ വേളയിൽ കിടന്ന് ഉറങ്ങുന്നവരും കുറവല്ല. സ്‌കൂളിൽ പഠിക്കുന്ന കാലത്ത് ഉച്ചഭക്ഷണത്തിന് ശേഷം ഉറക്കം തൂങ്ങി ക്ലാസിലിരുന്നവർ ആയിരിക്കും നമ്മളിൽ ഭൂരിഭാഗവും.
എന്തുകൊണ്ടാണ് ഉച്ചയ്ക്ക് ഭക്ഷണം കഴിച്ചാൽ ഉറക്കം വരുന്നത്?. രാവിലെയും നമ്മൾ ഭക്ഷണം കഴിക്കാറുണ്ട്. എന്നാൽ ഉച്ചത്തേത് പോലെ ഉറക്കം വരാറില്ല. എന്താണ് ഉച്ച സമയങ്ങളിൽ മാത്രം ഉറക്കംവരുന്നത് എന്ന് നോക്കാം.
ഉച്ചയ്ക്ക് ഉറക്കം വരാൻ പല കാരണങ്ങളാണ് ഗവേഷകർ ചൂണ്ടിക്കാണിയ്ക്കുന്നത്. നാം കഴിക്കുന്ന ഭക്ഷണമാണ് ഇതിൽ ആദ്യത്തേത്. ഉച്ചയ്ക്ക് പ്രധാനമായും ചോറ് ആണ് നാം കഴിക്കാറ്. ചോറ് നമ്മുടെ രക്തത്തിലെ ഷുഗറിന്റെ അളവ് വർദ്ധിപ്പിക്കും. ഇത് നമ്മുടെ ഊർജ്ജം കുറയുന്നതിന് കാരണം ആകും. തലച്ചോറും ക്ഷീണിയ്ക്കും. നഷ്ടമായ ഊർജ്ജം വീണ്ടെടുക്കാൻ ശരീരം വിശ്രമം ആവശ്യപ്പെടുമ്പോഴാണ് നമുക്ക് ഉറക്കം വരുന്നത്.
ഹോർമോണുകളുടെ പ്രവർത്തനം ആണ് ഉറക്കം വരാനുള്ള മറ്റൊരു കാരണം. ഉച്ച സമയങ്ങളിലെ ഭക്ഷണം നമ്മുടെ ശരീരത്തിൽ ഉറക്കത്തിന് ആവശ്യമാണ് സെറോട്ടോണിൻ എന്ന ഹോർമോണിന്റെ ഉത്പാദനം വർദ്ധിപ്പിക്കും. ഇതും ഉറക്കം വരാൻ കാരണം ആകുന്നു.
രാത്രിയിൽ ശരിയായി ഉറങ്ങേണ്ടത് നമ്മുടെ ആരോഗ്യത്തിന് അത്യന്താപേക്ഷിതമാണ്. രാത്രി ശരിയായി ഉറങ്ങിയില്ലെങ്കിൽ ഉച്ച നേരത്ത് ഉറക്കം വരാൻ കാരണം ആകും.
ഉച്ച സമയങ്ങളിൽ മദ്യപിച്ചാലും ഉറക്കംവരും. ഭക്ഷണത്തിനൊപ്പം മദ്യപിക്കുന്നവർക്ക് വളരെ പെട്ടെന്ന് തന്നെ ഉറക്കംവരുമെന്നാണ് പഠനങ്ങൾ പറയുന്നത്.
ചിലകാര്യങ്ങൾ ശ്രദ്ധിച്ചാൽ ഉച്ചയുറക്കം നമുക്ക് ഒഴിവാക്കാം. ഉച്ച നേരങ്ങളിൽ ചെറിയ അളവിൽ ഭക്ഷണം കഴിക്കുന്നത് ഉറക്കം തൂങ്ങുന്നത് ഒഴിവാക്കും. അത് പോലെ ഉറക്കം വരുമ്പോൾ ലഘുവായ വ്യായാമങ്ങൾ ചെയ്യുക. ചായ, കാപ്പി എന്നിവയുടെ ഉപയോഗം കുറയ്ക്കുക, മദ്യത്തിന്റെ ഉപയോഗം പൂർണമായും നിർത്തുക. രാത്രി സുഖമായി ഉറങ്ങുക.
